Paredes

PSG me sytë nga Rusia, gati çeku 35 milionë eurosh

Sport Ekspres — Fri, 28 Dec 2018 16:51:47 +0000

Te klubi i PSG-së po nxitohen për të përforcuar repartin e mesfushën. Në janar nga kampionët e Francës pritet të largohen Rabio dhe Diarra, ndërsa trajneri Tomas Tuhel e di mjaft mirë se për të përmbushur objektivin madhor të fitimit të Champions-it, do të duhet më shumë cilësi.

Para pak javësh dolën lajmet se parisienët kishin arritur marrëveshjen me Ajaksin për talentin Freki De Jong, por mesa duket, fokusi i sheikëve është spostuar drejt Rusisë, në qytetin e Shën Petersburgut.

Shënjestra e radhës e PSG-së është mesfushori argjentinas Leandro Paredez, i cili prej dy vitesh luan me skuadrën e Zenitit, pasi këta të fundit e blenë kartonin e tij nga skuadra e Romës për 23 milionë euro.

Leandro Paredes, 24 vjeç, mesfushor

Sipas asaj që raportojnë mediet argjentinase, klubi parisien ka ofruar 35 milionë euro për kartonin e 24-vjeçarit, por drejtuesit e skuadrës ruse nuk pranojnë të bëjnë ulje dhe çmimi që i kanë vënë lojtarit të tyre është 43 milionë euro.

Roma i shet të gjithë, ikën edhe Paredes

Sport Ekspres — Sat, 01 Jul 2017 17:43:24 +0000

Shitja e qendërmbrojtësit Rydiger te Çelsi ka zemëruar pa masë tifozerinë e Romës, aq sa sot në qytet e rrjete sociale mbizotëronte parulla: “Po sot, cilin do shisni?”.

U tha, u bë: Paredes është transferuar zyrtarisht te Zeniti për 23 milionë euro, plus 4 milionë në bonuse.

Lajmin e kanë zyrtarizuar të dy klubet dhe Roma shet një mesfushor shumë të talentuar, që kërkohej nga shumë klube.

Tani pyetja është: kush e ka radhën? Megjithatë, drejtor Monçi duhet ta ketë një plan madhor.

Roma vetëm shet, Zeniti i merr dy lojtarë

Sport Ekspres — Sat, 24 Jun 2017 10:51:20 +0000

Mungon vetëm zyrtarizimi, por ai është çështje ditësh: pas Mohamed Salah te Liverpuli, Roma ka shitur orët e fundit edhe dy lojtarë të rëndësishëm, Manolas e Paredes.

Klubi që i ka blerë është Zeniti, që ka mbyllur marrëveshjen për 45 milionë euro, plus disa milionë euro bonuse.

Mbrojtësi grek është një nga yjet e sezonit të fundit në Serinë A dhe kërkohej nga shumë klube, ndërsa Paredes konsiderohet një mesfushor me të ardhme të shkëlqyer, ndaj kishte oferta pa fund prej verës së shkuar.

Tani të dy janë bindur nga milionat e Zenitit dhe nga fakti se aty trajner është Roberto Mançini.

Roma arkëton rreth 100 milionë në pak ditë, me shitjet e Salah dhe dy lojtarëve të mësipërm, por duhet të blejë urgjentisht, sepse tifozeria verdhekuqe është në prag revolte.