Ky vendim mendohet se vjen edhe për të ruajtur formën fizike të dy yjeve. Kampionati Evropian për grupmoshën U-21 fillon pas pak ditësh dhe kjo dyshe pritet ta udhëheqë drejt triumfit kombëtaren axurre.

Kjo fitore e ngjit kombëtaren axurre në kuotën e 9 pikëve pas tre ndeshjes, ndërsa të martën do të presë Bosnje Hercegovinën, në një duel të zjarrtë që duhet fituar me çdo mënyrë.

“Gjëja më e rëndësishme është fakti që po përmirësohemi ndeshje pas ndeshje. U treguam të aftë që nga minuta e parë dhe e drejtuam ndeshjen aty ku donim ne. Duhet të sulmonim më shumë në pjesën e dytë, por e menaxhuam më shumë se ç’duhet situatën. Duhet të përmirësohemi në këtë aspekt. Nuk pësojmë gol prej gjashtë ndeshjes dhe kjo po ndodh edhe falë presingut të bërë lart”, thekson Roberto Mançini.

Roberto Mançini ka dalë në konferencë për shtyp, duke prekur disa tema. Nga kundërshtarët e radhës të Mario Baloteli. Sulmuesi ka bërë mirë me Marsejën, por nuk mjafton.

Më pas një koment për kalimin e Kontes tek Interi, dy fjalë për finalen angleze të Champions Ligës dhe të rinjtë e futbollit italian.

KUNDËRSHTARËT – “Do të jenë dy përballje të komplikuara. Greqia është e fortë teknikisht. Na pret një betejë në Athinë. E tillë do të jetë edhe ndeshja me Bosnjën. Duhet të vazhdojmë me fitore, për të siguruar sa më shpejt kualifikimin dhe për t’u rritur në renditjen botërore.”

SULMI – “Beloti ka zhvilluar një fazë të dytë më pozitive sesa e para dhe e meriton të jetë këtu. E meritojnë edhe djem që nuk i kam grumbulluar, por dera ime është gjithmonë e hapur për ta. Kam biseduar me Balotelin. Mario e di mendimin tim dhe i kam shpjeguar se pse nuk e ftova. Është një vendim teknik dhe ai e di se çfarë duhet të bëjë. Nuk duhet të ndëshkohet me të kuqe, por ndeshjen e fundit e beri diçka të tillë dhe u pezullua katër ndeshje.

Ka kualitetin për të shënuar edhe kur nuk është në formë. Besoj se mund të japë shumë më shumë. Nëse do të jepte gjithmonë 100%, do të shënonte nga 3-4 gola për ndeshje. Ka 12 muaj kohë për të rregulluar gjërat dhe për t’u rikthyer në kombëtare.”

KONTE – “Profesionalizmi mund të dërgojë gjithkund. Ai nuk zgjodhi Interin pa e menduar mirë vendimin që po merrte. Mendoj se është zgjedhja e duhur për të dy palët. Nuk më pëlqen klima që është krijuar. Nuk ka lidhje fakti që Konte ka qenë futbollist dhe trajner i Juventusit. Tifozët duhet të shkojnë në stadium dhe të argëtohen.”

FINALJA – “Liverpuli dhe Totenhemi janë dy skuadra që luajnë gjithmonë në maksimumin e tyre, me marshin e fundit. Ata janë mësuar ta bëjnë diçka të tillë. Punojnë shumë me taktikën, por gjëja e parë që ju kalon në mendje është që të sulmojnë kundërshtarin. Nëse një skuadër angleze po fiton 2-0, ajo vazhdon të sulmojë për të shënuar sërish. Kjo është e bukura e Premier Ligës dhe diçka e tillë i dha mundësinë katër ekipeve të shkojnë në finale.”

TË RINJTË – “Vitin e fundit kemi fituar disa lojtarë, të cilët janë rritur shumë. Barela, Ken dhe Zaniolo. Është një moment i mirë për të rinjtë italianë.”

Trajneri që riktheu titullin te Siti pas shumë vitesh, sot në krye të stolit të kombëtares italiane, ka dhënë një koment pikant për Jyrgen Klop. Trajneri gjerman është ndër më të mirët në botë, futbolli i tij është plot pasion dhe emocione, por trofetë nuk mungojnë.

Klop ka dërguar tre herë Liverpulin në finale, duke i humbur të treja, ndërsa ky është sezoni i katërt në krye të legjendës angleze. “Ne i ekzagjerojmë shumë gjërat në Itali. Klop rrezikon të mbyllë vitin e katërt pa trofe, por ky sezon ka qenë fantastik për Liverpulin. Megjithatë, në Itali është ndryshe dhe nuk duron kush kaq gjatë. Këtu do e vrisnin, por të kalonte 4 sezone pa fituar trofe”, përfundon Roberto Mançini.

Roberto Mançini në një prononcim për mediat italiane ka komentuar punën e 47-vjeçarit në Londër dhe durimin që kanë drejtuesit mbi “thatësirën” e trofeve. Ai shprehet se nëse Poketino do të drejtonte në Itali, krerët e klubit do e kishin “krasitur” me kohë.

“Poçetino ka pesë vite me Totenhem dhe nuk ka fituar asnjë trofe, edhe pse ka në përbërje një ekip shumë të fortë.  Në Itali nuk të presin kaq shumë. Këtu njerëzit ekzagjerojnë gjithçka. Asnjëherë nuk është e lehtë të fitosh”, u shpreh trajneri i kombëtares italiane. Më parë edhe Mançini ka drejtuar në Angli, ku ka fituar edhe Premier Ligën me Mançester Sitin.

Trajneri ka bërë përgjithësisht mirë me axurrët, duke i ngritur nga ajo humnerë që ishin, ku nuk arritën të kualifikoheshin në Botërorin e Rusisë. Tani ai do të mundohet t’i çojë në Europian dhe pse jo për të synuar trofeun.

Gjatë intervistës trajneri u shpreh se duhet të ndryshojnë filozofinë e ekipit. Duhet ti japin një mentalitet fitues. Thotë se ka të rinj cilësorë dhe i duket një kombëtare e mirë kjo aktualja. Më pas preku pak edhe çështjën Adani-Alegri. Deklaroi se opinionet duhet të dëgjohen gjithmonë, megjithatë nuk duket si diçka aq shumë serioze.

“Në kombëtare mundohemi të ndajmë sa më shumë mendime. Dua që t’i japim këtyre djemve një mentalitet fitues. Rezultatet e të rinjve janë shumë të mira. Gjithashtu mendoj se kemi një ekip të parë cilësor.”

“Adani-Alegri? Mendoj se opinionet duhet të respektohen. Nuk mendoj se ka ndodhur diçka shumë serioze. Është folur vetëm për futbollin. Në fund ekipi më i mirë fiton”, tha mes të tjerash Mançini.

FORMACIONI – “Patëm disa dyshimë për sa i përket formacionit, por që tani janë zgjidhur. Jemi të bindur se ata që do të zbresin në fushë do të bëjnë mirë. Proçesi për të gjetur një formacion të përshtatshëm është pak e ndërlikuar, por objektivi ynë i vërtetë nis nesër, që do të thotë, na duhet të bëjmë futboll të mirë dhe të shënojmë sa më shumë gola.”

MOISE KIN – “Do të shohim se kush do të luajë nesër. Nga Kin pres më të mirën. Nuk ka eksperiencën e Insinjës, por do të na sjellë fizik më shumë dhe entuziazëm. Shpresoj që të sjellë edhe gëzim në ekip.”

ELEMINATORET – “Kualifikueset ishin dhe janë objektivi primar për ne. E respektuam “Ligën e Kombeve” deri në fund, por duket filluar që nga nesërm për ne është thelbësore jo vetëm të fitojmë, por edhe të përmirësojmë renditjen në FIFA.”

KUNDËRSHTARI – “Finlanda është një ekip i vështirë për t’u përballur dhe ka bërë mirë në dy-tre vitet e fundit. Temu Puki është një ndër lojtarët më të mirë të tyre, i cili ka shënuar shumë gola në Championship me ekipin e Noruiç Sitit.”

Trajneri i kombëtares ka prekur disa tema gjatë prononcimit të tij. Ai flet për lojën sulmuese, fatin e madh që kishte kur mori detyrën e trajnerit të kombëtares dhe ndalet te individë të veçantë.

LISTA – “Thirra disa lojtarë më shumë, pasi nuk i dija kushtet e të gjithë djemve. Ndonjë është këtu për shkak se duam ta vlerësojmë më mirë, është momenti i vetëm për t’i parë. Lojtarët janë po ata, kemi lënë ndonjë në shtëpi, me keqardhje, por do kthehen në ndeshjet e ardhshme.

NDESHJET – Mbi të gjithë mendojmë për Finlandën, pasi është ndeshja e parë dhe më e vështira. Shpresoj që të tregoj gatishmërinë, të mbrojë kur ka nevojë e mbi të gjitha të bëjë një lojë të mirë. Kam besim, shikoj te djemtë shumë entuziazëm dhe dëshirë për të ardhur në kombëtare. Duhet të përpiqemi të argëtohemi dhe kjo do të na shpjerë edhe drejt rezultateve pozitive.”

FINLANDA – “Do të jetë e vështirë, por duam të fitojmë. Dua të shoh nga ekipi të njëjtë dëshirë që keki shprehur në ndeshjet e fundit. Duhet të prodhojmë një lojë të bukur dhe të tregohemi të kujdesshëm në mbrojtje.”

LOJA SULMUESE – “Koncepti i lojës është ai që ne u përpoqëm të bënim disa muaj më parë. Gjërat shkuan mirë dhe unë shpresoj që të shkojë gjithmonë e më mirë në vazhdim. Djemtë janë të kënaqur dhe shpresojmë që ekipi të ketë sukses në realizimin e sasisë së lojës së krijuar. Ata po zbaviten dhe duhet të kërkojmë të bëjmë gjëra të ndryshme, që i argëtojnë njerëzit.”

BALOTELI-KIN – “Mario nuk besoj se është në kushtet optimale. Është përmirësuar fizikisht, ka një mesatare të mirë të golave dhe prej tij presim shumë. Është 29 vjeç dhE është në kulmin e pjekjes së tij. Le të shpresojmë që Moize (Kin) të ecë në këtë rrugë dhe të bëjë mirë. Në moshën e tij, Mario luante në Serie A dhe shënonte gola. Ai ka zhvilluar një karrierë të mirë, por mund të bënte edhe më mirë.

BELOTI – “E bukura e ekipit kombëtar është se të gjithë mund të shprehin mendimin e tyre. Pastaj unë bëj zgjedhjet e mia. Beloti ishte me ne në fillim, por është i ri dhe po përmirësohet”.

TË RINJTË – “E kam thënë që kwmi lojtarë me kualitet, por duhet të luajnë gjithmonë për t’u përmirësuar. Kieza, Zaniolo dhe Bernardeski janë në rrugën e duhur. Zaniolo është rritur shumë dhe Di Françesko ka merita të mëdha. Ai i ka dhënë besim dhe lojtari ia ka shpërblyer. Zaniolo mund të debutojë me kombëtaren.”

ZHORZHINJO-VERRATI – “Zhorzhinjo po paraqitet mirë. Ndoshta Çelsi po kalon një moment të vështirë, por ai ka shumë kualitet dhe vështirë të bëjë gabime. E njëjta gjë edhe për Verratin. Kemi fatin që mund t’i bëjmë të luajnë bashkë. Mund të përmirësohen akoma, ndodh edhe pasi i ke kaluar 30 vitet, por po bëjnë një punë të madhe. Kam qenë me fat, pasi gjeta në ekip mesfushorë me kualitet, të cilët më kanë ndihmuar të ndërtoj skuadrën.”

SERIE A – “Kampionati ynë nuk është kurrë i lehtë. Fakti që Juventusi dominoi edhe kët vit nuk ka lidhje. Ata kanë një skuadër të fortë, të cilës i shtuan futbollistë të jashtëzakonshëm. Pas tyre ka shumë rivalitet. Napoli është i qetë në vend të dytë, por ka prej kohësh një skuadër të madhe. Unë shoh edhe Atalantën e Torinon në garë për Championsin, përveç Interit, Milanit, Lacios dhe Romës.

Në mbrojtje risia është qendërmbrojtësi i Torinos Armando Izo, ndërsa mesfushë ka mbetur jashtë liste Lorence Pelegrini i Romës, në vend të tij i është besuar Stefano Sensit të Sasuolos.

Portierë
Alesio Kranjo (Kaljari), Xhanluixhi Donaruma (Milan), Matia Perin (Juventus)
Mbrojtës
Kristiano Biragi (Fiorentina), Leonardo Bonuçi (Juventus), Xhorxho Kielini (Juventus), Alesandro Florenci (Roma), Armando Izo (Torino), Xhanluka Mançini (Atalanta), Kristiano Piçini (Valencia), Alesio Romanjoli (Milan), Leonardo Spizanola (Juventus)
Mesfushorë
Nikolo Barela (Kaljari), Brajan Kristante (Roma), Zhorzhinjo (Çelsi), Stefano Sensi (Sasuolo), Marko Verrati (PSG), Nikolo Zaniolo (Roma)
Sulmues
Federiko Bernardeski (Juventus), Federiko Kieza (Fiorentina), Stefan El Sharaui (Roma), Vinçenco Grifo (Frajburg), Çiro Imobile (Lacio), Muase Kean (Juventus), Kevin Lasanja (Udineze), Leonardo Pavoleti (Kaljari), Mateo Politano (Inter), Fabio Kualjarela (Sampdoria )

“Super Mario” është rikthyer të shënojë dhe trajneri e monitoron atë në çdo moment. Juventusi do të hasë vështirësi për të kthyer rezultatin 0-2 kundër Atletikos, por trajneri ka një këshillë për djemtë e Alegrit.

Ai analizon dhe ekipin e Simeones, që ka marrë identitetin e argjentinasit, ndërsa komenton dhe ecurinë e Milanit të Gatuzos. Në fund Donaruma dhe Ikardi. I pari ka rigjetur qetësinë dhe formën fantastike, ndërsa i dyti po vuan. Roberto Mançini ishte trajneri që e zgjodhi kapiten tek Interi dhe pranon se nuk ka patur kurrë probleme me Mauron.

ZANIOLO – “Kombëtarja ka nevoje dhe për pak kohë për t’u kthyer për të fituar dhe ëndërruar, por jemi në rrugën e duhur. Ka një brez lojtarësh të rinj, të cilët duhet të luajnë dhe të krijojnë eksperiencë. Zaniolo? Di Françesko e njeh mirë, e sheh çdo ditë nga afër dhe e di se ku mund të luajë. Ai është një lojtar i aftë dhe po i shkon gjithçka vaj për momentin. Unë e shoh si një “mezzala”. E kam ndjekur në Europianin U19. Nuk e dija që ishte një lojtar i Interit, pasi ai po përgatitej të kalonte te Roma.”

BALOTELI – “Marion e ndjek gjithmonë, por dhe gjithë të tjerët. Ai e ka nisur mirë aventurën me Marsejën, ku ka shënuar 3 gola në katër ndeshje. Objektivi ynë është të formojmë një skuadër të gatshme për të bërë mirë në Euro 2020. Italia duhet të marrë pjesë gjithmonë për të fituar.”

JUVENTUSI-RONALDO – “Bardhezinjtë nuk duhet të zbresin në fushe me mendimin që duhet të shënojnë tre gola. Ata duhet të përqendrohen në shënimin e golit të parë dhe pastaj të shohim se çfarë do të ndodhë… Alegri ka një ekip ekspert, sezonin e kaluar i shënuan tre gola Realit në Spanjë dhe mund t’ia dalin dhe kundër Atletikos. CR7? Në Champions nuk po arrin të bëjë atë që ka bërë në të kaluarën, ndërsa në kampionat po arrin të shënojë gola. Në Itali është më vështirë, sepse në Spanjë ai luante me ekipin më të mirë në botë. Gjithsesi, ai po bën një sezon pozitiv.”

SIMEONE – “Diego ka qenë gjithmonë një futbollist me karakter të fortë. Ai i ka dhënë Atletikos identitetin e tij dhe është shumë e vështirë të luash kundër tyre. Në ndeshjet shtëpiake ata bëhen të bezdisshëm në situata të caktuara. Janë një ekip me karakter, ashtu siç ishte dhe vetë Diego si lojtar. Gjesti i tij te goli i Himenez? Janë gjëra që ndodhin dhe do të ndodhin dhe në të ardhmen. Ai bëri një gjest të keq dhe e di mirë këtë gjë.”

MILANI – “Kuqezinjtë janë një ekip me lojtarë shumë të mirë, sidomos dy blerjet e janarit. Gatuzo po ndërton një skuadër të mirë, por ka nevojë për kohë. Ai e njeh mirë futbollin. Nuk e di nëse ka dashur të bëhet trajner kur luante, por e njeh shumë mirë futbollin.”

DONARUMA – “Xhixho është një djalë i ri dhe po fiton përvojë, pavarësisht shumë ndeshjeve që ka zhvilluar në Serie A. Në kombëtare është paraqitur gjithmonë mirë, por ne nuk vuajmë në aspektin e portierëve. Përveç tij kemi dhe Sirigunë, Perinin dhe Meret.”

IKARDI – “Unë nuk kam patur kurrë probleme me të. AI ishte një futbollist kyç për mua dhe mund të ishte i rëndësishëm për historinë e Interit. Mua më duhej të zgjidhja një kapiten dhe zgjodha Mauron.”

Trajneri vlerëson Ronaldon e Juventusit dhe Barelën e Kaljarit, ndalet te Zaniolo, talenti i Romës dhe komenton çështjen e racizmit, flet për Vialin, me të cilin fitoi titullin me Sampdorian dhe arriti në finalen e Kupës së Kampioneve, ndërsa e mbyll me kritikat e Salvinit për finalen e Superkupës që do të zhvillohet në Arabinë Saudite.

SERIE A – “Ky është kampionati i Kristiano Ronaldos, i cili ka përmirësuar Juventusin, edhe pse nuk ka qenë e thjeshtë.  Më pas Barela, i cili më kujton shumë Tardelin. Zaniolo? Tani po luan në rolin e organizatorit, por e shoh mirë në të gjithë fushën, sepse ka një potencë atletike si Pogba.”

MILANI I SAKIT – “Saki ka ndryshuar futbollin, një ngjarje e jashtëzakonshme që ndodh çdo 20-30 vite. Ne po ndjekim atë linjë, edhe pse pa fenomene në ekip. Duam një ekip që prodhon gjithmonë lojë dhe sulmon me vazhdimësi, me shpresën që pas 20 vitesh të flasin si diçka inovative.”

KULIBALI – “Nuk besoj se do të ndodhin përsëri thirrje raciste kundrejt tij në ndeshjen Milan-Napoli, pasi precedenti na ka mësuar diçka. Është absurde të ndodhin këto gjëra në vitin 2019 dhe nuk duhet të na shkojnë as në mendje.”

BALOTELI – “Nëse kthehet në kombëtare dhe pëson thirrje raciste, lojtarët mund të ndalojnë lojën.  Mos të harrojmë faktin që këto gjëra i bëjnë 50 veta nga 60 mijë të pranishëm. Pakica ka qëllim të demoralizojë dhe përhapin nervozizëm, por pjesa tjetër janë tifozë inteligjentë dhe mund t’i mbulojnë fishkëllimat me koret e tyre.”

VIALI – “I kam qëndruar gjithmonë afër dhe nuk kemi reshtur kurrë së foluri. Por, nuk kemi folur kurrë për sëmundjen e tij. Unë nuk kam patur kurajën dhe ai nuk e ka hapur si temë. Kam respektuar heshtjen e tij. Ka një gjë të cilën nuk ia kam thënë kurrë: Xhanluka ka qenë gjithmonë një shembull për mua, për përkushtimin dhe seriozitetin me të cilin i bënte gjërat.”

SUPERKUPA – “Salvini ka thënë që luajtja e ndeshjes në Arabi, aty ku femrat diskriminohen, është një shpifësi? Nuk ndodh vetëm atje. Mos të harrojmë se situata e femrave në vendin tonë nuk ishte shumë më e mirë përpara 70 vitesh. Kjo finale mund të ndihmojë në krijimin e kushteve më të mira për femrat në stadium. Sporti ndihmon në hapjen e portave dhe transformimeve, siç ka ndodhur në Kinë me Olimpiadën. Në Arabi, ashtu si në gjithë lindjen e mesme, futbolli është shumë i dashur dhe i ndjekur.”

ITALIA – “Ne italianët jemi fëlliqur për shumë probleme, por gjithmonë kemi treguar zemër të madhe dhe i kemi ndihmuar të gjithë. Babai im shkoi për të punuar në Gjermani, aty ku gjeti përkrahje. Njerëzit duhen ndihmuar gjithmonë. Duhet ndjekur gjithmonë zemra dhe brenda nesh jemi njerëz të mirë.”

Një ndër mbrojtësit e krahut më të mirë të Italisë ka folur mbi mundësinë e kalimit si ndihmës i Roberto Mançinit në stolin e kombëtares, duke u vetëofruar për një post të tillë.

41-vjeçari punoi së fundmi si zëvendës trajner i ekipit kinez të Jiangsu Suning, ndërsa një ftesë për të qenë numri dy i stolit të kombëtares nuk do të refuzohej, aq më tepër puna me një trajner si Mançini.

“Për momentin kam patur vetëm një kontakt me FIGC (federata italiane e futbollit) nëpërmjet këshillit federal. Unë si zëvendës i Mançinit në kombëtare? Nuk i thuhet kurrë jo Italisë, nëse të vjen ndonjë propozim. Të punosh me një person të madh si Roberto Mançini, vetëm mund të mësosh nga ai”, komenton Xhanluka Zambrota për “Sky Sport”.

Puna e trajnerit po jep frytet e saj dhe kombëtarja e kaltër po e merr veten nga ndeshja në ndeshje. Mançini ka folur në seminaret e federatës të organizuar në Koverçiano, ku zbulon dhe objektivin e madh të Italisë së tij.

“Unë nuk punoj për të përgatitur një Itali konkurruese në Botërorin e Katarit. Ne duhet të jemi gati për Europianin dhe  të shkojmë atje për ta fituar. Kemi shumë punë për të bërë, por rruga që kemi marrë është ajo e drejta. Ndërkohë, kemi risjellë entuziazmin, ka harmoni dhe ekziston shpirti i duhur për të bërë mirë”, thekson trajneri i kombëtares italiane.

Shorti i eliminatoreve të Euro 2020 i vendosi të kaltrit në grupin J, bashkë me Bosnjen, Finlandën, Greqinë, Armeninë dhe Litenshtejnin.

Debutim pozitiv për Sensin, Grifon dhe Kin. Trajneri i Italisë nuk i kursen fjalët e mira për ta, por dhe për të gjithë lojtarët e tjerë. Kombëtarja po rikthehet, ndërsa Mançini tregon dhe objektivat për eliminatoret e Europianit. Gjithçka është në rrugën e duhur, por kjo Itali duhet të shënojë më shumë dhe të ketë një raport më të mirë me golin.

ITALIA – “Do të më vinte keq për lojtarët dhe tifozët, nëse ndeshja do të mbyllej pa gola. Duhet të shënonim më parë. Mendova se mbaroi dhe kjo ndeshje 0-0, por ky është futbolli. Rëndësi ka që zhvilluam një ndeshje të mirë. Nuk prisja të luanim shumë mirë për gjatë gjithë 90 minutëshit: ishte hera e parë që disa lojtarë luanin së bashku. Jemi në përputhje me pritshmëritë, ndoshta dhe pak më mirë. Po luajmë mirë dhe kjo është e rëndësishme. Në eliminatoret e Europianit duhet të përpiqemi t’i fitojmë të gjitha ndeshjet.”

DEBUTUESIT – “Sensi, Grifo dhe Kin bënë mirë, por dhe Açerbi me De Shiljon. Më pëlqyen të gjithë, madje dhe Galjardini bëri gjëra pozitive. Më vjen keq që nuk do i shoh djemtë për disa muaj. Shpresoj që të bëjnë mirë në klubet e tyre.”

MENTALITETI – “Ndeshjet ndërkombëtare nuk janë kurrë të thjeshta. Sigurisht që është ndryshe të luash kundër Portugalisë dhe SHBA, por, e përsëris, çdo ndeshje është komplekse. Pavarësisht shumë ndërrimeve, kam vënë re të njëjtin qëndrim, nga minuta e parë deri në minutën e fundit. Jam i kënaqur me këtë mentalitet, thjeshtë duhet të shënojmë më shumë.”

Të martën është miqësorja kundër SHBA dhe Roberto Mançini ka vendosur të bëjë disa ndryshime. Trajneri i kombëtares ka vendosur në bashkëpunim me stafin teknik dhe vetë lojtarët, të dërgojë në shtëpi 6 lojtarë. Kielinin, Florencin, Verratin, Insinjen dhe Imobilen.

I fundit është larguar dhe Lorenco Pelegrini, i cili është dëmtuar dhe është detyruar të largohet nga grumbullimi i kombëtares. Mançini dëshiron të provojë lojtarë të rinj kundër kombëtares amerikane dhe t’iu japë besimin e duhur atyre.

KUNDËRSHTARI – “Portugalia mbetet një ekip i madh, këtë gjë e treguan dhe në finalen e Europianit, kur Ronaldo u dëmtua. Janë një ndër skuadrat më të mira për mënyrën e lojës dhe kanë lojtarë të jashtëzakonshëm në fazën ofensive. Mendoj se do të jetë bukur dhe pa Ronaldon, edhe pse unë doja të ishtë në fushë”.

GJENDJA AKTUALE – “Mendoj se po ecim mirë, duke menduar që dështuam për të shkuar në Botëror. Çdo gjë ka kohën e saj, nuk bëhet me shkop magjik. Po përmirësohemi nga ndeshja në ndeshje”.

PRESIONI – “Janë 50 milionë njerëz që duan që në të fitojmë, kështu që normalisht ka presion, por e kam përjetuar këtë gjë dhe më parë. “San Siro” gjithmonë është përgjigjur mirë në ndeshjet e kombëtares”.

DËMTIMET – “Dy lojtarë nga U-21 do të vijnë pas dëmtimeve. Moise Kin dhe Xhanluka Mancini. Gjithashtu dhe Açerbi, i cili është në skuadër pas problemeve të Romanjolit”.

“Në fillim të turneut objektivi ynë ishte kualifikimi në fazën finale të Ligës së Kombeve. Humbëm në Portugali, kishim hedhur në fushë një ekip të ri. Një humbje që qëndron, por tani kemi shansin t’i mposhtim në ‘San Siro’. Duhet të mendojmë vetëm për fitoren dhe pastaj të shohim se çfarë do të ndodhë në ndeshjen Portugali-Poloni. Duam të bëjmë një ndeshje shumë të mirë dhe të luajmë siç kemi bërë në dy ndeshjet e fundit. Dua të shoh një ekip që sulmon, mbi të gjitha për të kënaqur publikun e ‘San Siros’, një stadium që mbushet gjithmonë plot për kombëtaren dhe kjo është një gjë shumë e rëndësishme”, insiston Roberto Mançini.

Trajneri i Italisë ka luajtur si futbollist dy ndeshje në “San Siro” me fanellën e kaltër. Të parën në dhjetorin e vitit 1987 dhe të dytën në nëntorin e vitit 1993. Mançini i mban mend mirë të dyja dhe nis e kujton episode nga ato dy takime.

“Shkuam në Europianin e vitit 1988, ishim një skuadër shumë e fortë dhe bëmë një ndeshje të madhe, duke fituar 3-1 në Milano.” 53-vjeçari kujton dhe fitoren kundër Portugalisë me rezultatin 1-0. Ishte nëntori i vitit 1993 dhe Italia triumfonte përballë luzitanëve me golin e Dino Baxhos.

“Fituam me golin e Dino Baxhos, ishte 17 nëntor, e njëjta datë si të shtunën. Shpresojmë të jetë një shenjë e mirë për Ligën e Kombeve dhe të ardhmen tonë“, kujton dhe shpreson Roberto Mançini.

Tekniku i Juventusit, Masimiliano Alegri, kishte pranuar më parë se Bernardeski ka luajtur i dëmtuar, që herën e fundit që ishte me kombëtaren dhe në tre ndeshjet e fundit nuk është aktivizuar për bardhezinjtë.

Mesfushori i avancuar italian do të humbasë ndeshjet ndaj Portugalisë dhe Shteteve të Bashkuara të Amerikës, ku e para luhet për Ligën e Kombeve, ndërsa ndeshja e dytë do të jetë një test miqësor. Bernardeski ka zhvilluar në total 16 ndeshje për kombëtaren italiane.

Mançini ndalet dhe te mungesat e lojtarëve si: Beloti dhe Baloteli, ndërsa insiston se dera e kombëtares është e hapur për të gjithë. Edhe për ata që nuk janë ftuar kurrë. Në fund një koment për afrimin e datës 13 nëntor (dita kur Italia barazoi me Suedinë dhe vulosi mos pjesëmarrjen në Kupën e Botës) dhe për gjestin e polemikat e Zhoze Murinjos me tifozët e Juventusit.

GRUPI – “Duam të vazhdojmë në rrugën e shtruar në Poloni dhe miqësoren kundër Ukrainës, ku luajtëm mirë, por duhet të përmirësohemi akoma. Do të provojmë të fitojmë grupin e Ligës së Kombeve, duhet të fitojmë me Portugalinë dhe të shpresojmë më pas që Polonia të mos humbasë. Është e vështirë, sepse nuk varet nga ne.”

LOJTARËT – “Nuk ka asnjë të dështuar, edhe ata që nuk janë këtu sot, por dhe ata që ishin me ne më parë dhe që nuk janë më, si El Sharaui, madje dhe ata që nuk janë thirrur kurrë. Thjeshtë kemi dashur të grumbullojmë ata lojtarë, të cilët nuk i njihnim. Beloti mund të bëjë shumë më shumë se sa po bën, mund të kthehet lojtari që ishte para dy vitesh.”

13 NËNTORI – “Italia nuk është shëruar, sepse nuk ka qenë kurrë e sëmurë. Fatkeqësisht ndodhi ajo që të gjithë e dimë dhe tani duhet të rinisemi. San Siro mbushet gjithmonë për ndeshjet e kombëtares dhe do të provojmë t’i dhurojmë tifozëve një ndeshje të mirë.”

MURINJO – “Për fat të keq në Itali sillen keq, ndërsa jashtë nuk ndodhin këto gjëra. Mund të jetë një ide ndalimi i lojës, siç është shprehur Ançeloti, por nuk më duket se Murinjo bëri ndonjë gjë të madhe.”

Hera e parë në kombëtare për tre lojtarët: mesfushorë Tonali të Breshias dhe Sensi të Sasuolos, si dhe sulmuesin e krahut të Hofenhajmit, Vinçenco Grifo.

Jashtë Mario Baloteli dhe Andrea Beloti, pavarësisht se sulmuesi i Torinos është rikthyer në formë dhe po shënon në kampionat, ndërsa De Shiljo i Juventusit është rikthyer në kombëtare.

Lista e lojtarëve të grumbulluar me Italinë

PORTIERË: Alesio Kranjo (Kaljari), Xhanluixhi Donaruma (Milan), Salvatore Sirigu (Torino)

MBROJTËS: Kristiano Biragi (Fiorentina), Leonardo Bonuçi (Juventus), Xhorxhio Kielini (Juventus), Matia De Shilio (Juventus), Emerson Palmieri Dos Santos (Çelsi), Alesandro Florenci (Roma), Alesio Romanjoli (Milan), Daniele Rugani (Juventus)

MESFUSHORË: Nikolo Barela (Kaljari), Roberto Galiardini (Inter), Zhorzhinjo (Çelsi), Lorenco Pelegrini (Roma), Stefano Sensi (Sasuolo), Sandro Tonali (Breshia), Marko Verrati (PSG)

SULMUES: Domeniko Berardi (Sasuolo), Federiko Bernardeski (Juventus), Federiko Kieza (Fiorentina), Vinçenco Grifo (Hofenhajm), Çiro Imobile (Lacio), Lorenco Insinje (Napoli), Kevin Lasanja (Udineze), Leonardo Pavoleti (Kaljari), Mateo Politano (Inter).

Sipas medieve italiane Mançini ka ndërmend t’i dërgojë një ftesë mesfushorit Sandro Tonali. Futbollisti 18-vjeçar luan në Serie B me Breshian, ku po spikat me paraqitjet e tij dhe jo më kot është kthyer në një shënjestër për shumë klube të Serie A, si Milan dhe Atalanta.

Tonali deri më tani ka 10 paraqitje për përfaqësuesen U19 të Italisë, ndërsa akoma nuk ka debutuar me ekipin U21. Nuk është hera e parë që Mançini përgatit ftesa për lojtarë premtues, pasi në grumbullimin e fundit mori në skuadër talentin e Romës Nikolo Zaniolo.

46-vjeçari e nis prononcimin e tij për “DAZN”, pikërisht nga gjiganti suedez. “Zllatan është një kampion, edhe pse ka një karakter të vështirë. Egoja e tij është më e madhe se Kulla Eifel. Ai është i mirë, një djalë me zemër të mirë, ka cilësi të mëdha dhe është fitues. Pa dyshim që është një mik shumë i mirë.”

Fituesi i Topit të Artë në vitin 2000 komenton dhe për Roberto Mançinin, të cilin e kishte trajner te Interi. Trajneri momental i kombëtares italiane e ka turpëruar disa herë, por portugezi nuk mban mëri dhe i uron më të mirën. “Ai është një nga njerëzit që më ka turpëruar më shumë në karrierën time. Por, i dërgoj urimet më të mira, në këtë moment mban një pozicion të rëndësishëm në futbollin italian dhe shpresoj që kombëtarja të fitojë vendin që i takon.”

Në fund Masimo Morati dhe Havier Zaneti. Respekt dhe dashuri për të dy. “Morati ka qenë një nga personat më të rëndësishëm të botës së futbollit në karrierën time, në aspektin sportiv, por dhe atë personal. Unë e quaj baba dhe ka qenë shumë i rëndësishëm në katër vitet e mia me Interin. Zaneti? Një mik, një kapiten dhe profesionist i madh. Ka qenë e mrekullueshme të luaja me të”, përfundon një nga anësorët më të mirë të krahut të dekadës së kaluar në futbollin botëror.

Një arritje e madhe për gjigantin boshnjak, që ka marrë dhe vlerësimin e Roberto Mançinit. Trajneri i kombëtares së Italisë e njeh mirë 32-vjeçarin. Kanë punuar së bashku te Mançester Siti, rikthyen titullin në “Etihad” pas shumë vitesh dhe Xheko është një nga sulmuesit më të mirë në qarkullim për Mançinin.

“Xheko është një sulmues i madh, prej vitesh një ndër më të fortit në Europë. Shifrat janë në anën e tij: ka arritur në dopjo shifër golash në Gjermani, Angli dhe Itali. Ka dhuntinë e golit dhe është i vlefshëm dhe në vendosjen e ekipit në fushë. Ka talent në këmbë dhe idetë e tij, di të luajë topin dhe bën skuadrën të luajë. Unë e kam trajnuar në periudhën më të mirë të tij, në kulmin e pjekurisë. Fituam titullin me Sitin me Edin, i cili dha një kontribut të jashtëzakonshëm.”

“Askush nuk duhet t’i diskutojë cilësitë e tij. Si të gjithë sulmuesit, ai nuk i shënon të gjitha rastet që i paraqiten, bën gabime para portës, por nuk ka sulmues të pagabueshëm që realizon 10 gola në po kaq raste. Ai ka bërë gjëra të mëdha te Roma, arriti në gjysmëfinalet e Champions si protagonist, duke realizuar shumë gola. Kush shënon në këtë kompeticion, do të thotë se është një futbollist i veçantë dhe i rëndësishëm. Jam i sigurt që Edin do të jetë një nga golashënuesit më të mirë në Serie A dhe Champions dhe në këtë sezon”, përfundon për “Corriere dello Sport”, trajneri i të kaltërve.

Trajneri i Italisë i gëzohet efekteve pozitive, por qëndron me këmbë në tokë. Mançini ishte i pranishëm në selinë e zyrës së postës italiane, ku u bë ndarja e çmimeve të “Azzurri partner cup”. Trajneri i kombëtares u prit me duartrokitje nga të pranishmit, ndërsa foli dhe për momentin e kombëtares së tij.

“Nuk ekziston asnjë problem në qendrën e sulmit, por duhet të punojmë shumë së bashku për të përmirësuar cilësinë e lojës dhe intensitetin. Po fillojmë të marrim frytet e para, por na pret një punë e gjatë përpara. Nuk u dorëzova më parë, kështu që nuk ngazëllehem tani“, thekson trajneri i Italisë.

Loja e skuadrës “axurre” nuk la për të dëshiruar si herë e tjera, por pritjet e Sheznit e shtynë për në fund festën e katër herë kampionëve të botës. Tani Mançinit i duhet të mendojë për sfidën ndaj Portugalisë në muajin nëntor, me përfaqësuesen luzitane që po kalon një moment mjaft të mirë, pavarësisht mungesës së Kristiano Ronaldos.

Ndëkohë goli i Biragit, nuk i ka kushtuar vetëm pikën e barazimit Polonisë, që është bërë përfaqësuesja e parë që bie një ligë më poshtë në Ligën B.

SKEMA PA SULMUES – “Për të fituar ndeshjen të duhen golat dhe ne duhet të shënojmë. Një skuadër normal që ka nevojë për sulmues, por mund të bëjë dhe pa të. Sarri pothuajse bëri diçka perfekte sezonin e kaluar me Napolin, teksa luante me sulmues fals. Në Xhenoa ndaj Ukrainës bëmë 60 minuta të mira.”

NDRYSHIMET – “Ndoshta nuk do ndryshoj asgjë nga ndeshja e kaluar. Një muaj më parë lojtarët nuk ishin në kondicionin e duhur. Këtë herë kam dhe lojtarë që një muaj më parë nuk i kisha. Janë përshtatur me grupin dhe kam besim se do të bëjmë mirë.”

VERRATI – “Ai ka cilësi të mëdha dhe ne kemi nevojë shumë për Markon. Në Xhenoa bëri një ndeshje të mirë edhe pse jo në 100% e tij. Formon një dyshe të fortë me Zhorzhinjon.”

POLONIA – “Është e vërtetë që humbi në shtëpi ndeshjen e fundit, por Portugalia është skuadra më e plotësuar dhe i ka merituar fitoret. Polonia është një ekip me talent dhe ka lojtarë të mirë. Nuk do të jetë një ndeshje e lehtë, por ne do të përpiqemi të bëjmë më të mirën.”

BILANCI AKTUAL – “Personalisht mendoj se duhet të japim me tepër. Duhet pak kohë për të gjetur një grup lojtarësh që mund të bëjnë gjëra të mira dhe më pas çdo gjë për Evropian do të jetë në vijë.”

ZGJEDHJET NË FEDERATË – “Me presidencën aktuale kam marrëdhënie shumë të mira dhe kam kaluar kohë mjaft të mira. Ne duhet të përqendrohemi në fushë dhe të marrim rezultate, jo në çfarë do të ndodhë në federatë. Presidenti ka postin e tij, unë jam trajneri dhe lojtarët janë lojtarët. Gjithçka është diçka normale.”

Ndërkohë Çiro Imobile përpara disa orësh postoi në llogarinë e tij në “Instagram” një foto, ku jepeshin golat e tij të shënuar dhe sulmuesi e kishte shoqëruar me një fytyrë që vinte në dukje heshtjen. Trajneri Mançini u pyet në lidhje me këtë postim, por ishte i prerë në përgjigjen tij.

“Ruajini për veten tuaj postimet, jo për mua. Unë jam i lumtur në qoftë se vazhdon të shënojë për Lacion dhe duhet ta bëjë këtë gjë dhe për kombëtaren”, përfundoi tekniku i të kaltërve.

PROBLEME NË SULMI – “Jo, nuk ndaj këtë mendim. Lasagna do të jetë sot me ekipin dhe them se e kemi të kompletuar atë repart. A do të luajmë me një 4-2-3-1? Të jem i sinqertë nuk e di. E sigurt është se disa lojtarë do të luajnë në të dyja ndeshjet që kemi”.

VERRATI – “Kthehet pas një kohe të gjatë dhe më bëhet qejfi teksa e shoh bashkë me pjesën tjetër të skuadrës. Nuk është e njëjta gjë si në klub dhe në Kombëtare, por them se mund të nda ndihmojë me eksperiencën e tij. Porta? Do të jetë Donaruma nga minuta e parë”.

URA – “Kur arrita atje e pash se sa gjë e tmerrshme ishte, nuk është e njëjta gjë teksa sheh nga televizori dhe kur je aty. E di sa e dhimbshme është për ata fëmijë që kanë humbur ndonjërin nga prindërit. Ne u munduam që t’u rikthejmë sadopak buzëqeshjen.

KELINI – “Do ta shohim nesër nëse do të ketë mundësinë për të luajtur në të dyja ndeshjet. Gjithçka varet nga ana fizike e tij”.

NDESHJA – Uroj që t’i sjellim pak gëzim njerëzve në Xhenoa nesër. Kam besim se skuadra do të luajë mirë”.

LIDERI – Nuk është e lehtë të jesh lider në Kombëtare. Një lider zakonisht duhet të ketë eksperiencë. Lideri duhet të jesh në të gjitha drejtimet dhe unë kam besim se kam mjaft lojtarë që mund të jenë të tillë në fushë.

KONTIGJENTI – “Romanjoli, Kutrone dhe D’Ambrozio do të rikthehen në shtëpi për probleme fizike. Thirrëm Tonelin e Sampdorias dhe Piçinin e Valencias, të cilët do të bashkohen sonte me ne. Piçinit i bën mirë eksperienca jashtë Italisë, aktivizohet rregullisht dhe luan në Champions. E ndjek prej kohësh dhe do e grumbulloja herën tjetër.”

INSINJE – “Lorenco ka shumë cilësi, mund të luajë në krah, por dhe si sulmues i dytë, siç po bën në këtë moment. Mendoj që ky është roli i duhur për të dhe nuk besoj se ka probleme ‘bashkëjetese’ me lojtarë të tjerë. Nëse lojtarët kanë cilësi teknike, t’i bësh të luajën bashkë është thjesht çështje kohe. Para një muaji i kërkova të mos kthehej shumë në mbrojtje, të evitonte sprintet nga 50 metra për të mos humbur kthjelltësinë. Goli kundër Sasuolos është në stilin e tij, njësoj si Del Piero, por goli kundër Liverpulit ishte më i rëndësishëm.”

BARELA – “Po tregon që ka cilësi: është i ri, ka perspektiva të mëdha, por si të gjithë lojtarët e ri i duhet kohë për t’u përmirësuar. Gjë që ja jep kampionati.”

KRITIKAT – “Fjala durim nuk bën pjesë në fjalorin e futbollit tonë dhe jemi mësuar me kritikat. I lexoj pak gazetat, sepse janë njësoj me gazetat e 20-viteve më parë. E dinim që rruga nuk do të ishte e lehtë, por preferoj të theksoj që para një muaji humbëm kundër Kampionëve të Europës me një ekip me moshë mesatare 23 vjeç. Zhvilluam një ndeshje të bukur, pavarësisht se e humbëm ndeshjen.”

OBJEKTIVI – “Duhet të vazhdojmë përpara. Ne duam të kualifikohemi në Europian, ky është objektivi ynë. Nations League është shumë më mirë se ndeshjet miqësore. Do të jemi të lumtur nëse e mbyllim grupin në vendin e parë. Jemi në garë nëse fitojmë me Poloninë. Do të ishim të kënaqur edhe nëse e mbyllim të dytët, por nëse dalim në vendin të tretë, do të jetë një problem dhe do rrezikonim të përballeshim me skuadra të forta në shortin për eliminatoret e Europianit.”

RIKTHIMI I XHOVINKOS – “Është 31 vjeç, po luan mirë prej vitesh, ka shumë kualitet dhe po e ndjekim prej kohësh. E ftova, sepse dua ta shoh nga afër formën e tij.”

BALOTELI DHE BELOTI – “Mungesa e tyre është për zgjedhje teknike. Nuk po kalojnë një formë të shkëlqyer, me diferenca mes tyre. Janë pjesë e këtij grupi, kur të jenë gati do të kthehen. Nuk janë të vetmit lojtarë, të cilët nuk janë grumbulluar. Preferova ta lë Belotin të stërvitet i qetë, për t’u rikthyer sulmuesi që njohim.”

BOTËRORI – “Mungesa në Botëror na bëri të humbasim diçka. Kemi zgjedhur të përqendrohemi te lojtarët e rinj dhe do të na duhet dhe pak kohë. Ata meritojnë një shans, por të gjithë duhet të japin më shumë. Në kombëtare nuk mjafton kurrë të japësh 70%.”

Trajneri Roberto Mançini ka bërë largimet e para nga kombëtarja. Alesio Romanjoli, Patrik Kutrone dhe Danilo D’Ambrozio janë rikthyer në shtëpi, si pasojë e dëmtimeve të tyre. Trajneri nuk ka dashur t’i rrezikojë dhe ka zgjedhur t’i largojë nga grumbullimi i kombëtares.

Mbrojtësi Romanjoli nuk luajti në përballjen me Kievon dhe vazhdon të ketë probleme me muskujt, ndërsa sulmuesi Kutrone luajti disa minuta të dielën, por nuk është rikuperuar akoma nga dëmtimi i tij. Mançini nuk ka dashur të rrezikojë as mbrojtësin e Interit, Danilo D’Ambrozio, i cili nuk luajti përballë Spalit dhe tashmë do përgatitet i qetë për të kaluar dëmtimin.

Problem ka patur dhe Çiro Imobile. Sulmuesi i Lacios ka thyer një gisht, por ai do të jetë i pranishëm në dy sfidat e kombëtares. Mançini ka gati zëvendësuesit e treshes së larguar dhe siç citon “Gazzetta dello Sport”, trajneri do të ftojë dy mbrojtës: Lorenco Tonelin e Sampdorias dhe Kristiano Piçinin e Valencias.

Një vit më vonë arrinte të luante në finalen e Ligës së Kampioneve, ndeshje që Sampdoria e humbi përballë Barcelonës me rezultatin 1-0. Mançini shpreh emocionet e tij për këtë sfidë dhe rikujton situatën e vështirë, si pasojë e shembjes së urës.

“Është shumë e rëndësishme për ne të luajmë të mërkurën në Xhenova dhe shpresoj të vihemi në ndihmë të qytetit. Më kujtohet kur më morën për të më lajmëruar për shembjen e urës dhe më dukej diçka e pabesueshme. Federata ka dëgjuar autoritetet dhe mendoj që do të jenë dy ditë të veçanta për të lehtësuar dhimbjen e të gjithë njerëzve, të cilët janë prekur nga shembja e urës. Xhenovezët janë të fortë, sidomos në momente të vështira. Është një situatë e pabesueshme dhe shpresa jonë është që kombëtarja të sjellë pak gëzim në qytet.”

Federata Italiane e Futbollit ka marrë një iniciativë të bukur, pasi do të paguajë studimet e nëntë fëmijëve të mbetur jetimë nga shembja e urës, ndërsa Mançini zbulon dhe disa detaje të tjera nga ndeshja e së mërkurës.

“Do të shkojmë në urën Morandi, do të qëndrojmë aty ku do të na thonë për të ndihmuar ata që jetojnë në atë zonë dhe kanë mbetur pa shtëpi. Të qëndrosh dhe për pak kohë aty, besoj se do të jetë një tregues i madh. Në minutën e 43-të të ndeshjes me Ukrainën, ndeshja do të ndërpritet për 30 sekonda në kujtim të viktimave. Besoj se do të ftohen të marrin pjesë në stadium personat e zhvendosur dhe do të ketë një mbishkrim në uniformat tona. Është e rëndësishme t’i kujtojmë dhe shpresoj që të përfundojë sa më shpejt ndërtimi i urës së re”, përfundon trajneri i Italisë.

Trajneri i kombëtares italiane ka grumbulluar për herë të parë sulmuesin e Sampdorias Xhianluka Kaprari, ka rikthyer Xhovinkon, ndërsa mungon Mario Baloteli. Mançini ka grumbulluar dhe sulmuesin e Milanit Patrik Kutrone, i cili ka lënë pas dëmtimin dhe u rikthyer me një dygolësh në sfidën me Olimpiakos në Europa League.

20-vjeçari u grumbullua për herë të parë nga Di Biaxho për ndeshjet miqësore të marsit kundër Argjentinës dhe Anglisë dhe debutoi në ndeshjen përballë kombëtares latine.

Lista e lojtarëve të grumbulluar

PORTIERË: Alesio Kranjo (Kaljari), Xhanluixhi Donaruma (Milan), Matia Perin (Juventus), Salvatore Sirigu (Torino)

MBROJTËS: Françesko Açerbi (Lacio), Kristiano Biragi (Fiorentina), Leonardo Bonuçi (Juventus), Xhorxho Kielini (Juventus), Domeniko Krishito (Xhenoa), Danilo D’Ambrosio (Inter), Emerson Palmieri Dos Santos (Çelsi), Alesandro Florenci (Roma), Alesio Romanjoli (Milan)

MESFUSHORË: Nikolo Barela (Kaljari), Federiko Bernardeski (Juventus), Xhiakomo Bonaventura (Milan), Roberto Galiardini (Inter), Zhorzhinjo (Çelsi), Lorenco Pelegrini (Roma), Marko Verrati (PSG)

SULMUES: DomeniKo Berardi (Sasuolo), Xhianluka Kaprari (Sampdoria), Federiko Kieza (Fiorentina), Patrik Kutrone (Milan), Sebastian Xhiovinko (Toronto FC), Çiro Imobile (Lacio), Lorenco Insinje (Napoli), Simone Zaza (Torino)

Barazimi me Poloninë dhe humbja ndaj Portugalisë kanë bërë që italianët të regjistrojnë një statistikë të shëmtuar, pasi më datë 9 tetor “axurrët” do të mbushin një vit pa arritur një fitore në një ndeshje zyrtare.

Vlen për t’u përmendur fakti se fitorja e fundit e italianëve ka ardhur në nëntë tetor të 2017-ës, ndaj Shqipërisë, ku fituan me rezultatin 0-1 falë golit të Antonio Kandrevës në minutën e 73-të.

NOSTALGJIA E BOLONJËS – “Është një emocion i madh. Isha vetëm 16-vjeç kur debutova me Bolonjën dhe s’mund të përmbaja veten. Nesër do të kem emocione të ngjashme, pasi do debutoj si trajner i Italisë në një ndeshje zyrtare në po të njëjtin stadium”.

FORMA E SKUADRËS  – “Kampionatet sapo kanë filluar dhe disa lojtarë kanë marrë pak minuta. Rrjedhimisht një pjesë e madhe janë larg formës optimale, por e rëndësishme për mua është mentaliteti që ata do të tregojnë në fushë, të tjerat mund të rregullohen me lehtësi”.

LIGA E KOMBEVE – “Mendoj se është më mirë që të luftosh për tri pikë se sa të luash miqësore. Mendoj se mund të na shërbejë shumë mirë, pasi më duhet t’i jap minuta lojtarëve të rinj në ndeshje kuptimplota. Jam realist ka skuadra më të forta se ne, por objektivi jonë mbetet fitimi i grupit”.

FILOZOFIA E LOJËS – “Duhet të luajmë gjithmonë në sulm, sepse vetëm në atë mënyrë fitohet. Ndaj Suedisë u eliminuam pasi nuk arritëm të shënonim, tani duhet që raste që krijojmë të mos t’i shpërdorojmë”.

“Fakti që ka gjithnjë e më pak italianë që luajnë, është një problem. Ka të rinj të talentuar dhe që mund të luajnë dhe të rriten. Shpresoj të ndodhë diçka e tillë. Në këtë moment nuk ka më një futbollist si Baxhio dhe Toti, por mund të dalin lojtarë me këto cilësi. Në të kaluarën mungonin mbrojtësit, pastaj u kthyen, ndërsa në rolet e tjera kemi mangësi.”

Mançini komenton luftën për titull, afrimin e Ronaldos në Itali dhe ndalet te disa nga lojtarët e kombëtares. “Pashë Romën në Torino dhe bënë një ndeshje shumë të mirë. Kanë talente në ekip, por nevojiten më shumë italianë. Jam kurioz të shoh Milanin, ndërsa Inter është përforcuar shumë dhe i shoh si rivalët kryesorë të Juves.

Ronaldo? Unë kam shijuar një tjetër Ronaldo. Ka ardhur pak vonë në kampionatin tonë. Ai mund të vinte para 15 vitesh, kur ishte pjesë e Sportingut dhe më të mirët dëshironin Serinë A, por mendoj që CR7 do të rrisë kualitetin e kampionatit.

Baloteli mund të shkonte te Marseja, por gjëja më e rëndësishme për Marion është që të luajë rregullisht. Bernardeski është një lojtar me cilësi të jashtëzakonshme dhe e ka shprehur diçka të tillë te Fiorentina. Ka përmirësuar kualitetin dhe është rritur në aspektin e personalitetit.

Verrati nuk është në formën më të mirë fizike dhe shpresoj të rikuperojë sa më shpejt, ndërsa Zhorzhinjo është një nga mesfushorët më të mirë në Europë. Te Çelsi, ai do të rritet akoma dhe më shumë si teknikisht, por edhe fizikisht”, përfundon trajneri i kombëtares së kaltër.

“Ishte shkatërruese për ne fakti që nuk u kualifikuam në Botëror. Përveç Brazilit, nuk shoh ndonjë skuadër tjetër që është superiore kundrejt nesh. Është një zhgënjim i madh të shohësh Kupën e Botës pa Italinë, por ky është futbolli dhe nuk kemi çfarë të bëjmë.

Sa i përket së ardhmes, nuk jam dakord me mendimin e shumicës së ekspertëve. Eleminimi na ka lënduar, por kemi lojtarë të rinj dhe të talentuar. Duhet të kemi entuziazëm, sepse çfarë ndodhi këtë vit nuk duhet përsëritur më. Shpresoj që lojtarët të aktivizohen sa më shumë që të rriten dhe të jemi gati për Europianin mbas dy vitesh.

Duhet të kualifikohemi dhe të kemi një skuadër që mund të tentojë fitoren e kompeticionit, kështu që përveç lojtarëve të rinj, na duhen edhe ata ekspert. Nga grupi aktual Kieza, Pelegrini, Kaldara dhe Donaruma ose Meret janë ata që me shumë mundësi do jenë pjesë e Europianit.”

Në fund trajneri e mbyll me Balotelin. “Thonë që unë jam i vetmi trajner i cili arrin të kuptojë Marion? Për katër vite rresht jam disintoksikuar… Përtej shakasë, e kam gjetur mirë Marion. Është i disponueshëm dhe ka një dëshirë të madhe për të punuar. Siç e kam thënë gjithmonë, gjithçka varet nga koka e tij. Nëse do përshkruajë rrugën e duhur, mendoj se ai do të jetë akoma një futbollist i rëndësishëm për ekipin kombëtar.”