Ramsej

Premier Liga e pamëshirshme, ja formacioni i lojtarëve të padëshiruar

Sport Ekspres — Sun, 09 Jun 2019 20:16:48 +0000

Premier League është kampionati më i ndjekur dhe më i fortë në botë, prandaj dhe ekipet angleze duhet të tregohen të pamëshirshme nëse duan sukses. Kemi parë shpeshherë lojtarë të klasit botëror të largohen nga drejtuesit e klubit sikur të ishin lojtarë amatorë, duke mos u menduar dy herë.

Edhe këtë sezon, shumë lojtarë janë larguar nga klubet e Premier League. Plot 164 lojtarë për të qenë të saktë. Emrave si Aron Ramsej, Dani Uellbek, Daniel Starrixh, Fernando Jorente e shumë të tjerë, nuk iu është ofruar kontratë e re nga klubet e tyre, duke i larguar.

Vetëm Aron Ramsej ka dalë i fituar nga kjo “prerje kokash”, pasi ka nënshkruar kontratën e jetës me Juventusin, ku do të përfitojë 400 mijë euro në javë. Ndërsa pjesa tjetër e futbollistëve, janë pa kontratë. Ky është formacioni i 11 lojtarëve më të mirë në Premier League që janë larguar nga klubet e tyre:

Premier League XI (4-4-2)
Vorm
Lishtajner – Xhagielka – Kahill – Moreno
Valencia – Herrera – Ramsej – Uellbek
Starrixh – Jorente

Paratiçi: Ramsej është keqpërdorur, ja pozicioni i tij ideal

Sport Ekspres — Tue, 12 Feb 2019 20:13:00 +0000

Ditën e djeshme Juventusi zyrtarizoi firmën me Aron Ramsej. Uellsiani do t’i bashkohet kampionëve të Italisë në fund të sezonit nga Arsenali me kosto 0, pasi kontrata e mesfushorit me “topçinjtë” mbaron në muajin qershor.

Sigurisht në pamje të parë duket një lëvizje me shumë leverdi, por për të bindur uellsianin, Juventusit i është dashur t’i ofrojë një kontratë nga e cila do të përfitojë 450 mijë euro në javë, çka e bën atë lojtarin e dytë më të paguar në Serie A pas Kristiano Ronaldos.

Drejtori Sportiv i “Zonjës së Vjetër”, Fabio Paratiçi, ka shpjeguar në një intervistë se Ramsej është një lojtar që i ofron Juventusit diçka ndryshe. Drejtuesi i torinezëve nuk ngurron të ndajë dhe disa detaje taktike, që sigurisht do të jenë biseduar me trajnerin Alegri.

RAMSEJ – “Atë e morëm sepse është një lojtar që na ofron diçka që nuk e kemi për momentin. Një lojtar me aftësi jashtëzakonisht të mira teknike, por ka disa mangësi në fazën mbrojtëse dhe taktike. Mendoj se kjo e fundit vjen, pasi ai nuk e ka gjetur kurrë pozicionin e tij ideal. Vendi ideal për të do të ishte në një mesfushë me tre lojtarë si një ‘mezzala’ (mesfushor me tipare sulmuese që shpesh ndërron vendin me sulmuesin anësor)”, përfundoi Paratiçi.

VIDEO/ Ramsej transferohet te Juventusi, por Ronaldo e pret si… armik

Sport Ekspres — Sat, 05 Jan 2019 18:18:22 +0000

Mesfushori i Arsenalit, Aron Ramsej do të jetë lojtar i Juventusi në qershor. Sipas mediave italiane dhe atyre britanike, mesfushori 27-vjeçar ka nënshkruar një kontratë 5-vjeçare me bardhezinjtë dhe do të jetë lojtar i “Zonjës së Vjetër” për 6.5 milionë euro në sezon.

Disa kohë më parë, Ramsej është intervistuar nga “Goal.com”, ku as ai nuk i shpëtoi pyetjes se kush është lojtari më i mirë në botë, Mesi apo Ronaldo.

Në atë kohë, Ramsej zgjodhi yllin argjentinas si numrin 1 në botë, përgjigje për të cilën mund të pendohet, pasi vetëm pak pas muajsh, do të jetë në një skuadër me Kristiano Ronaldon. Të shpresojmë se “CR7” nuk e ka dëgjuar përgjigjen e mesfushorit uellsian…

“Divorci” Bajern – Hames i pashmangshëm, pasuesi gjendet në Angli

Sport Ekspres — Thu, 15 Nov 2018 16:31:13 +0000

Aventura e Hames Rodrigez te Bajerni i Mynihut do të marrë fund në verën e ardhshme. Ky është lajmi që qarkullon prej disa ditësh në mediet gjermane. Sipas “BILD”, zënkat e vazhdueshme të kolumbianit me Niko Kovaç kanë bërë që drejtuesit e klubit bavarez të shikojnë për alternativa për të zëvendësuar fantazistin.

Sot e përditshmja britanike “The Independent” ka nxjerrë lajmin e bujshëm se kampionët e Gjermanisë janë vënë në ndjekje të mesfushorit të Arsenalit, Eron Ramsej. Kontrata e uellsianit me “topçinjtë” mbaron në fund të këtij sezoni, pra transferimi i tij në Gjermani nuk do t’i kushtojë asnjë arkës së klubit bavarez.

Me shumë gjasa palët do të zyrtarizojnë një para-kontratë në muajin janar, ndërkohë që 27-vjeçari e ka bërë të qartë se aventura e tij te Arsenali do të mbyllet përfundimisht në fund të këtij sezoni, duke shuar shpresat e çdo tifozi të londinezëve.