Sezonin e kaluar e mbylli me Bajernin, aty ku u aktivizua vetëm 627 minuta nga Niko Kovaç. Diçka e tillë e ka acaruar jashtë mase dhe portugezi nuk dëshiron të rikthehet më në Mynih.

Kontrata që i përfundon në vitin 2021 e detyron, por Sançez mendon ndryshe. Sipas raportimeve të “Bild”, mesfushori ia ka bërë të qartë dëshirën e tij edhe shokëve të skuadrës në pushim të pjesëve në ndeshjen e fundit të kampionatit kundër Ajntrahtit.

“Falë Zotit kanë mbetur edhe 45 minuta. Po pres me padurim që të nisem me pushime. Nuk di gjë për të ardhmen, por nuk e kam ndërmend të kthehem përsëri te Bajerni.”

Sipas agjensisë së lajme “RMC”, drejtori sportiv i parisienëve po negocion prej dy ditësh për të sjellë në Francë bashkëkombësin e tij portugez Renato Sançez. Mes palëve ende nuk ka një akord, por nuk do të jetë çudi nëse me kalimin e ditëve do të gjehet rruga e përbashkët.

Sançez u ble nga Bajerni në verën e 2016-ës kur ishte vetëm 18 vjeç dhe pas dy sezonesh e gjysmë, investimi prej 30 milionë eurosh, që Bajerni bëri për ta marrë nga Benfika, nuk është justifikuar.