“Nuk e di se çfarë ndodh me skuadrën, nëse ekziston apo jo, sepse unë menjëherë pas ndeshjes së fundit me Ilirinë më 19 maj, i jam përkushtuar problemeve në familjen time. Për mua, ishte një eksperiencë për ta vlerësuar, por nuk mund të bëja më shumë me atë situatë që ishte krijuar në renditje. Duke i zhvilluar të gjitha ndeshjet jashtë fushës sonë, kaq mendoj se ishte maksimumi”, kështu deklaroi tekniku Maho për situatën e tij pas mbylljes së kampionatit.

Tashmë ai e quan të mbyllur këtë eksperiencë edhe zyrtarisht, pasi kontrata e tij është mbyllur me përfundimin e sezonit. “Unë deri në mbylljen e sezonit e kisha kontratën me Vorën, e tashmë ajo ka përfunduar. Uroj që të mos shuhet si skuadër, sepse Kategoria e Dytë nuk është ndonjë gjë e jashtëzakonshme për të. Por, kjo skuadër kërkon një organizim e menaxhim më profesional, është gjeografikisht afër Tiranës dhe ka shumë mundësi të ngrihet”.

AGRON KAJA

Për SportEkspres.com, trajneri i Vorës, Rezart Maho, deklaron se kjo është finalja e radhës për mbijetesë, një nga më të vështirat deri në fundin e kampionatit: “Skuadra e Vorës kaloi një situatë e cila pati efekte, por nuk u dorëzuam plotësisht. Edhe pse mbetemi në “ethet” e mbijetesës, jemi ringritur e në javët e fundit dhe kemi marrë me meritë rezultate pozitive. Kështu edhe me Veleçikun të shtunën, një nga finalet më të vështira deri në mbyllje të këtij kampionati”.

Ndërkohë që Maho shpreh besimin se ekipi do të hyjë në këtë sfidë me të vetmin synim, fitoren: “Nuk jemi dorëzuar në synimin tonë për mbijetesë dhe ky besim na motivon më shumë për fitore edhe me Veleçikun. Kërkojmë vazhdimësi me fitoret tona deri në mbyllje të kampionatit, dhe të shtunën me Veleçikun do të jetë për ne finalja e radhës vetëm për tri pikët”, përfundoi deklarimin e tij tekniku i Vorës.

AGRON KAJA

Për SportEkspres.com, Maho deklaron: “Me Ilirinë është ndeshje e radhës, por e rëndësishme. Në fazën e tretë për Vorën të gjitha sfidat janë të rëndësisë së një finaleje. Ekipi ka ndryshuar shumë në mentalitet dhe lojë, ndaj besoj se ndaj Ilirisë do të vazhdojmë me këtë ritëm”.

Sipas teknikut tiranas, veç seriozitetit të skuadrës dhe besimit në mbijetesë, ka edhe një tjetër motiv që te Vora e quajnë shumë të rëndësishëm. “Ne kemi mbështetje serioze nga Bashkia e Vorës, që ka garantuar një shpërblim të majmë për çdo futbollist nëse sigurohet mbijetesa në Kategorinë e Parë. Kjo na ka motivuar edhe më shumë”.

AGRON KAJA

Pesë minutat e fundit i drejtoi nga shkallët e tribunës, ndërkohë që për SportEkspres.com ai flet për ndeshjen e fituar me Burrelin. “Për Vorën kjo është një fitore shprese, jo vetëm se matematika na mban ende në ethet e mbijetesës”, thotë fillimisht Maho.

Më tej ai shton: “Ishim përgatitur që këtë sfidë ta fitonim dhe ia arritëm qëllimit. Fitorja është meritë e gjithë skuadrës. Burreli na vuri disa herë në vështirësi, por e menaxhuam mirë lojën në tërësi, si dhe rezultatin pjesën e dytë. Dalja ime me karton të kuq nuk duhet të ndodhte, por gjithsesi rëndësi ka fitorja”.

AGRON KAJA

Madje, tekniku i vorakëve thekson se specifika e kampionatit dhe matematika e tij e bëjnë të shpresojnë në objektivin e tyre.

“Ne kemi luajtur katër ndeshje të vështira dhe skpetikët na vendosin si skuadër që nuk mund të mbijetojmë. Ne shpresojmë e besojmë në objektivin tonë dhe shpresat tona nuk kanë humbur, sepse vetë specifika e matematika e kampionatit lenë të hapur çdo mundësi. Këtë javë luajmë në Shkodër me Veleçikun dhe synimi ynë janë vetëm tri pikët”, deklaroi trajneri i Vorës, Rezart Maroj.

AGRON KAJA

“Në këto tre javë përgatitje skuadra ka qenë serioze dhe i ka marrë ngarkesat e duhura për ta përballuar deri në fund sezonin. Besojmë shumë te synimi për mbijetesë dhe shpresoj se do ta nisim me këmbë të mbarë që në ndeshjen e fundjavës me Dinamon”, ishte kjo deklarata e trajnerit të Vorës, i cili në përballjen me blutë ka edhe një rastësi nga historia e karrierës së tij si futbollist.

“Në karrierë gjithçka ndodh dhe kjo rastësi kundër Dinamos është diçka e bukur, por nuk është Dinamo kur unë kam luajtur. Gjithsesi, duke qenë profesionist natyrisht që gjithçka për mua është fitorja e Vorës. Kam shumë besim se do t’ia dalim”. Vora renditet në vendin e 10-të në Grupin A të Kategorisë së Parë me 6 pikë.

AGRON KAJA

Për SportEkspres.com, trajneri i ri i Vorës, Rezart Maho, deklaroi se skuadra ende nuk është formatuar, pasi ka shumë lëvizje. “Duke u larguar disa futbollistë që mbyllën pjesën e parë të sezonit, realisht Vorës i duhen disa afrime të reja për të garantuar mbijetesën, edhe pse ka lojtarë cilësorë. Drejtuesit më kanë premtuar merkato të fuqishme dhe në vazhdim do bëjmë më të mirën për të mbijetuar”, kështu theksoi trajneri i ri i Vorës.

Lëvizjet te Vora janë të dukshme gjatë muajit janar 2019, pasi janë larguar fillimisht trajneri Gerald Çani, e më pas futbollistët Bërdufi, Nuri, Ferraj, Veliaj, Gjonaj, Mziu, Mehidri, Sula, Thaçi dhe Sejdini. Ndërsa janë afruar Klajdi Kuka, Gerald Tusha e Laurent Ismailaj, së bashku me trajnerin Rezart Maho. Në 14 javë kampionat Vora grumbulloi 6 pikë dhe renditet në vendin e 10-të të Grupit A në Kategorinë e Parë.

AGRON KAJA