TIRANA –  “I kam parë të gjitha ndeshjet e Tiranës këtë sezon. Kam një ndjesi që s’di si ta përshkruaj, herë e mirë dhe herë e keqe. Klubi është një moment të vështirë dhe këta lojtarë që janë në përbërjen e këtij klubi nuk mund të bëjnë këto gabime që po bëjnë. Është një ekip që pëson gola shumë kollaj dhe shënon me shumë vështirësi. Nuk po shënohen raste me portë bosh nga 2 – 3 metra. Brenda ka cilësi, por po dalin në pah vetëm anët negative. Kjo e ka çuar në këtë pikë që është me një këmbë në varr, do bjeri a do qëndrojë. Tirana ka bërë lojëra të mira, por në fund e kanë rrëzuar këtë me duart veta. Është si ajo puna e lopës që e mbush kovën me qumësht dhe i jep një shkelm. Jam optimist se këtë vit nuk do përsëritet 2017-ta, por kam një frikë sepse nuk është ndonjë çudi sikur të fillojnë të ndodhin aleancat. Shpresoj që jo”.

SEZONI I ARDHSHËM – “Unë e njoh Ardian Memën, kam luajtur futboll me të. Shpresoj që ta ketë në dorë ai përzgjedhjen e lojtarëve për vitin tjetër. Nuk jam ndër ata njerëz që them se Tirana ka nevojë të spastrojë me shumicë lojtarët që janë, por duhet të vijnë lojtarët e duhur. Me 2-3 ose maksimumi pesë ardhje të duhura mund të rregullohen të gjitha pikat e klubit. Nuk shpresoj që këtë verë të bëhet kjo punë e Tirana të bëhet kampion, ka një proces të gjatë siç ndodhi te Partizani, që për të dalë kampion kaluan 4 ose 5 sezone në vend të dytë e tretë e duke hequr lojtarë derisa u stabilizuan”.

“Unë jam dakord që ndeshjen ndaj Kastriotit mund të ketë ndikuar në rezultat arbitri, pasi dha një penallti, që veç penallti nuk ishte. Në ndeshjen ndaj Laçit, arbitri mu duk korrekt në lojë. Penalltinë e priti portieri i Laçit, jo arbitri. Gjithashtu, ai nuk nxori ndonjë karton të kuq. Çështja e minutave në kohën shtesë i takon interpretimit. Në fushë arbitri s’pati asnjë ndikim në rezultat, nuk ta ka fajin arbitrin se nuk shënon gol me penallti ose pëson gol në minutën e fundit””.

“Kur ka faj arbitri le ta themi që ka faj, siç ndodhi në ndeshjen ndaj Kastriotit. Tirana humbi dy pikë në mënyrë fëmijërore. Në minutat e fundit ekipi u shthur. Dakord donin një gol tjetër për të qetësi, por duhet të mendosh dhe për mbrojtjen. Një gabim në vendosje hodhi dëm mundin e 98 minutave”, tha Dabulla.

“Në këtë pikë ku ka ardhur kampionati është normale që të luftojë për mbijetesë. Ka ekip simpatik dhe e quaj normale që në kushte të tilla kur do të marrësh rezultatin, ka një farë tensioni për të arritur rezultatin dhe Kastrioti ka qenë në të drejtën e vet. Por në situate të tilla është gjyqtari që merr përsipër t’ua fusë ndeshjen në shinat e duhura. Mua m’u duk sikur gjyqtari ka gabuar tek penalltia. Ai moment i penalltisë është faull ndaj portierit nga eksperienca ime si lojtar. Plus pastaj në momentin e dytë nuk ka kontakt, por fërkim. Për mua arbitri ka qenë i predispozuar që ta japë atë penallti. Por Kastrioti mund ta fitonte ndeshjen edhe pa atë penallti, sepse është ekip simpatik”, deklaron Dabulla në emisionin “Kampionët” në Vizion Plus.

Ndërkohë ai bën me faj edhe Tiranën: “Por ka Tirana një faj të madh në këtë mes. U diskutua që takimi do luhej në Durrës, pastaj u çua në Fushë-Krujë. Tirana duhet të kishte dalë dhe të kërkonte pse u ndërrua. Por nuk e bëri, madje e pranoi trajneri Mema. Përveç kësaj, Tirana vete duhet të merrte masa dhe duhet t’i përgatiste lojtarët që të ishin më të qetë. Ngoja i pari dhe të tjerët me radhë”.

Në lidhje me tensionin në fund, Dabulla shtoi: “Pavarësisht se Ard Mema ka bërë gabim që ka hyrë në fushë në fund të ndeshjes, ai nuk është nga ata njerëz që godet dhe prek me dorë. Ama në pamje duket një person që e shtyn në mënyrë të dhunshme Ard Memën. Kjo është e papranueshme. Nuk ka të drejtë askush ta prekë me dorë trajnerin.”

PARTIZANI – Dabulla në fund foli edhe për garën për titullin kampion. “Besoj se janë pjekur kushtet që Partizani të jetë kampion. Kanë trajner të mirë dhe ekip të mirë, por edhe drejtuesit i mbështesin shumë. Nëse nuk del kampion këtë vit, nuk e di se kur mund të dalë më në vend të parë. Kanë, në mos gaboj, 27 vite që nuk dalin kampion dhe tani kanë çdo favor për ta bërë realitet këtë synim. Një barazim ose një fitore kundër Kukësit, besoj 80-90%, mund ta shpallë kampion në ndeshjen e radhës”, deklaroi ish-mbrojtësi i Tiranës.