Rene

“Katedralja duhet rindërtuar”, çfarë dhurate nga presidenti i klubit francez

Sport Ekspres — Tue, 16 Apr 2019 11:55:08 +0000

Djegia e katedrales së famshme “Notre Dame” ka sjellë trishtim dhe dhimbje në kryeqytetin francez dhe jo vetëm. Një kryevepër arkitekturore me 800 vite histori është shuar nga një zjarr masiv i rënë të hënën. Për fat të mirë, disa relikte të famshme janë shpëtuar, kullat me kambanat ikonike nuk janë prekur dhe zjarri është shuar.

Ngjarja e befasishme i kapi të gjithë të përgatitur, ndërsa po mendohet për rindërtimin e saj. François-Henri Pinault është ndjerë shumë keq nga ngjarja e ndodhur. Ai dhe babai i tij kanë vendosur të dhurojnë 100 milionë euro për të patur përsëri në këmbë Katedralen historike. Pinault është presidenti i Rene në kampionatin francez dhe zotëron markat “Gucci” e “Saint Laurent”.

“Unë dhe babai im kemi vendosur të dhurojmë 100 milionë euro për të marrë pjesë në përpjekjet që do të nevojiten për rindërtimin total të Notre Dame”, deklaron 56-vjeçari.

Përveç tij, të tjerë miliarderë kanë shprehur gatishmërinë për të kontribuar në ndërtimin e Katedrales, që priste 13 milionë vizitorë çdo vit. Grupi “LVMH Group” i drejtuar nga Bernard Arnault, i cili zotëron Louis Vuitton, Christian Dior dhe Givenchy, ka premtuar se do të dhurojë 200 milionë euro.

Rikthimi i Niang: Italia e komplikuar, në Francë kam gjetur buzëqeshjen

Sport Ekspres — Wed, 26 Sep 2018 14:29:09 +0000

Mbaje Niang u rikthye gjatë merkatos së verës në Francë, ku ka gjetur lumturinë. Sulmuesi i krahut la Torinon për t’u transferuar tek ekipi i Ren dhe tregon ndryshimin që i ka ndodhur.

“Në Itali gjithçka ishte bërë shumë e komplikuar. Kisha nevojë të gjëja buzëqeshjen dhe gëzimin për të luajtur futboll. Për këtë shkak, ndodhem këtu. Kemi shumë ambicie, përkundrejt asaj që mendojnë të tjerët për ne. Kam një ide në mendje për t’u rinisur dhe kam dashur të ndjek logjikën.”

“Te Torino kisha ulje dhe ngritje. Sezoni ishte pozitiv nga nëntori në mars, por pastaj gjërat u komplikuan. Në Itali kam luajtur dhe me Milanin dhe kam qenë gjithmonë gati, kur jam thirrur në detyrë.”

“Kur isha 16 vjeç, hyja në fushë dhe zbavitesha. Ky ishte shkaku që arrija të shkëlqeja, sepse isha i lumtur. Pastaj, pak nga pak, kundërshtarët filluan të më njihnin dhe nuk ishte më e njëjta gjë”, përfundon 24-vjeçari, i cili aktivizohet me kombëtaren e Senegalit.

Torino i plotëson dëshirën, Niang rikthehet në Francë

Sport Ekspres — Thu, 30 Aug 2018 10:16:43 +0000

Torino dhe Rene kanë arritur akordin mes tyre për kalimin e Mbaje Niang në kampionatin francez. Sulmuesi kishte shprehur dëshirën e tij për t’u rikthyer në Francë, ku ka luajtur më parë me ekipet e Kaenit dhe Montpeljes.

Senegalezi do të huazohet një vit me të drejtë blerje në fund të sezonit nga Rene. Marrëveshja u arrit mbrëmjen e djeshme mes drejtuesve të dy klubeve dhe nesër do të jetë dita e vizitave mjekësore dhe zyrtarizimit të tij.

Klubi francez fitoi konkurrencën me spanjollët e Leganes, sepse arriti të bindë Niang duke përfituar dhe nga dëshira e tij për të qenë sa më afër shtëpisë dhe vajzës së tij të vogël, e cila jeton në Marsejë. Torino nuk dëshironte të hiqte dorë nga sulmuesi, por klubi u “dorëzua” përballë insistimit të tij për t’u larguar.