Poli Iasi

VIDEO | E gjitha për një pikë, Qaka asist Platinisë

Sport Ekspres — Fri, 30 Nov 2018 17:40:23 +0000

Poli Iasi nuk arriti të merrte më shumë se një pikë nga përballja shtëpiake me Sepsin. Ekipi i Kamer Qakës barazoi 1-1, ndërkohë që mesfushori i kombëtares dhuroi asistin e golit vendas.

Miqtë kaluan në avantazh në minutën e 9, ndërsa Iasi barazoi shifrat në minutën e 21. Qaka krosoi një top të bukur nga krahu i djathtë dhe afrikani Platini shënoi me kokë.

Kjo pikë e marrë e ngjit Poli Iasin në kuotën e 18 pikëve, duke u renditur në vendin e 11 në kampionatin rumun.

DOKUMENTET | Kaos rreth Qakës, transferimi i tij ka shumë “hije”

Sport Ekspres — Thu, 29 Nov 2018 17:43:04 +0000

Transferimi i Kamer Qakës te FCSB nuk ishte i lehtë. Gjatë verës kishte shumë fjalë, ndërkohë që bisedimet thuhet se nuk shkuan shumë mirë. Gjithsesi në fund gjithçka u mbyll me sukses. Por së fundmi ka dalë një problem që vë në akuzë klubin e Poli Iashi.

Gazeta Sporturilor ka zbuluar dokumente, ku thuhet se një kompani me qendër në Moldavi ka mbajtur 25% të vlerës së kartonit të Qakës. Prosport Invest SRL është kompania me të cilën Poli Iashi nënshkroi më 10 nëntor të vitit 2017 dhe marrëveshja mes palëve ishte e tillë:

“Kompania në fjalë do të japë shërbime konsulence që klubi të kishte marrëdhënie të qëndrueshme kontraktuale”. Thënë shkurt, do tentohej që Kamer Qaka të qëndronte. Por gjithashtu kjo kompani do të ndihmonte edhe në gjetjen e klubeve të gatshme për ta blerë mesfushorin.

Faqja e parë e marrëveshjes mes Poli Iashi dhe kompanisë moldave

KLAUZOLA – Një nga pikat e marrëveshjes mes Poli Iashi dhe Prosport Invest SRL thotë se kompania do të përfitojë 25% të shumës nëse Qaka do të shitet nga FCSB. Diccka e tillë është e ndaluar me rregullore të FIFA-s.

Palët e treta, në këtë rast kompania moldave, janë të ndaluara në marrëveshje dhe kemi të bëjmë me shkelje të rregullave të FIFA-s për transferimet. Kjo mund të shoqërohet me gjobë për Poli Iashi dhe vlera mund të shkojë deri në 500 mijë euro. Klube si Benfika, Sporting, Rajo Valjekano, Selta Vigo dhe Al Arabi e kanë pësuar nga FIFA për shkak se kanë ndjekur të njëjtën praktikë, duke përfshirë palë të treta në marrëveshjet për transferimet e lojtarëve.

Faqja e dytë e marrëveshjes mes Poli Iashi dhe kompanisë moldave

“Bomba” nga Rumania: Crvena Zvezda hedh sytë nga Kamer Qaka!

Sport Ekspres — Thu, 25 Oct 2018 13:43:56 +0000

Te Crvena Zvezda duket se kanë lajthitur, pasi më 30 tetor kanë planifikuar të vëzhgojnë nga afër Kamer Qakën, mesfushorin e kombëtares shqiptare. Futbollisti 23-vjeçar është pjesë e Poli Iashi në Rumani, por kartonin e tij e zotëron Steaua e Bukureshtit (FCSB).

Sipas asaj që raporton “Fanatic.ro”, në ndeshjen e kupës mes Poli Iashit dhe Vitorul, përfaqësues të klubit serb do të jenë në stadium për ta vëzhguar. Por ka edhe lajme të tjera: Real Saragoza i rikthehet interesimit për Qakën. Por tani duket edhe më e vështirë, duke pasur parasysh se ata nuk e blenë në verë dhe FCSB ka paguar 400 mijë euro Qakën dhe kartoni i tij është i shtrenjtë për spanjollët që garojnë në Segunda Division.

PROBLEMI – I pari ka të bëjë me faktin që Kamer Qaka është shqiptar dhe Crvena Zvezda do të kishte probleme për tifozët nëse do ta bënte diçka të tillë. Madje është e habitshme se si nuk kanë reaguar deri më tani. Me siguri lajmi në Serbi nuk ka mbërritur ende.

Një tjetër pikë që vlen për t’u përmendur është fakti që Qaka nuk mund të transferohet në asnjë ekip tjetër (përveçse te FCSB) në janar. Rregullorja e FIFA-s është ë qartë: brenda një sezoni një futbollist nuk mund të aktivizohet në më shumë se dy ekipe.