Skuadra kryeqytetase mundi kryesuesit me rezultatin 2 – 0. Takimin u zhbllokua nga sulmuesi shqiptar Veton Berisha, i cili gjeti rrugën e rrjetës në minutën e 65-të me një goditje të saktë me kokë.

https://www.youtube.com/watch?v=jNKkeBU0hoY

Vëllai i vogël i Valon Berishës luan prej dy vitesh te Rapidi i Vienës, ndërsa në arenën kombëtare 24-vjeccari zgjodhi të përfaqësonte Norvegjinë, një vendim që ka rezultuar zhgënjyes, pasi Berisha nuk thërritet prej gati dy vitesh nga kombëtarja nordike për shkak të konkurrencës së lartë në repartin e sulmit.

Situata e pikëve momentalisht është, Vijareali kryeson me shtatë pikë, po aq sa Rapidi i Vjenës, teksa Rejnxhërsi vjen më një pikë më pas dhe Spartaku i Moskës në fund me pesë pikë. Çdo skuadër ka shanse të kalojë më tej, që është diçka që zor se ndodh deri në ndeshjen e fundit.

Pikërisht Rejnxhërsi i Eros Grezdës, do të udhëtojë drejt Vienës për të luajtur kundër Rapidit, një sfidë që vlen kualifikimin për në fazën tjetër. Austriakët kanë shanse më shumë, pasi jo vetëm kanë avantazhin e fushës, por edhe luajnë për dy rezultate, pasi dhe një barazim do t’i kalonte më tej.

Lidhur me këtë sfidë, ekipi i Rapidit të Vienës ka menduar me të vërtetë diçka të veçantë, teksa siç thuhet nga mediat vendase, klubi ka punësuar një prift në kuadër të ndeshjes ndaj Rejnxhërsit.

Ati Kristof Pelczar, është një prift polak, i cili është i çmendur pas futbollit. Kohët e fundit gjithashtu, prifti publikoi dhe një libër të tijin, ku shprehte dashurinë e tij mbi Zotin dhe futbollin. Pelczar ka organizuar një takim të lojtarëve të Rapidit me Papën. Se sa fat do t’i sjellë kjo metodë Rapidit, kjo mbetet për t’u parë të enjten.