Kritika për Sarrin: Si mund të përfundojë në stol një lojtar që shënon tripletë?

Sport Ekspres — Sat, 27 Oct 2018 11:49:00 +0000

Mauricio Sarri është një trajner shumë i mirë dhe i veçantë. Italiani i Çelsit preferon një futboll të bukur, argëtues dhe sulmues, por çdokush ka dhe pikat e tij të dobëta. Defekti i Sarrit është rotacioni, trajneri nuk e preferon dhe zgjedh t’i besojë një formacioni. Kjo gjë shton vështirësitë e lojtarëve të tjerë, të cilët e kanë të vështirë të hyjnë direkt në mekanizmat e lojës së tij. Madje, edhe kur arrijnë ta bëjnë një gjë të tillë, nuk mjafton dhe ndeshjen tjetër mund të përfundojnë përsëri në stol, ose tribunë.

Një gjë e tillë po i ndodh dhe mesfushorit të talentuar, Ruben Loftus Çik. 21-vjeçari shënoi një tripletë të enjten në Europa League, por ai mund t’i rikthehet stolit në ndeshjen e kampionatit kundër Bërnleit. Piter Krauç ka kritikuar trajnerin e “Bluve të Londrës” për një fakt të tillë dhe thumbon dhe Zhorzhinjon, i cili u ble nga Napoli dhe është kthyer në një titullar të përhershëm të ekipit.

Piter Krauç

“Ka luajtur vetëm 33 minuta në kampionat këtë sezon dhe është shumë demoralizuese për lojtarin të mos jetë as në pankinë kundër Bërnleit, pavarësisht se shënoi një tripletë fantastike në Europa League kundër Bate Borisov. Si mund të funksionojë një gjë e tillë? Problemi është që Loftus Çik është një lojtar i ri, i cili vjen nga sektori i të rinjve dhe nga ky fakt nuk merret në konsideratë. Nëse do të ishte një blerje, që ka ardhur te Çelsi për 35 milionë sterlina, sigurisht që do të luante më shumë…”, flet Krauç për “Daily Mail”.

Një tjetër kritikë vjen për Mauricio Sarrin. Glen Hodëll, ish-trajneri i Anglisë, këshillon Loftus Çik të largohet sa më shpejt nga ekipi, nëse vazhdon të mos aktivizohet. “Fakti që Sarri e la gjithë ndeshjen në lojë lojtarin kundër Bate Borisovit, do të thotë që ai nuk është në planet e trajnerit për ndeshjen e kampionatit. Kam frikë për karrierën e djaloshit. Nëse nuk i vjen shpejt mundësia që meriton, bën mirë të përgatisë valixhet dhe të largohet. Ai është një talent dhe besoj se do të ishte një gjë e mirë për të dhe kombëtaren të largohej për të luajtur në ndonjë ekip tjetër”, përfundon Hodëll.

Hodëll gjatë periudhës që drejtonte Anglinë

Krauç dhe kriza e golit, si e shpëtoi babai dhe… birrat

Sport Ekspres — Sun, 09 Sep 2018 12:59:22 +0000

Piter Krauç ka zbuluar një detaj të veçantë të karrierës së tij. Sulmuesi vuan gjithmonë kur i mungon goli dhe nuk mund të ndodhte ndryshe me sulmuesin anglez. Gjatë vitit 2005, ai aktivizohej me Southemptonin, ku shënoi 12 gola, por pa arritur të evitojë rënien e ekipit nga Premier Liga, mbas plot 27 vitesh.

Gjatë asaj verë, Krauç u transferua te Liverpuli dhe vuajti shumë për të gjetur golin me “The Reds”. Plot 1229 minuta pa shijuar emocionet dhe adrenalinën e golit dhe Krauç falënderon të atin, i cili ishte personi që e ndihmoi të kalonte periudhën e vështirë.

“Ishte një periudhë shumë e vështirë për mua. Më duhej të hiqja dorë nga blerja e gazetave dhe shikimit të televizorit. Pas ndeshjeve ulesha dhe pija birra me babain tim. Ai më ndihmoi shumë. Dilnim për të pirë, qeshnim dhe harronim gjithçka. Pastaj, të dielën ose të hënën më kujtohej: ‘Mos, nuk kam shënuar ende’”, përfundon 37-vjeçari i Stok Sitit për “The Sun”.