Pasioni i ri i Xhekson Martinez, kolumbiani nis karrierën muzikore!

Sport Ekspres — Tue, 18 Sep 2018 19:12:28 +0000

Xhekson Martinez ishte një sulmues shumë i mirë te Porto, ku u aktivizua për tre sezone dhe shënoi 67 gola. Kolumbiani u transferua tek Atletiko Madrid në vitin 2015, por ai arriti të shënonte vetëm dy gola, për t’u larguar një vit më vonë drejt Kinës. Miliona të fituara, por pothuajse asgjë në fushë.

Vetëm katër gola në dy sezone dhe në fundin e merkatos së verës, Martinez u rikthye në Portugali për të nënshkruar me ekipin e Portimonenses.

31-vjeçari kërkon të rikthehet në formën e tij të mirë, por është gati dhe për të nisur një karrierë të re jashtë futbollit. Xhekson ka një pasion të veçantë për muzikën dhe ka publikuar diskun e tij të parë muzikor.

“No Temere” (Nuk kam frikë) quhet titulli i albumit të sulmuesit kolumbian, që përmban këngë me motive fetare. Martinez është një kristian i devotshëm dhe ai ka zgjedhur këtë lloj stili muzike për të kënduar.

“Tri vite në terr”, Xhekson Martinez rikthehet aty ku shkëlqeu

Sport Ekspres — Thu, 13 Sep 2018 07:53:58 +0000

Tri vite më parë, Xhekson Martinez, ishte objektiv për një pjesë të madhe të klubeve në Europë. Paraqitjet me Porton në kampionat dhe Europë kishin bindur shumë trajnerë.

Kolumbiani u transferua tek Atletiko Madrid në verën e vitit 2015. Por, në katër muajt që pasuan, Martinez nuk shfaqi qoftë për një moment atë që tregoi te Porto për tri vite më radhë. Në shkurt bëri gati valixhet për në Kinë, ku për një far kohe ishte futbollisti i pestë më i paguar në planet.

Aventura në shtetin aziati filloi mirë, por pas pak muajsh gjithçka u kthye përmbys. Zënkat me drejtuesit e klubit bënë që të përfundonte tek ekipi rezervë. Në dy vite e gjysmë në Kinë, Martinez luajti vetëm 10 herë, ku shënoi katër gola.

Sot kolumbiani firmosi për një me klubin modest të Portimonenses në Portugali. Me rikthimin në kampionatin ku mori emër, sulmuesi 31-vjeçar synon të ringjallë karrierën e tij për ato pak vite që i kanë ngelur.