River

VIDEO | River Plejt nënshtron Bokën, merr fronin amerikano-jugor në Madrid

Sport Ekspres — Sun, 09 Dec 2018 22:00:31 +0000

Ndeshje e çmendur dhe e paharrueshme është zhvilluar sot në Madrid mes River Plejtit dhe Boka Zhuniors. Superklasikja e Libertadores nuk solli një fitues në kohën e rregullt, me ekipet që barazuan 1-1, ndërkohë që barazimi 2-2 i vajtjes nuk ndryshonte asgjë, sepse në Libertadores nuk vlejnë golat në transfertë, në rast barazie pas 2 ndeshjesh.

Ishte një ndeshje fantastike, me skuadrat që prodhuan emocione të mëdha deri në vëshëllimën e fundit. Triumfoi Riveri në shifrat 3-1, me dy nga golat që i shënoi në shtesën e dytë të lojës.

Copa Libertadores final…
Score tied at 1-1…
2 minutes into extra-time…

You're on a yellow card…

Don't go into a challenge like this! ?

Boca Juniors down to 10 men.#CopaLibertadores pic.twitter.com/LsInWUlth7

— Football on TNT Sports (@footballontnt) December 9, 2018

Edhe pse me 10 lojtarë gjatë gjithë shtesave, nuk u dorëzua për asnjë moment Boka, e cila në sekondat e fundit goditi shtyllën, por në aksionin pasardhës pësoi dhe golin e tretë. E gjithë lavdia shkon për skuadrën e Riverit, që nënshtron rivalët e përjetshëm.

Benedeto në fund të pjesës së parë shënoi për Bokan dhe u duk se heroi i Bokas deri në finale do të ishte sërish vendimtar.

Benedetto opens the scoring with unreal composure. What. A. Pass. From Nandez! pic.twitter.com/1kXC7cb7I8

— Escojar (@Escojar) December 9, 2018

Gjithsesi, në pjesën e dytë River e shtoi presionin dhe Lukas Prato barazoi në minutën e 68-të, duke finalizuar një aksion fantastik.

https://twitter.com/Justyooooooou/status/1071871240506363905?s=19

Në shtesë një tjetër aksion spektakolar dhe Kuintero shënoi në minutën e 109-të golin vendimtar, para se në minutën e 121-të, me portën bosh, Martinez të mbyllte gjithçka.

The flick pass to start it off. The run and then the check to make the space. Then the shot. Juan Fernando Quintero. pic.twitter.com/G5Up2uM3P3

— World Football Index (@WorldFootballi) December 9, 2018

https://twitter.com/ncarmelg/status/1071888915987091457?s=19

Festë në stadium e në fushë për River, festë edhe në Buenos Aires e gjithë Argjentinën për tifozët e “Milionerëve”, që kanë fshirë njollën e rënies në divizionin e dytë dhe tashmë janë mbretërit e qytetit, e shtetit, e kontinentit.

Ruxheri: Kur lashë Bokën për Riverin më dogjën shtëpinë!

Sport Ekspres — Wed, 05 Dec 2018 11:57:11 +0000

Oskar Ruxheri është një nga të paktët lojtarë, i cili ka luajtur edhe me Boka Zhunjors ashtu dhe me River Plejt. Ka qenë një aventurë sa e bukur aq edhe e frikshme për ish-futbollistin argjentinas, i cili në të shkuarën ka luajtur edhe pir Realin e Madridit, për një edicion.

Vetë Ruxheri tregon se atij i kanë djegur shtëpinë kur ka lënë Bokën për të shkuar te Riveri. Ka qenë një moment i tmerrshëm, pasi në shtëpi kanë qenë dhe prindërit e tij. Duket një çmenduri, por ai vetë në fund tregon se ka qenë një emocion i jashtëzakonshëm për të luajtur për të dyja këto ekipe.

“Kur vendosa që të shkoja te Riveri, tifozët e Bokës më dogjën shtëpinë. Më e keqja ishte se brenda ishin dhe prindërit e mi. Normalisht që ishte një emocion i veçantë dhe diçka fantastike që të luaja me të dyja skuadrat. Do të jetë një finale ndryshe në Madrid. Riveri luan një futboll të mirë, por Boka është më produktive dhe vështirë se gjithçka do të zgjidhet nga vetëm një gol. Do të jetë një ndeshje e hapur besoj. Të presim se çfarë do të ndodhë”, përfundon 56-vjeçari, i cili ka shënuar dhe 7 gola me kombëtaren e Argjentinës.

River-Boka në Madrid, Dani Alvesh: Gjëja më e turpshme që kam parë!

Sport Ekspres — Fri, 30 Nov 2018 22:00:27 +0000

Vendimi për ta luajtur ndeshjen e kthimit të finales së Copa Libertadores në Santiago Bernabéu në 9 dhjetor nuk është pritur aspak mirë nga dy klubet finaliste, River Plejt e Boka Zhuniors, por edhe nga shumë yje të futbollit amerikano-jugor, duke nisur nga Diego Maradona e Hoze Luis Çilavert.

Tani jep mendimin e tij dhe kritikon publikisht vendimin e Conmebol edhe ylli brazilian i PSG-së, Dani Alvesh, i cili ka postuar një video në Instagram, ku shpreh hapur zemërimin e vet për faktin që një ndeshje e Amerikës së Jugut nuk luhet dot aty.

“Për mua, të luajturit e River-Boka jashtë Amerikës së Jugut është gjëja më e turpshme që kam parë ose do shoh ndonjëherë si futbollist, si amerikano-jugor dhe si dikush që mendon se ky sport duhet përjetuar me ndjenja, me pasion dhe mbi të gjitha me respekt”, tha ish-mbrojtësi i Barcelonës.

“Gjithë ata njerëz që nuk kanë pasur asnjë lidhje me sulmin ndaj autobusit të Bokas nuk duhet të paguajnë për veprimet e pak injorantëve. Ndoshta ata kishin shansin e vetëm të shihnin një finale River-Boka dhe tashmë nuk do kenë shansin ta shohin, sepse e kanë çuar në Europë”.

Alvesh shpreson që ndeshja të mos luhet në Madrid, si shenjë respekti për tifozët e vërtetë: “Në teori nuk kam lidhje fare me këtë çështje, por si futbollist amerikano-jugor dhe si dashurues i futbollit dhe rivalitetit të shëndetshëm, mendoj se është e drejta dhe detyrimi im të shpreh opinionin tim. Uroj që të mos luhet, për të mirën e futbollit dhe në respekt të atyre që nuk kanë pasur gisht me ngjarjen”.

La cocha de s….. madre. No me hagan cabrear señores que yo soy de buenas vibras, así que hagan las cosas bien o no vamos a poner serios ehhh! #LODESULDAMERICASEVIVEALLA?

A post shared by DanialvesD2 My Twitter (@danialves) on Nov 30, 2018 at 3:52am PST

Kupa Libertadores drejt Spanjës, e konfirmon ish-presidenti i Bokës

Sport Ekspres — Thu, 29 Nov 2018 16:02:55 +0000

Ndeshja e shtyrë mes River Plejtit dhe Bokës është një hall më vete për “CONMEBOL“, që nuk po gjen gjuhën e përbashkët me të dy klubet për organizimin e ndeshjes së dytë finale të Kupës Libertadores. Dhuna e shkaktuar nga tifozët e Riverit ndaj lojtarëve të Bokës bëri që takimi i planifikuar për t’u zhvilluar ditë më parë të shtyhej. Ende nuk ka një ditë dhe një orar të saktë se kur mund të luhet ky takim, edhe pse paraprakisht është vendosur që kjo ndeshje të luhet në datat 8 ose 9 dhjetor, në orën 21:00.

Boka pretendon se Komisioni i Disiplinës duhet t’u japë fitoren në tavolinë, ndërsa në anën tjetër është skuadra e Riverit që nuk pranon që ndeshja të luhet larg Argjentinës. Hipotezat kanë qenë të shumta, pasi fillimisht u propozua që të luhej në Uruguai, por është folur dhe për në Dubai, ashtu siç ka pasur interes dhe nga Italia që kjo sfidë të luhet në Xhenoa.

Një tjetër hipotezë qarkullon në mediat ndërkombëtare, të cilat kanë publikuar lajmin se klubet kanë rënë dakord që ky takim të zhvillohet në Spanjë, më saktë në stadiumin e Madridit, “Santiago Bernabeu”. Ka qenë ish-presidenti i Bokës, Mauricio Makri, i cili e ka pohuar diçka të tillë. Shumë shpejt pritet që të vendoset përfundimisht fati i ndeshjes së dytë finale.

Libertadores: Nga zjarri në Buenos Aires, te milionat e sheikëve?

Sport Ekspres — Wed, 28 Nov 2018 19:53:58 +0000

Prej ditësh është në qendër të mendjes katrahura e Kupës Libertadores, me finalen e kthimit River-Boka që nuk u luajt për shkak të trazirave në Buenos Aires dhe sulmit ndaj autobusit të Bokas.

Ndodhi ajo që shumë njerëz e prisnin, sepse një derbi kaq i frikshëm në finalen e historisë nuk mund të kalonte pa probleme.

Tani dilema e madhe është ku do të luhet Superclasico, sepse në Argjentinë nuk bëhet fjalë, nuk ka polici të marrë përsipër duelin më të egër të të gjitha kohërave.

Lajmet e fundit flasin për një ide të çmendur: finalja të luhet në Katar!

Po bëhet serioze alternativa Doha, aty ku ne vitin 2016 u luajt edhe Superkupa e Italisë mes Milanit e Juventusit.

Khalifa International Stadium, Stadium super modern me 40 mije vende, mund të organizojë finalen në 8 ose 9 dhjetor, zgjedhje perfekte edhe për motin, edhe për televizionet.

Qatar Airways është sponsor i Conmebol dhe prej sezonit të ardhshëm do jetë sponsori kryesor i Kupës Libertadores, që do të thotë se gjithë klubet që do marrin pjesë në kompeticion et e Conmebol do të udhëtojnë me Qatar Airways. Kjo e fundit ofron mbulimin e kostove të transportit për River e Boka për në Katar.

Për të bindur dy ekipet, Katari ofron shifra absurde: 10 herë më shumë se cmimi normal për fituesin, 4 herë më shumë se shpërblimi i Conmebol për finalisti humbës!

Ekziston një problem: Qatar Airways sponsorizon Boka Zhuniors, klub të cilit i paguan 6,7 milionë dollarë në vit deri në 2023. Përveç kësaj, si mund të bëjnë 13 mijë kilometra tifozët argjentinas deri në Katar? “Ikim në hënë, më mirë”, tha i nervozuar presidenti i Riverit, D’Onofrio.

Conmebol duhet të gjejë edhe një marrëveshje me Emiratet e Bashkuara Arabe, sepse nëse Boka fiton Libertadores dhe shkon në Botërorin e Klubeve, tifozët argjentinas nuk futen dot në Emirate duke veshur fanellë të Bokas me logo Katari, për të mos rrezikuar gjobë ose burg. Politikë, si zakonisht..

“CONMEBOL” merr masa ekstreme, çon finalen e Libertadores jashtë Argjentinës

Sport Ekspres — Tue, 27 Nov 2018 16:44:09 +0000

Institucioni qeverisës i futbollit në Amerikën e Jugut, “COMEBOL”, ka njoftuar se takimi i dytë i kupës Libertadores midis River Plejt dhe Boka Xhuniors do të luhet më datë 8 ose 9 dhjetor në një stadium jashtë territorit të shtetit të Argjentinës.

Njoftimi erdhi pak minuta pas përfundimit të takimit të dy presidenteve të klubeve përkatëse në zyrat e “CONMEBOL” në Paraguai. Sipas raportimeve të fundit nga mediet argjentinase, shteti ku do të zhvillohet takimi do të jetë pikërisht Paraguai, në kryeqytetin Asunsjon.

Me siguri ky vendim do të ketë lënë të pakënaqura të dyja palët, pasi Riveri humbet avantazhin e të luajturit në stadiumin “Monumental”, ndërsa Boka humbet opsionin e të fituarit të trofeut në tavolinë.

Nota entregada por el Presidente de la CONMEBOL a los presidentes de los clubes River Plate y Boca Juniors en la reunión del martes 27 en la sede la de CONMEBOL, en Paraguay. pic.twitter.com/qNBYTRZXx6

— CONMEBOL.com (@CONMEBOL) November 27, 2018

“Turp botëror”, në Argjentinë të gjithë fajtorë

Sport Ekspres — Sun, 25 Nov 2018 11:07:50 +0000

Superclasico duhej të ishte një reklamë për futbollin argjentinas dhe atë amerikano-jugor, por edhe frika ishte e madhe se dueli me i egër i kontinentit do të degjeneronte në dhunë.

Ashtu ndodhi, sepse tifozët e Riverit sulmuan autobusin e skuadrës së Bokas dhe kaosi shpërtheu si nëpër qytet, ashtu edhe në Monumental, ku tifozët u tërbuan nga shtyrja e takimit me 24 orë.

E pëfditshmja sportive Ole ka dalë në një faqe të parë të fortë sot, duke titulluar: “Turp botëror”.

Nën akuzë të gjithë, nga policia inekzistente e tek Conmebol, që këmbëngulte të luhej dhe. Tifozët nuk bëjnë përjashtim, sepse ashtu si pak vite më parë kur lojtarët e Riverit u sulmuan me gaz lotsjellës në Bombonera, edhe tani është regjistruar një faqe e zezë në historinë e futbollit argjentinas.

Superclasico luhet sot… nëse pranon Boka!

Sport Ekspres — Sun, 25 Nov 2018 09:37:50 +0000

Në teori, sot në mbrëmje, në orën 21.00 me orën tonë, do të luhet Superclasico, River-Boka, që do të përcaktojë fituesin e Copa Libertadores, trofeu më i rëndësishëm për klube në Amerikën e Jugut, që kurrë nuk ka parë një finale të tillë.

Duhej të luhej dje, por dhuna fitoi ndaj futbollit, me tifozët e Riverit që sulmuan autobusin e Bokas dhe disa lojtarë që u dëmtuan. Shtyrje orari, debate, protesta nga Boka dhe urdhra absurde për të luajtur nga Conmebol, por në fund ndeshja u shty, mes kaosit jashtë stadiumit dhe rrëmujës në Monumental, ku prej orësh ishin ngjeshur mbi 60 mijë tifozë.

Karlos Tevez deklaroi mbrëmë se kjo ndeshje nuk duhet të luhet fare dhe sulmuesi Benedeto i nevrikosur tha: “Le t’ia japin kupën Riverit, meqë ka miq të fortë në Conmebol”.

Presidenti i Bokas Daniel Anxheliçi i ka kërkuar skuadrës dhe ka deklaruar publikisht se e do fitoren në fushë, por Tevez ka folur ndryshe dhe një pjesë e kryesisë së klubit kërkon fitore në tavolinë. Pablo Pérez është një ndër futbollistët më të dëmtuar nga sulmi i djeshëm dhe sot nuk do të jetë në dispozicion, ndërsa Boka bazohet te rregullorja, sipas së cilës klubi pritës është përgjegjës për atë që ndodh në fushë dhe jashtë stadiumit. Megjithatë, në raste të tilla ka sanksione të ndryshme, jo detyrimisht humbja në tavolinë.

Trajneri i Riverit, Gajardo, shkoi dhe takoi skuadrën e Bokas, duke thënë se pezullimi ishte logjik dhe duke shtuar me dëshpërim “shfaqja duhet të vazhdojë”. Të shohim, a do të vazhdojë sot?

VIDEO Çmenduri, ja si futen fishekzjarrët në stadium për River-Boka!

Sport Ekspres — Sun, 25 Nov 2018 00:04:27 +0000

Dhuna 1, sporti 0. Në Argjentinë duhej të luhej Superclasico, sfida e shekullit, që do të përcaktonte triumfuesin e madh në finalen e Copa Libertadores, por sfida e planifikuar për të shtunën është shtyrë me 24 orë.

Kaos, sulm ndaj autobusit të Bokas, dhunë e paparë nëpër Buenos Aires dhe rrëmujë rreth stadiumit e brenda tij.

Ndërkaq, një video ka bërë xhiron e botës, me një vajzë të vogël të filmuar ndërkohë që një femër, me siguri nëna e vet, i lidh në trup fishekzjarrë për t’i futur në stadium.

River fans using a LITTLE GIRL to pass flares to the stadium, how shameless are people man, makes me sick. pic.twitter.com/q07KZ6dZD8

— Galu ?? (@PSGalu) November 24, 2018

Në Argjentinë nuk lejohet futja e materialeve piroteknike, por kush e vret mendjen, gjejnë lloj-lloj mënyrash për t’i futur. Një prej tyre qenka edhe përdorimi i fëmijëve, sepse nuk i kontrollon kush…

? Otra lamentable imagen. Decenas de aficionados intentaron colarse. La seguridad era mínima
? @plisotto
? #CopaLibertadores
? Sigue el directo aquí: https://t.co/NnFFR4hWiJ pic.twitter.com/p76e0wtewv

— Diario AS (@diarioas) November 24, 2018

Finalja e ëndrrave, 58 vjet pritje për Superclasico që vlen më shumë se Real-Barcelona

Sport Ekspres — Fri, 09 Nov 2018 23:17:31 +0000

E shtunë, ora 21:00 në Shqipëri, ora 17:00 në Buenos Aires. Atje, në Argjentinën e largët, do të luhet një ndeshje futbolli që është shumë më tepër se 90 minuta futboll, është gjithçka, “jetë a vdekje”, krenari, lavdi e përjetshme, e drejta për të vendosur flamurin e mbretit të qytetit, Argjentinës dhe Amerikës së Jugut.

Në Estadio Alberto José Armando, që gjithkush e njeh me emrin Bombonera, do të luhet Boka Zhuniors-River Plejt, 10 kilometra i ndajnë, shumë pak në letër, por një hendek gjigant mes “Milionerëve” të Riverit dhe “klasës punëtore” të Bokas.

“Mbani frymën njerëz”, batuta e famshme e Dritan Shakohoxhës, kurrë më parë nuk ka pasur kuptim sa në këtë Superclasico, në një sfidë për histori. Edhe orari i dy finaleve, sepse kthimi do të luhet më 24 nëntor në Monumental, është vendosur aq herët vetëm e vetëm që gjithë Europa të ketë mundësi të ngulet para ekranit. Meqë ra fjala, në Shqipëri e transmeton Supersport dhe kjo është vërtet dhuratë speciale, sepse jemi ngopur me futboll europian!

Paralel me Boka-River do të luhen Xhenoa-Napoli apo Zhirona-Leganes. Jo rastësisht janë dy ndeshje kaq pa rëndësi, sepse edhe El Clasico do të humbte vlerë në një natë të tillë. Jo rastësisht, nëse në Spanjë Real-Barça quhet El Clasico, Boka-River shkon më tej, e quajnë Superclasico. Federata Argjentinase ka publikuar një video-promo, që është si një film ku përmblidhet gjithë kuptimi i kësaj sfide, që ndoshta ne në Europë nuk e konceptojmë dhe nuk e kuptojmë dot plotësisht.

#SuperFinalDeAmérica A los argentinos nos pasan cosas inexplicables. Disfrutemos de esta Superfinal de América. pic.twitter.com/yWnhKisabx

— AFA (@afa) November 8, 2018

Është hera e parë në histori që dy gjigantët e Amerikës së Jugut përballen në finalen e madhe në Libertadores, hera e parë që vëllezërit e kthyer në armiq matin forcat dhe lajnë hesapet, një herë e mirë. Nuk ka kthim pas, nuk ka hakmarrje, nuk mjaftojnë as 20 tituj kampionë rresht, nëse humbet këtë finale.

Do të jenë rreth 49.000 tifozë në Bombonera, por vetëm sepse aq vende merr stadiumi, sepse nuk do mjaftonin as 149 mijë vende.

Boka është kampione në fuqi në Argjentinë, por River fitoi bujshëm në vizitën e fundit në Bombonera. Boka ka një sulm spektakolar, aq sa mban në stol një si Karlos Tevez dhe ka shpenzuar pa fund këtë vit, por River ka një mbrojtje të hekurt dhe një trajner të talentuar si Gajardo, i cili nuk do të jetë fare në stadium, sepse është i pezulluar.

Përballja e fundit në Libertadores, në 1/8-at në vitin 2015, ishte një kaos total, me ndeshjen e kthimit në Bombonera që u ndërpre, sepse lojtarët e Riverit u sulmuan me gaz lotsjellës në tunel dhe më pas fitorja në tavolinë për Riverin ishte e paevitueshme. “Mbani frymën njerëz”, ky nuk është Clasico, është Superclasico!

Boka Zhuniors kthehet në fronin e Argjentinës

Sport Ekspres — Wed, 21 Jun 2017 14:05:05 +0000

Boka Zhuniors ka fituar titullin kampion për sezonin 2016/17 në Argjentinë, pa luajtur ende këtë mesjavë. Kjo për faktin se Banfildi ndjekës u ndal mbrëmë në fushën e San Lorencos.

Është titulli i 32-të kampion për Bokan, një ndër klubet më të mëdhenj në botë, sepse ka fituar edhe 22 tituj ndërkombëtarë.

Arkitekt i suksesit të radhës është një emër i njohur i futbollit argjentinas, Gijlermo Barros Skeloto, i cili po shkëlqen edhe si trajner. Yjet e skuadrës: Peruci e Verhini në mbrojtje, Fernando Gago e Bentankur, Pavon, Senturion dhe sidomos Benedetto në sulm, ky i fundit me 18 gola kryeson listën e shënuesve.

Një ecuri triumfuese për Bokan, gjithnjë në krye dhe me 59 pikë në 28 ndeshje, me 58 gola të shënuar e 22 të pësuar, më mirë se çdo ekip tjetër në Primera.

Si zakonisht, derbi i madh me Riverin nuk merr fund kurrë as te beteja se kush ka më shumë trofe: Boka tani kryeson 62-61 me trofe totalë në histori, por Riveri ngre zërin dhe i konsideron trofetë para vitit 1931 si të parregullt. Ishte viti kur futbolli kaloi në profesionizëm dhe futbollistët në Argjentinë nisën të paguhen, ndaj numri i trofeve filloi nga viti 1931.

Me të drejtë, në diskutimet mes tifozëve, dikush thotë: “Ah, ai titull i vitit 1925 nuk vlen. Shiko, as fanellat nuk i kanë njësoj lojtarët e së njëjtës skuadër”. Futboll pë qejf, pra, pa rregulla e norma, deri në vitin 1931, ndaj edhe River ankohet, sepse në epokën e futbollit profesionist është superior, 58-52 me trofe ndaj Bokës.

Gjithsesi, nëse llogariten vetëm trofetë ndërkombëtarë, Boka është superiore, por River nuk lëviz nga istikami: duke llogaritur ligat profesioniste dhe kupat ndërkombëtare, River kryeson 38-35.

Si i bëhet? Një kaos i vërtetë, tipik për Argjentinën, ndaj varet cilin klub keni qejf!