Pierr Emerik-Obamejang

Junajtid pa frena, “rrëmben” yllin e rivalëve të përjetshëm!

Sport Ekspres — Sat, 29 Jun 2019 20:35:55 +0000

Mançester Junajtid më në fund kanë shpërthyer në merkato dhe duket se nuk do kenë të ndalur. Pas ardhjes së Daniel Xhejms dhe Van Bisaka, Solskjaer synon një blerje që do trondiste gjithë themelet e futbollit ishullor. Pier Emerik Obamejang është objektivi i radhës në merkaton e “Djajve të Kuq”.

30-vjeçari është një nga më të mirët në Premier Ligë. Sezonin e fundit ai arriti të shënonte plot 31 gola në të gjitha garat me Arsenalin. Kështu, Solskjaer mendon se nuk ka kandidat më të mirë se Obamejang për të zëvendësuar Romelo Lukakun. Belgu është shprehur se dëshiron të largohet nga Junajtid.

Interi pritet të jetë destinacioni i tij i ardhshëm. Nga shitja e Lukakut, në “Old Trafford” do të vinte një thes me para, që Solskjaer do i ketë të gjitha në dispozicion për të joshur Arsenalin dhe lojtarin. Topçinjtë nga ana e tyre e konsiderojnë shumë të rëndësishëm nga Gaboni dhe nuk e konsiderojnë shitjen.

Mungesa e fondeve për të sjellë përforcime, do të ishte e vetmja arsye që klubi londinez mund të heqë dorë nga Obamejang. Në këtë çështje, dëshira e lojtarit pritet të jetë tepër e rëndësishme. Ditët në vijim do të zbardhin gjithçka.

Vuajtjet e një futbolliisti, Obamejeng rrëfen rrugën drejt majës

Sport Ekspres — Wed, 19 Jun 2019 15:41:04 +0000

Të bëhesh futbollist mund të themi se është një ndër gjërat më të vështira. Duhet të bësh një jetë më valixhe në krahë, duke udhëtuar nga një qytet në tjetrin, apo të stërvitesh në shi e në breshër për të mos humbur formën fizike. Të largon nga familja dhe bën që ta sakrifikosh shkollën për të arritur ëndrrën e jetës. Dikush nuk arrin ta mbajë gjithë këtë presion dhe e ndërpret “udhëtimin” e tij të vështirë.
Pier Emerik Obamejang është nga ata, që nuk janë dorëzuar, por e kanë finalizuar me sukses gjithë atë djersë, stres e mund që i ka dhuruar jeta në përmbushjen e ëndrrës së tij, “Të bëhet një futbollist”. Nëse dikush thotë se futbollistët paguhen më shumë se ç’duhet, nuk e kupton aspak atë se ç’kanë hequr për t’ja arritur kësaj dite.

Obamejang në një intervistë tregon se ishte gati të hiqte dorë nga dashuria e tij më e madhe, futbolli. Vështirësitë e mëdha, problemet në gjurin e tij dhe jeta aspak e ngjashme me fëmijët e tjerë e mundën admirimin e tij për këtë lojë. Babai i tij këmbënguli në arritjen e asaj ëndrre dhe e shtyri të ketë më shumë kurajo dhe guxim.

“Kur isha fëmijë lëviznim shumë. Kam luajtur futboll për Nice, Laval dhe Rouen. Ishte mjaft e vështirë të lëvizje aq shumë, por tani ja ka vlejtur. Kisha probleme me gjunjët dhe nuk mund të luaja në maksimumin tim. Ishte një moment kur mu largua dashuria për futbollin.”

”Nuk kisha një klub, nuk kisha shkollë, isha vetëm në shtëpi, duke u munduar të mendoj pozitivisht. Ideja se nuk i dihet se ç’ndodh në jetë më shtyri të stërvitesha më shumë. Pas gjashtë muajsh stërvitje babai më siguroi të filloja karrierën time si profesionist të Bastia”, u shpreh 29-vjeçari.

DENIS LALA

Obamejang: Jemi njerëz, në finale shkohet vetëm kështu!

Sport Ekspres — Thu, 02 May 2019 21:16:28 +0000

Pierr Emerik-Obamejang shënoi një gol me shumë vlera për Arsenalin, që mposhti Valencian në gjysmëfinalen e parë në Europa League. Londinezët duan ta fitojnë këtë trofe dhe të sigurojnë pjesëmarrjen në Champions. Pas ndeshjes, për BT Sport sulmuesi i ka bërë një analizë paraqitjes së skuadrës së tij.

“Uroj që goli i tretë të jetë i rëndësishëm. Nuk e nisëm mirë, por reaguam më pas dhe mendoj se luajtëm mirë. Ishim pak nervozë në fillim, pasi kemi humbur në tre ndeshjet e fundit. Kjo është normale mendoj, fundja jemi njerëz. Gjithsesi më pas reaguam shumë mirë”, u shpreh fillimisht Obamejang.

Më tej ai theksoi se i kanë shanset ta fitojnë trofeun. Gjithsesi si fillim duhet arritur kualifikimi në finale: “Kemi shumë cilësi në këtë grup dhe mund të shkojmë në finale. E dimë që ndeshja tjetër do të jetë e vështirë, por nëse paraqitemi si sot, mendoj se do të kualifikohemi”.

“Është objektivi ynë të shkojmë në finale dhe të fitojmë këtë trofe. Është një mundësi për t’u kualifikuar në Champions dhe ne e dimë këtë. U ndalën në gjysmëfinale vjet, por kemi mësuar nga gabimet e sezonit të shkuar dhe shpresojmë që këtë herë nuk duam të bëjmë të njëjtën gjë. Do japim gjithçka për t’u kualifikuar në Champions League”, përfundoi sulmuesi deklaratën e tij.