Patrik Vieira

“Edhe perënditë kanë idhuj”, Ibra zbulon të vetin

Sport Ekspres — Mon, 12 Nov 2018 13:38:11 +0000

Edhe perënditë kanë idhuj dhe zemër. Zllatan Ibrahimoviç është një nga futbollistët më të mëdhenj të historisë së futbollit dhe një person, i cili nuk është se e preferon shumë fjalën modesti dhe përulësi, përkundrazi. Për një personazh si Ibra ndjen adhurim, ose urrejtje.

Por, dhe gjiganti suedez ka idhullin e tij, të cilin e ka zbuluar në një prononcim për “El Mundo Deportivo”. Deklaratë ndryshe nga të tjerat, Ibra zbret në tokë, “kthehet” në human dhe thur elozhe për… Patrik Vieira. Të dy kanë luajtur bashkë te Juventusi dhe Interi dhe mesfushori francez është një nga të paktët njerëz, të cilët kanë ndikuar në karrierën dhe stilin e 37-vjeçarit.

“Gjithmonë më kushtonte vëmendje mua. Kur mendoja se ajo çfarë po bëja ishte e mjaftueshme, Vieira më shpjegonte dhe bënte të kuptoja të kundërtën. Patrik më ka mësuar se është gjithmonë e nevojshme të japësh më shumë. Ai ishte një futbollist fenomenal, i cili do të mbetet në historinë e futbollit. Jam i lumtur që kam njohur Vieiranë (futbollistin), si dhe Patrikun (njeriun). Ai ka influencuar shumë që të jepja gjithmonë 120% në ndeshje”, përfundon Zllatan Ibrahimoviç.

Baloteli jashtë formacionit, Vieira shpjegon arsyet

Sport Ekspres — Sun, 30 Sep 2018 10:22:30 +0000

Nica nuk ia doli të përballonte PSG dhe u mposht në shtëpi me rezultatin 0-3. Fitorja e tetë radhazi në kampionat për djemtë e Tuhel, të cilët kryesojnë me 9 pikë më shumë se St. Etieni i vendit të dytë.

Mario Baloteli nuk ishte i pranishëm në formacionin titullar në këtë ndeshje dhe u aktivizua në pjesën e dytë. Trajneri i Nicës, Patrik Vieira, shpjegon zgjedhjen e bërë dhe komenton humbjen përballë PSG.

“Balotelin nuk mund ta qortoj, por është mbrapa me përgatitjet dhe i duhet të punojë për të gjetur gjendjen më të mirë fizike. Është e vështirë të flasësh, kur humbet 3-0. Nuk dua të fajësoj lojtarët e mi. Ne bëmë shumë mirë në 15 minutat e para, ndërsa goli i tyre i komplikoi gjërat. Më pas u lamë shumë hapësira, duke lënë Rabiot të lirë”, përfundon trajneri i Nicës për “L’Equipe”.

Ndryshimi i Balotelit dhe mbrojtja e Viera: Mbetet “gjahu” i preferuar i shtypit italian!

Sport Ekspres — Sun, 23 Sep 2018 09:01:58 +0000

Mario Baloteli po tenton të lejë pas krahëve kritikat e shumta dhe mënyra e vetme për ta bërë diçka të tillë është puna. Sulmuesi ka filluar të stërvitet fort, madje është i pari që arrin në stërvitjen e ekipit, duke filluar që nga ora 7:30 e mëngjesit.

Trajneri Vieira është i kënaqur me të dhe ka mbrojtur 28-vjeçarin nga kritikat e shumta të shtypit italian. Marrëdhënia mes tyre është e mirë, siç sulmuesi italian pohoi para disa kohësh “Vieira ndikoi me 80% në zgjedhjen time për të qëndruar te Nica”.

Ata kanë luajtur së bashku tek Inter, më vonë te Mançester Siti, ndërsa tashmë janë bashkë te Nica, ku francezi mban rolin e trajnerit dhe Baloteli është pika e referimit në sulm e ekipit.

“Mario është kritikuar ashpër në Itali, por është gjithmonë e njëjta histori: kur ekipi pëson humbje, nevojitet një fajtor dhe Mario është fajtori ideal për shtypin italian. Kam biseduar me të dhe e di që është i fortë mendërisht për të menaxhuar këtë situatë, por mediat janë treguar me të vërtetë të padrejta me të. Nuk është akoma në 100%, por ndihet mirë”, komenton trajneri 42-vjeçar.