Pique

Para dhe njohje, Pike ngjit klubin e tij një kategori më lart

Sport Ekspres — Mon, 29 Jul 2019 13:56:54 +0000

Zherard Pike bleu disa muaj më parë klubin e tij të parë. “FC Andorra” një klub amator që militonte në nivelin e katërt të piramidës së futbollit spanjoll. Futbollisti i njohur ka përdorur njohjet dhe resurset financiare për të kaluar skuadrën e tij nga divizioni i katërt në të tretin.

FC Andorra është përzgjedhur nga federata spanjolle si skuadra që do të zëvendësojë klubin e falimentuar SD Reus në Grupin B të Segunda Division (divizioni i tretë).

Federata ka argumentuar këtë vendim me faktin se skuadra e Pike plotësonte më së miri kriteret e vendosura, por arsyeja kryesore ishte fakti që klubi pagoi një shumë prej 450 mijë eurosh për të siguruar ngjitjen e menjëhershme në këtë kategori, procedurë kjo e gjitha ligjore.

Pike synon ta ngjisë ekipin e tij në Segunda Division dhe për këtë ka mbledhur në ekip një grup lojtarësh cilësorë dhe me eksperiencë.

Pujol: As Ramos e as Van Dijk, ju tregoj mbrojtësin më të mirë!

Sport Ekspres — Sun, 14 Apr 2019 11:39:31 +0000

Ish-kapiteni i Barçelonës Karles Pujol ka bërë një bilanc mbi temën se kush janë mbrojtësit më të mirë në qarkullim. Nuk ka surpriza nga spanjolli pasi më të mirin zgjedh shokun e tij te Barçelona dhe Spanja, Zherard Pike.

Kjo dyshe ishte protagoniste në triumfin e kupës se Botës në vitin 2010. Gjithashtu edhe te Barça, ku bashkë fituan dy Champions dhe katër La Liga. Pujol në intervisten për “Marca” e vendos Pike më lart se Van Dijk, Ramos apo De Ligt.

“Zherard Pike, pa dyshim. Po, është më lart se Ramos. Van Dijk ka shpërthyer dhe De Ligt po del në skenë, por nuk mendoj se duhet të jenë në nivelin e një mbrojtësi, që ka fituar aq shumë sa Pike”, u shpreh filimisht Pujol.

Më pas gazetarët e shtynë e atë të bënte një krahasim mes Pike dhe vetes së tij.

“Po është më i mirë se un. Ai është më i miri në Botë. Është çelësi i Barçelonës në gjithçka. Bën një punë fenomenale për ekipin. Është një lider i madh”, përfundoi ish-mbrojtësi.

“Seks këtë muaj?”, Pike tërbon Realin me një batutë

Sport Ekspres — Fri, 29 Mar 2019 09:04:08 +0000

“Lufta” mes Barcelonës e Realit të Madridit i kalon kufijtë e futbollit, sepse beteja për pavarësinë e Katalunjës kalon edhe nga dueli në futboll. Një ndër personazhet më aktivë kur bëhet fjalë për politikën dhe Katalunjën e pavarur është Zherard Pike, i cili prej vitesh i thotë hapur ato që mendon dhe shpesh ka tërbuar pjesën tjetër të Spanjës, atë që është kundër pavarësisë së Katalunjës.

Ditën e enjte Pike ishte i ftuar në një talk-show në Madrid, “La Resistencia” drejtuar nga komediani David Bronkano, në televizionin Movistar+. Në fakt, ishte vetë Pike që shkroi në Twitter para pak ditësh: “A mund të vetëftohem në programin tuaj? Gjithsesi, po kaloj sa për t’i dhënë dorën Davidit”.

Batuta dhe humor pa fund, me Pike që nuk e humbi rastin për të lëshuar një thumb ndaj Real Madridit, kur u pyet sa herë kishte bërë seks në muajin e fundit. Përgjigja e mbrojtësit ishte e pabesueshme: “A quhet Bernabeu?”, duke ju referuar fitoreve të Barcelonës pak javë më parë në Madrid.

Bronkano e pyeti Pikenë edhe në lidhje me pasurinë e tij, “Sa para ke në llogarinë bankare?”. Pique dha një tjeëtër përgjigje plot humor: “Pas kaq vitesh në futboll, kam në bankë më shumë para se buxheti i Espanyol këtë vit. Espanyol e ka 57 milionë euro buxhetin? Atëherë unë kam shumë më tepër se aq”.

VIDEO | Vajekano nuk është problem, Barcelona marshon e qetë drejt titullit

Sport Ekspres — Sat, 09 Mar 2019 19:23:04 +0000

Barcelona ka bërë detyrën në shtëpi dhe ka triumfuar ndaj Rajo Vajekanos me shifrat 3-1. Një sfidë, të cilët katalanasit e përmbysën, pasi miqtë kaluan të parët në avantazh në pjesën e parë. Gjithsesi, Pike, Mesi dhe Suarez, i dhanë tri pikët ekipit të Valverdes.

Për sa i përket ndeshjes, Barcelona nuk e nisi mirë, pasi në minutën e 24-të e pa veten në disavantazh pas golin të Raul De Tomas, i cili shënoi me një të djathtë perfeke, duke mos lënë asnjë shans për Ter Shtegen.

Gjashtë minuta përpara fundit të pjesës së parë, katalanasit reaguan me Zherard Pikë, i cili në zhvillimet e një goditje dënimi, shënoi me kokë.

Në pjesën e dytë, ekipi blaugrana nuk la më asgjë në dorë të rastësisë por shënoi vetëm pas 5 minutave. Semedo arriti të fitojë një 11-metërsh, të cilin e shndërroi në gol i zakonshmi Leo Mesi.

Më pas, në minutën e 82-të ishte Luis Suarez, i cili mendoi të mbyllte gjithçka, ku shënoi një gol alla-Barça. Super kombinim në zonë me Rakitiç, solli golin e tretë për Barcelonën, e cila marshon e qetë drejt titullit, pasi diferenca me Atletikon është plot shtatë pikë.

La Liga
Barcelona – Rajo Vajekano 3-1
Shënues: Pike 39′, Mesi 50′(pen.), Suarez 82′ / De Tomas 24′

Mesi pronar klubi? Vjen ftesa nga miku i ngushtë

Sport Ekspres — Mon, 07 Jan 2019 17:44:02 +0000

Lionel Mesi mund të bëhet së shpejti bashkëpronar i një ekipi futbolli. Bëhet fjalë për klubin e FC Andorrës, skuadër jo që u ble pak javë më parë një kompani në pronësi të mbrojtësit të Barcelonës, Zherad Pike.

E përditshmja katalanase “SPORT”, në një shkrim të ditës së sotme ka bërë të ditur se Pike po përpiqet ta bindë “pleshtin” për t’iu bashkuar si ortak në këtë aventurë të re.

FC Andorra ndodhet në territorin e shtetit të Andorrës, por militon prej dekadash në piramidën e futbollit spanjoll, më konkretisht në kategorinë e pestë. Me investimet e yllit të Barcelonës, pritet që ekipi i vogël të kapë pas pak vitesh nivelet më të larta të futbollit spanjoll, dhe pse jo ndoshta një ditë do ta shohim përballë vetë Barcelonës.

Pike “projekton” planin e së ardhmes, gati të blejë një skuadër futbolli

Sport Ekspres — Thu, 13 Dec 2018 10:14:36 +0000

Zherard Pike është një prej lojtarëve më të mirë në botë, por duket se lojtari i skuadrës së Barcelonës ka menduar për jetën e tij pas futbollit të luajtur. Sipas mediave lokale në Spanjë, mbrojtësi ka një ide për të blerë një ekip futbolli.

Bëhet fjalë për skuadrën e FC Andorras. Lojtari pritet që të jetë pjesë e projektit të ri të klubit, duke marrë përsip0ër të gjitha borxhet dhe shpenzimet, për ta ngjitur sa më lart të jetë e mundur skuadrën në fjalë. vetë Pike ka treguar pak kohë më parë se dëshira e tij është që të investojë në sport.

Skuadra e cila do të marrë Pike është themeluar në vitin 1942 dhe aktualisht luan në Grupin 2 të Katalonjës Rajonale të Primera, ku ka grumbulluar 17 pikë në 11 ndeshje. Në të shkuarën ata kanë marrë pjesë edhe në Kupën e Mbretit. Në vitin 1994 ata u shpallën kampion të “Copa Catalunya”, duke eliminuar në gjysmëfinale Barcelonën.

Vizionari Pike: Së shpejti do blej një klub, dua të krijoj një kampionat të ri

Sport Ekspres — Fri, 23 Nov 2018 19:44:34 +0000

Zherard Pike nuk është vetëm një futbollist i suksesshëm, por edhe një biznesmen tejet i zoti, të paktën deri më tani. Katalanasi është një ndër aksionerët më të mëdhenj të një kompanie televizive që për momentin operon në sportin e tenisit.

Lobimi i kompanisë së Pikesë bariu që Kupa Dejvis të ndryshonte formatin e saj pas disa dekadash. Në një intervistë me medien franceze “L’Equipe”, 31-vjeçarin shprehu dëshirën që në të ardhmen t’i shtrinte investimet e tij dhe në industrinë e futbollit.

“Jam duke punuar për dy projekte të ndryshme. I pari është që të blej një klub, fatkeqësisht nuk mund t’u jap më shumë detaje mbi këtë gjë. Projekti i dytë është shumë më ambicioz. Dua të krijoj një kampionat të ri, ose të ndryshoj rrënjësisht një ndër kampionatet ekzistuese”, tha mbrojtësi i Barcelonës.

Një dashuri e pavdekshme: Pike rinovon me Barcelonën me klauzolë absurde

Sport Ekspres — Thu, 18 Jan 2018 10:54:09 +0000

Mbrojtësi i Barcelonës Zherard Pike ka rinovuar zyrtarisht, duke firmosur deri në vitin 2022, njofton Barcelona.

Qendërmbrojtësi i kombëtares spanjolle do të qëndrojë deri në moshën 35-vjeçare te Barcelona, me këtë kontratë, ndërsa për prishjen e kontratës klauzola është 500 milionë euro.

Pike është rritur te Barça, duke u bashkuar me klubin blaugrana që në vitin 1997, në moshën 10-vjeçare.

Years go by but the dream remains the same for @3gerardpique!
? #Pique2022
?? pic.twitter.com/65qzKIzkEZ

— FC Barcelona (@FCBarcelona) January 18, 2018

Ai shkoi te Mançester Junajtid në vitin 2004 dhe fitoi titullin dhe Champions League në 2007-08, para se të kthehej në Camp Nou në sezonin pasues.

Tashmë 30 vjeç, Pike ka fituar gjithçka në Katalunjë, përfshirë 6 tituj kampionë Spanje, 5 Kupa Mbreti, 3 Champions League dhe 3 Botërorë Klubesh.

Pas Lionel Mesit (700 milionë euro), Pike bëhet lojtari me klauzolën më të lartë për prishje kontrate te Barcelona.

Piké: Pas 9 vitesh, inferior ndaj Realit

Sport Ekspres — Thu, 17 Aug 2017 12:06:52 +0000

Zherard Piké e ka zakon që i thotë gjërat troç, edhe kur shkojnë keq, ndaj edhe është një personazh mjat interesant për mediat, sidomos kur bëhet fjalë për luftën mediatike me armikun e urryer, Real Madridin.

Megjithatë, pas dy humbjeve në Superkupë, ku edhe vetë luajti shumë dobët, Piké nuk merret më me thumbime, por i jep hakun Realit: “Për herë të parë në 9 vite ndihem inferior ndaj Realit. Kjo do të thotë që kemi shumë punë për të bërë”.

Qendërmbrojtësi kërkon përforcime, hapur: “Duhen bërë ndryshime, edhe kur fiton. Kur humbet, zbret një shkallë, por më pas duhet të kuptosh ku ke gabuar dhe të gjesh zgjidhjen e problemit. Nuk është një moment i mirë për ne, si skuadër e si klub, por duhet të qëndrojmë të bashkuar. Nuk nkemi probleme të brendshme, nuk janë të vërteta ato që shkruhen. Nëse vijnë Kutinjo e Dembele, do të përmirësojnë skuadrën teknikisht”.

Zbulimi i Pikesë: Gënjeva, e dinim me kohë që Nejmari do ikte

Sport Ekspres — Sun, 13 Aug 2017 08:48:38 +0000

Pak ditë para transferimit të bujshëm të Nejmarit nga Barcelona te PSG, Zherard Piké postoi një foto në Twitter, ku shfaqej me Nejmarin dhe shkruante: “Do qëndrojë”.

Tani Piké zbulon një prapaskenë në lidhje me Nejmarin: “Nuk ndihem i mashtruar, e dija që do largohej. Ditën që postova foton në Twitter, e dija që Nejmari nuk do qëndronte, edhe pse shkrova të kundërtën. Na e tha në martesën e Mesit. Për atë postim Nejmari u zemërua, por u sqaruam”.

Po pse Piké e postoi atë mesazh? “Nuk pendohem që shkruajta ashtu dhe them edhe që Nejmari nuk më zhgënjeu. Doja të përdorja rrjetet sociale për të ndihmuar klubin, edhe pse e dija vendimin e tij”.

Gjithsesi, Piké eviton polemikat: “Di që ka pasur arsyet e tij. Mund të jenë ekonomike, ose dëshira për t’u bërë më i miri në botë. Me ne ka qenë fantastik, nuk duhet gjykuar për zgjedhjen e tij. Në fund të fundit, la shumë pará në arkat e klubit”.

Pike zbulon të ardhmen e Nejmarit

Sport Ekspres — Mon, 24 Jul 2017 10:19:15 +0000

Zherard Pike është një ndër futbollistët më aktivë në rrjetet sociale dhe shpesh postimet e tij bëjnë bujë, duke shkaktuar jo pak debate.

Sot Pike ka postuar në Twitter një foto me Nejmarin, ku ka vendosur një mesazh të shkurtër: “Ai qëndron”.

Se queda. pic.twitter.com/RtPHUr9iTH

— Gerard Piqué (@3gerardpique) July 23, 2017

Nejmar është në qendër të vëmendjes për shkak të spekulimeve për transferim te PSG, që është gati të paguajë klauzolën prej 222 milionë eurosh për prishjen e kontratës, ndërsa vetë sulmuesit i ofron rreth 27 milionë në vit.

Vetë Nejmari nuk flet, por Pike është një personazh shumë i rëndësishëm te Barcelona dhe kjo dalje e tij në Twitter mund të jetë një sinjal i qartë se Nejmar nuk do të largohet.