Sipas “Sportitalia”, fati i teknikut italian është vendosur tashmë shkarkimi i tij nga Roma është vetëm çështje orësh. Kandidati numër një për të zëvendësuar Di Françeskon është trajneri portugez Paulo Souza.

Sipas së njëjtës medie, një opsion për Romën është dhe Antonio Konte, por ish-trajneri i Juventus vjen me një “faturë” të lartë, që cilësohet e papërballueshme nga presidenti amerikan i verdhekuqve, Xhejms Palota.

Gjithsesi, mbrëmjen e kaluar u luajt sfida midis Juventusit dhe Romës, ku bardhezinjtë fituan minimalisht 1-0. Përpara takimit, Souza postoi në llogarinë e tij në “Instagram” një foto, që ndoshta tashmë është penduar që e ka hedhur. Portugezi postoi një foto në kohën kur luante me fanellën e Juventusit dhe kishte përballë Romën.

Vetëm kaq mjaftoi për të nisur akuzat dhe pakënaqësitë drejt tij, nga ana e tifozëve verdhekuq, të cilët duket se nuk i ka pëlqyer postimi i bërë nga ai që po përfliet se do të jetë trajneri i ardhshëm i tyre.

Tifozët romanistë kanë bërë komente të tipit “më mirë në Europa Ligë, se sa një juventin në stol“, apo komente të tipit “Di Françesko jemi me ty“. Në rast se Souza vihet si numri një i pankinës së Romës, duket se do ta ketë mjaft të vështirë fillimin e punës.

Verdhekuqtë renditën në vendin e nëntë me 16 pikë dhe kjo është nisja më e keqe e periudhës së presidentit Xhejms Palota. Ky i fundit është i zhgënjyer dhe acaruar me formën e skuadrës dhe po mendon të ndryshojë trajnerin.

Di Françeskos po i rreshket situata nga dora dhe duket sikur ambienti roman nuk beson më tek ai. Zgjidhja? Paulo Souza. Ish-trajneri i Fiorentinës e mbylli eksperiencën në futbollin kinez me ekipin e Tianxhin Kuanxhian dhe është në pritje të ofertave.

Portugezi shihet si pasuesi i denjë i Di Françeskos dhe është i preferuari i presidentit Palota. Ai do e mirëpriste një ofertë për të marrë drejtimin e Romës, gjithmonë nëse djemtë e Di Françeskos nuk rikthehen te rezultatet pozitive, duke nisur që nga sfida e ditës së mërkurë në Champions përballë CSKA së Moskës në Rusi.

Largimi i Aksel Vitsel drejt Dortmundit, forma jo e mirë e Aleksandro Patos dhe problemet e sulmuesit Antoni Modeste me klubin detyruan ish-trajnerin e Fiorentinës të largohej nga drejtimi i klubit kinez.

Lamtumira erdhi pas humbjes 0-3 në shtëpi përballë Çongqing Lifan, ndërsa klubi lajmëroi largimin e Paulo Souzës dhe theksoi se vendimi ishte marrë me anë të një “akordi të përbashkët”.

Emri i Souzës shihet afër stolit të Romës, por ekipi roman ka reaguar, duke fituar ndeshjen me Frozinonen, derbin me Lacion dhe fitorja e thellë 5-0 në Champions përballë Viktoria Pilzen.

Një gjë e tillë ka qetësuar situatën për momentin dhe Di Françesko do të vazhdojë të jetë trajner i Romës. Megjithatë, Paulo Souza do të jetë në pritje të një oferte për t’u rikthyer të trajnojë një ekip europian.