Armand Rada lë Interin, zbret në Serinë C

Sport Ekspres — Fri, 13 Jul 2018 17:01:08 +0000

Mesfushori i Shqipërisë U-21, Armand Rada, është ndarë përfundimisht nga Interi, pasi klubi zikaltër ia ka shitur Renates, në Serinë C italiane.

Kampion me të rinjtë e Interit, Rada kërkon të luajë rregullisht dhe Renate ka shfaqur besim të madh tek ai, duke e blerë nga Interi.

Mesfushori 19-vjeçar shkoi tek Interi para një viti, duke luajtur 13 ndeshje në kampionat e 5 në Youth League, ku dha dy asiste.

“FC Inter komunikon se i ka shitur në mënyrë përfundimtare mesfushorin Armand Rada Renates”, shkruhet në njoftimin e publikuar në faqen zyrtare të Interit.

Renate sezonin e shkuar luajti në play-off për ngjitje në Serinë B, por nuk ia doli mbanë të ngjitej.

Rada është bërë pjesë e Shqipërisë U-21 këtë vit, por nuk ka debutuar ende, edhe pse trajneri i Shqipërisë U-19, Erjon Bogdani, ka folur shumë mirë për të.

Rada: Provojmë kualifikimin, ëndrra mbetet kombëtarja e madhe

Sport Ekspres — Thu, 05 Oct 2017 08:49:36 +0000

Luan me të rinjtë e Interit dhe shihet si një nga lojtarët më me perspektivë. Armand Rada, pas ndeshjes u shpreh i bindur se skuadra e tij mund të arrijë të triumfojë në dy ndeshjet e mbetura. 18-vjeçari po ashtu tregoi dhe synimin e tij të madh, që mbetet përfaqësuesja e parë e Shqipërisë.

“Ukrainën e njihnim që është kundërshtar shumë i fortë. Ndeshja shkoi mirë, ne e vumë në vështirësi, por gabuam shumë raste dhe futbolli kështu e ka. Një gabim na kushtoi dhe u ndëshkuam, mund të kishte ndodhur dhe e kundërta, por kështu e ka futbolli. Duhet edhe pak fat, por paraqitja ishte shumë e mirë dhe kjo ka rëndësi. Kemi shumë shpresa për ndeshjet e ardhshme. Ukraina ishte nivel të lartë në çdo repart, edhe pse dhamë gjithçka. Do ta tentojmë deri në fund, besojmë te fitoret ndaj Norvegjisë e Malit të Zi. Natyrisht, fitoret vlejnë gjithnjë, por synimi ynë është përgatitja për U-21, për të arritur më pas Kombëtaren e parë. Nëse luajmë si sot, fitoret do të vijnë. Mesfusha e U-21 është shumë cilësore, por unë synoj të luaj aty dhe të kap Kombëtaren e madhe, si çdo futbollist”, përfundoi Rada.