Bashkë me Masarën dhe Boban po kryhet një punë e madhe, por pa u nxituar. Maldini sqaron idetë e tij, analizon afrimet e Kruniç dhe Teo Hernandez dhe e mbyll me Luka Modriç.

KRUNIÇ-TEO – “Me Raden kemi biseduar që sezonin e kaluar, më pas intensifikuam negociatat me Empolin dhe agjentin e tij. Mesi i fushës ishte objektivi ynë, pasi e dinim se do largoheshin katër lojtarë. Kruniç ka dy vite eksperiencë në Serie A me Empolin dhe mund të përmirësohet akoma edhe më shumë.

Sa i përket Teos, ai përmbush profilin e lojtarit që kërkojmë. Është shumë funksional dhe jemi ‘blinduar’ në krahun e majtë. Nuk ishte e vështirë për ta bindur dhe tani është gati të nisë një cikël të ri me ne. Është një ndër interpretuesit më të mirë të rolit të mbrojtësit të majtë dhe duam ta bëjmë ndër tre anësorët më të mirë në botë.”

MODRIÇ – “Po negociojmë me Benaser, është e vërtetë. Jemi pak mbrapa, por merkato mbyllet me datë 2 shtator, kështu që kemi kohë. Po monitorojmë futbollistë në gjendje për të udhëhequr, ndihmuar dhe përmirësuar lojtarët e rinj. Modriç? Luka do të ishte perfekt, por nuk kemi patur asnjë kontakt me të.

MERKATO – “Po punojmë për të vënë në dispozicion të trajnerit grupin përfundimtar të lojtarëve sa më shpejt të jetë e mundur. Nuk duhet të nxitojmë për të mbyllur operacionet. Rëndësi ka të tregohemi të kujdesshëm dhe të mos gabojmë. Të rinjtë e fortë kushtojnë shumë. Lojtarët e pjekur më pak, por duhet të plotësojnë disa karakteristika.”

Bëhet fjalë për Dani Sebajos, i cili ka pasur shumë pak hapësira te Reali i Madridit. Mesfushori është vëzhguar nga Paolo Maldini në sfidën Itali-Spanjë, e vlefshme për kampionatin europian të U-21.

Sebajos bëri një ndeshje të mirë, ku pavarësisht humbjes së iberikëve, shënoi një gol të mrekullueshëm. Maldini duket se është bindur plotësisht dhe tashmë raportohet se është nisur drejt Madridit për nisjen e  bisedimeve.

Diçka të tillë e konfirmon “Gazzetta dello Sport”, që raporton se dëshira e lojtarit për t’u larguar nga Reali mund të ndikojë. “Los Blancos” kërkojnë një shifër të majme për ta lënë të lirë, por mund të gjendet dhe një marrëveshje në bazë të huazimit me të drejtë blerje.

Me Paolo Maldinin ka luajtur e fituar në një ekip dhe e njeh mirë se çfarë mund të bëjë. Holandezi vë theksin te paratë dhe goditjet e duhura në merkato. Periudha e vështirë duhet hedhur pas dhe Gulit ka besim të plotë që drejtuesit e rinj do arrijnë ta rikthejnë Milanin aty ku i takon.

“Milani ka vuajtur vitet e fundit dhe nuk arriti të rikthehet në Champions Ligë. Besoj te puna e Paolos dhe shpresoj që të bëjnë mirë sezonin e ardhshëm. Nevojiten para, pasi falë tyre mund të blesh lojtarë cilësorë. I kanë shpenzuar edhe vitet e kaluara, por nuk kanë arritur të marrin lojtarët e nevojshëm për Milanin”, përfundon Rud Gulit.

Nuk mungojnë elozhet për dyshen e njohur. Gazidis e di mirë se ata të tre i pret një rrugëtim i gjatë dhe i lodhshëm, por me dy persona si Maldini dhe Boban në krah, gjithçka bëhet më e thjeshtë dhe suksesi nuk do të mungojë

“Paolo përfaqëson kualitet dhe vlera, që janë baza e Milanit. Jam i lumtur që do ta kemi në drejtim të pjesës tonë sportive. Së bashku do të synojmë ndërtimin e një klubi modern, i formuar nga profesionistë të nivelit të lartë. Do të jetë një rrugëtim që do ta përshkojmë së bashku, për një projekt impenjativ, por bindës. Jam i sigurt që Paolo do transmetojë eksperiencën e madhe, vizionin e tij dhe lidershipin që e karakterizon. Paolo është pjesë integrale e Milanit dhe e di rrugën që duhet ndjekur për të mbërritur te suksesi. Do të jetë një pikë referimi për të gjithë.”

“Jam shumë i emocionuar për t’i uruar mirëseardhjen Bobanit në shtëpinë e tij, në Milanin tonë. Për karakteristikat që e ka, eksperiencën dhe aftësitë që zotëron, jam i sigurt që do të kontribuojë për rritjen e sektorit tonë sportiv dhe do të garantojë një vlerë të shtuar në marrëdhëniet e klubit tonë me institucionet kryesore të futbollit. Kam në krah dy menaxherë më kualitet dhe kompetenca të padiskutueshme, të aftë për të përçuar vizionin tonë dhe për të bërë zgjedhjet më të përshtatshme për ndërtimin e një Milani, gjithnjë e më tepër konkurrues, gjithnjë e më tepër të suksesshëm“, përfundon afrikano-jugori.

Ashtu siç pritej, Paolo Maldini do të jetë drejtori teknik i ri i Milanit, ndërsa risia është Zvonimir Boban. Kroati ka lënë postin e zëvendës-sekretarit të FIFA-s për t’u kthyer në ekipin me të cilin u aktivizua për dhjetë sezone. Boban do të jetë shef klubi dhe koordinator i pjesë sportive brenda klubit.

Dy nga “blerjet” më të mira të Milanit në vitet e fundit. Askush nuk e njeh më mirë se Maldini dhe Boban historinë dhe atë çfarë përfaqëson ky klub legjendar. Dikur luftonin dhe fitonin së bashku në fushën e blertë, ndërsa tani do të bëjnë të pamundurën për të rikthyer Milanin aty ku i takon.

Paolo Maldini nuk dëshiron të ndalet dhe synon të tjera afrime. Emrat e rinj që kanë dalë në skenë janë Xhordan Veretu i Fiorentinës dhe Mario Rui i Napolit. Rivaliteti për mesfushorin francez është i madh.

Kuqezinjtë kanë bërë ofertën e parë në drejtim të klubit viola. 16 milionë euro për kartonin e 26-vjeçarin, një shumë që do të refuzohet nga Fiorentina, e cila bëri të njëjtën gjë me 27 milionë eurot e ofruara nga Napoli.

Milani e di mirë, por të njëjtën shumë i ofroi edhe Sasuolos për kartonin e Sensit. Më shumë një sondazh i Maldinit për të kuptuar më shumë qëllimet e Fiorentinës dhe dëshirën e Veretu.

Interesim ka edhe për Mario Ruin. Raportet me Napolin janë pozitive. Ançeloti ka ndikimin e vet në këtë aspekt dhe presidenti De Laurentis është gati të diskutojë për mbrojtësin portugez.

28-vjeçari aktivizohet në linjën e majtë dhe trajneri Xhampaolo ka dhënë konfirmimin e tij për realizimin e kësaj blerje.

Ish-kapitenit legjendar iu propozua roli i drejtorit teknik, i lënë bosh nga braziliani. Maldini ka pranuar dhe Milani i ri do të lindë pikërisht nga ai. 50-vjeçari do të lërë detyrën e drejtorit të zhvillimit strategjik të sektorit sportiv dhe ka pranuar ofertën e Gazidis.

Paolo pranoi të bëhet drejtori teknik i klubit ku kaloi gjithë karrierën e tij, pasi u bind për buxhetin që do të ketë në dispozicion dhe lirinë e plotë në vendimmarrje. Ai do të bëjë merkaton, ndërsa trajnerin e ri e ka zgjedhur.

Ai do të jetë Marko Xhampaolo, i cili do të largohet nga Sampdoria pas tre vitesh. Një kontratë tre-vjeçare me 2 milionë euro rrogë sezonale është gati për trajnerin e ri. Xhampaolo e njeh mirë kampionatin italian, di të punojë me të rinjtë dhe preferon një futboll zbavitës dhe ofensiv.

Milani është gati për t’u rikthyer. Me Maldinin drejtor teknik dhe Xhampaolon në stol. Tani nis edhe pjesa më e vështirë. Rinovimi me lojtarët aktualë, Suso mbi të gjithë, dhe blerjet e reja që do të përforcojnë ekipin.

Nëse nuk sigurohet Championsi, Milani mund të pësojë një revolucion. Më saktë një largim të gjithë pjesës historike: Gatuzo, Leonardo dhe Maldini. Trajneri nuk e ka të sigurt qëndrimin, madje mediet italiane janë të bindura që kalabrezi po kalon ditët e fundit në Milanelo.

Të njëjtën rrugë mund të zgjedhë edhe dyshja drejtuese. Leonardo ia ka bërë të qartë presidentit Skaroni faktin që është ai përgjegjës për merkaton. Nëse çdo vendim i tij duhet konfirmuar nga Gazidis, braziliani do të ishte gati të largohet.

Në dyshim është edhe e ardhmja e ish-kapitenit legjendar. Largimi i Leonardos mund të ndikojë keq te Maldini, ndërsa është rritur shumë pushteti i Gazidis në klub. Afrikano-jugori është njeriu i besuar i fondit Elliot, ndërsa emra si Okampos dhe Monçi lakohen pranë Milanit.

Drejtuesit e “djallit” kanë patur një takim kokë më kokë me Gatuzon dhe Bakajokon. Trajneri dhe mesfushori kanë sqaruar gjithçka mes tyre dhe francezi i është bashkuar stërvitjes.

Ai mund të zbresë në fushë të shtunën kundër Fiorentinës, duke llogaritur dhe mungesat e mëdha në këtë repart. Lukas Paketa u ndëshkua me të kuqe, ndërsa Bilja dhe Çalhanoglu janë të dëmtuar. Aktivizimi i Bakajokos do të varet edhe nga rendimenti i tij gjatë javës.

E ardhmja e tij pritet të jetë larg Milanelos. Kuqezinjtë nuk kanë ndërmend të paguajnë 30 milionë euro për kartonin e tij dhe 24-vjeçari do të rikthehet te Çelsi. Një lajm i mirë për trajnerin Sarri. Anglezëve ju është bllokuar merkato dhe trajneri italian do të kishte një opsion më shumë për mesin e fushës.

Dueli i së shtunës përballë ekipit të Inzagit do të jetë një finale për objektivin Champions. Më pas Bakajoko. Mesfushori i ka surprizuar të gjithë dhe Milani është gati të paguajë 35 milionë euro për kartonin e tij. Në fund roli si drejtues dhe numri tre. Dinastia Maldini nuk shuhet kurrë. Paolo flet për numrin e tërhequr nga Milani dhe ka një dëshirë për dy djemtë e tij.

UEFA– “Komunikata nuk është një surprizë, kemi një dialog të përjavshëm me UEFA-n. Po diskutohet për vitet përpara se të vinte fondi Elliot në krye të klubit. Edhe sezonin e kaluar duhet të përjashtoheshim nga kupat europiane, por më pas ndërhyri TAS-i. Kemi shumë armë në dispozicion dhe jemi gati për gjithçka. Ne si klub kërkojmë që të mos ketë një përballje të ashpër dhe pa dialog. FPF (fair-play financiar) ka zeruar borxhet në futbollin europian, por të mos i lejosh një klubi të shëndoshë dhe pa borxhe ndërhyrjen në merkato është jo kushtetuese. UEFA e ka kuptuar se Milani është një klub i shëndetshëm, me njerëz kompetentë dhe që dëshiron të rikthehet në nivele të larta.”

TRAJNERI – “Jemi të kënaqur me Gatuzon. Rino nuk ka qenë kurrë në dyshim. Jemi të bindur se është trajneri i duhur dhe nuk na ka shkuar kurrë ndërmend për ta shkarkuar. Kemi një raport shumë direkt me të, ashtu si me gjithë lojtarët. Trajneri di gjithçka, di mendimin tonë për të dhe punën e tij. Ai ka edhe dy vite kontratë me ne. Në fillim të sezonit nuk i është vënë kusht kualifikimi në Champions, ndërsa tani jemi afër. Unë dhe Leonardo e përsërisim shpesh që sa bukur do të ishte të ktheheshim te fitimi i trofeve me Rinon në pankinë.”

LACIO – “Ata janë në formë, kanë kualitete në ekip dhe, ashtu si ne, luajnë shansin e tyre për t’u kualifikuar në Champions. Këtë sezon kemi patur shumë ulje-ngritje dhe kemi hasur probleme me ekipet që na ndjekin. Ndeshja me Juven na dha shumë siguri. Jemi mirë fizikisht dhe psikologjikisht. Kemi marrë vetëm një pikë në katër ndeshjet e fundit dhe tani duam të rikthehemi te rezultatet pozitive.”

BAKAJOKO – “Ai ka treguar një karakter të madh. Nuk e nisi mirë dhe i duhej të përshtatej në një realitet ndryshe. Jemi super të kënaqur me të dhe do provojmë ta blejmë, por gjithçka do të varet nga FPF dhe renditja jonë në kampionat. Kualifikimi në Champions do të ndikojë në merkato dhe entuziazmin e grupit të lojtarëve. Do të ishte diçka e shpifur nëse nuk arrijmë për të shtatin vit rresht që të mos marrim pjesë në kompeticionin e më të fortëve.”

JETA E RE SI DREJTUES – “Telefonata e Leonardos ishte një fat për mua. Ai ka patur eksperienca të rëndësishme si drejtues. Për mua është thelbësore të kem në krah një person, i cili i njeh në perfeksion strukturat e një klubi. Numri 3 te një nga djemtë e mi? Do të ishte diçka shumë e bukur. Do të thoshte se ata e kanë realizuar ëndrrën e tyre për t’u bërë futbollistë. Nuk jam i sigurt nëse do të zgjidhnin numrin 3… Shpresoj vetëm që të jenë të lumtur.”

Milani udhëhiqtë në pjesën e parë me shifrat 3-0, por nuk arriti ta shfrytëzonte avantazhin. Paolo Maldini, kapiten në atë kohë dhe drejtor i kuqezinjve momentalisht, është kthyer pas në kohë dhe ka folur për finalen dramatike.

Sipas legjendës italiane, finalja e Stambollit do të mbetet zhgënjimi më i madh i karrierës së tij. “Kam kaluar disa zhgënjime, ku kam humbur tre finale, të cilat kanë qenë shumë të dhimbshme, sidomos ajo ndaj Liverpulit në Stamboll, pasi mendova se ishte e fundit për mua. Kisha shënuar gol dhe do të ishte fantastike nëse do e fitonim atë finale. Gjithsesi, mundësia na u dha përsëri dy vite më vonë.”

50-vjeçari, e çoi akoma më tej analizën e tij, teksa tha se futbolli është i çuditshëm, pasi në atë ndeshje, Milani i tij dominoi për 110 minuta nga 120 minuta që u luajt. “Kur dëgjoj Liverpulin, mendoj për finalen e parë, ku ishim në avantazh 3-0 pas 40 minutash lojë. Dominuam në 110 minuta, nga 120 që u luajtën. Finalen e kam parë përsëri pas një viti dhe jam mahnitur nga dominimi që kemi pasur në atë ndeshje. Futbolli është i çuditshëm.”
Gjithsesi, dy vite më vonë, Milani arriti të merrte hak, ku u përball përsëri në finalen e Champions ndaj Liverpulit, duke triumfuar me shifrat 2-1 dhe kapiten Maldini ishte ai që ngriti trofeun “veshgjatë” në qiell.

“Në finalen e Athinës në vitin 2007, mora përsipër një rrezik të madh, pasi kisha një dëmtim në gju, por njëkohësisht e dija që ishte shansi im i fundit për të fituar një Champions dhe bëra gjithçka për të qenë në atë ndeshje. Presioni para asaj finaleje ishte i tëri mbi ne. Nëse mundeshim sërish nga Liverpuli, ishte fundi. Më pas u operova në Belgjikë, ku pas anestezisë, çdo herë që zgjohesha, përpiqesha të kujtohesha nëse kishim fituar apo jo në finale. Atë ndeshje e shoh si fundin e karrierës time, sepse edhe pse vitet e ardhshme ishin intensivë, nuk ishin aq të bukur sa ato dy vite”, përfundoi Maldini.

Kualiteti i brazilianit nuk vihet në dyshim, por përshtatja e shpejtë me futbollin specifik që luhet në Serie A dhe me ekipin e ri i ka befasuar të gjithë. 21-vjeçari ka rikthyer sambën te kuqezinjtë, po tregon personalitet, vrapon pafund dhe nuk përton të ndihmojë shokët dhe në fazën defensive.

Paolo Maldini nuk i kursen elozhet për të në prononcimin e dhënë për ”Dazn”, ndërsa bën thirrje se nuk duhet harruar fakti që lojtari është akoma në muajin e dytë me Milanin dhe futbollin italian.

“Lukas është një djalë i zgjuar. I kemi kërkuar të nxitojë për t’u përshtatur, por ai ka patur disa probleme me gjuhën. Paketa është i vetmi lojtar i yni që flet portugalisht. Ai ka patur një impakt të madh në ekip, po zgjidh problemet tona me kualitetin e tij, kërkon të shohë gjithmonë përpara dhe është me fat që zoti i ka dhuruar shumë klas.”

“Ai po rritet, por ne e harrojmë ndonjëherë se është vetëm një djalë që sapo ka ardhur nga Brazili pas një muaji pushim dhe sapo është martuar. Futbolli brazilian ndryshon shumë me tonin, por Paketa ka befasuar dhe me punën që po bën në fazën defensive, aty ku ka ende shumë për të mësuar.”

Siç raporton “QS”, Paolo Maldini insiston në vazhdimin e punës me Gatuzon dhe po e mbron ish-shokun e skuadrës, ndërsa Leonardo është gati për ta shkarkuar menjëherë pas ndeshjes, gjithmonë nëse nuk arrihet fitorja. Dy drejtuesit e “Djallit” kanë mendime të ndryshme sa i përket trajnerit, por mbetet për t’u parë fundi i ndeshjes kundër Spalit, me shpresën që Milani do të reagojë dhe shpëtojë trajnerin e tij.

Duke lënë mënjanë trajnerin, Milani vazhdon punën për përforcimin e ekipit në merkato. “La Stampa” zbulon objektivin e ri të kuqezinjve dhe ai është Simone Zaza. 27-vjeçari u rikthye në Itali tek ekipi i Torinos pas një sezoni shumë të mirë me Valencian, ndërsa Milani është gati ta ofrojë në ekip.

Objektivi i kuqezinjve është kualifikimi në zonën Champions, kampionati është akoma i gjatë dhe djemtë e Gatuzos mund të rikthehen në garën për vendin e katërt. Dy ndeshjet e radhës janë në shtëpi kundër Sampdorias dhe Xhenoas, kështu që Milani nuk ka alternativa të tjera përveç fitoreve. Paolo Maldini ka folur për situatën e ekipit, duke tentuar të mbajë ambientin e qetë.

Loja është, por mungojnë rezultatet. Ish-kapiteni i famshëm kërkon të mbajë lart moralin e ekipit dhe kur e pyesin për Xhenaro Gatuzo, ai pohon besimin kundrejt trajnerit.

“Luajtëm keq në derbi, e vërtetë, dhe e kuptoj zhgënjimin e madh për ndeshjen kundër Betisit. Por, duhet të vazhdojmë me besimin që krijuam përpara këtyre dy humbjeve. Vijmë nga një vend i gjashtë në sezonin e kaluar dhe sivjet duam vendin e katërt. Kemi dy ndeshje të afërta me ekipet xhenoveze dhe dy fitore të mundshme do të na ofronin afër vendit të katërt. Kemi besim dhe për faktin që Milani po tregon një lojë të bukur. Interi ishte superior në derbi, por Interi kundër Parmës nuk u njihte si ekip. Ky është kampionati jonë dhe ekipet e vogla mund të të krijojnë probleme”, përfundon drejtuesi i kuqezinjve.

Në fushën e blertë ai është rekordmeni absolut me 56 derbe të zhvilluara. Gjithçka nisi nga 1 dhjetori i vitit 1985, kur Paolo luajti derbin e parë si futbollist kundër Interit. Ndeshja mbaroi në barazim 2-2, ndërsa Maldini nuk u ndal, duke luajtur dhe 24 vite të tjera, gjithmonë me të njëjtën bluzë mbi supe.

Duke qëndruar në të tashmen, Maldini ka zhvilluar, jo vetëm më shumë derbe se çdo lojtar tjetër, por ai numëron më shumë derbi se i gjithë formacioni i Gatuzos. Të gjithë lojtarët bashkë numërojnë 39 derbe. Nëse Abate do të aktivizohet në vendin e Kalabrias, numri shkon në 50, por përsëri rekordi i Maldinit nuk thyhet dot.

FILLIMET – “Isha 10 vjeç, kur bleva këpucët e futbollit me mamanë time në Corso Buenos Aires. Shkova atje dhe më aktivizuan si anësor i djathtë ofensiv. Deri ditën e debutimit, nuk mendoja se isha në gjendje të luaja në Serie A. Në kthimin me autobus pas ndeshjes fitova vetëbesimin. Talente ka dhe sot, por sistemi nuk i ndihmon, sepse ata që dalin nga moshat nuk janë gati as për të luajtur në Serie C. Federata duhet të reflektojë në këtë pikë dhe ekipet e dyta.”

SAKI – “Gjynah që nuk ka trajnuar më shumë. Ai erdhi te ne në momentin e duhur. Ishte kaq maniak, sa mbeti i burgosur i ideve të tij dhe vetvetes. Kjo ndodhi për shkak të stresit të akumuluar dhe gjenitë kështu janë. Kapelo ishte një menaxher dhe trajner i madh.”

BERLUSKONI – “Berluskoni? Presidenti im, një vizionar. Na tha se do të bëheshim më të fortët në botë dhe ne qeshnim. Por që kur erdhi Saki ne e kuptuam që ai nuk ishte një person normal. A ka më presidentë aq pasionantë? Do të jetë gjithnjë e më e vështirë të menaxhosh klube të nivelit të lartë. Por pasioni që na dha pronari i klubit ka qenë çelësi i suksesit tonë. A pres një Milan-Monza? Për mendimin tim ata do ia dalin, Galianit i shkëlqejnë sytë kur flet për futboll.“

FINALJA E BARCELONËS – “Për herë të parë nuk niseshim favoritë në finale. Disa ditë para finales humbëm me Fiorentinën, që luante në Serie B, por trajneri e përballoi mirë situatën. Na bindi që ishim të fortë dhe se do të fitonim në Spanjë përballë Steauas së Bukureshtit. Flasim shumë për Kapelon, Sakin dhe Ançelotin, por ai që më mësoi futbollin ishte Liedholm, i cili hapi një cikël të ri te Milani. Ançelotin e shijova në momentin më të mirë, sepse isha në një moshë tjetër. Unë jam emotiv dhe në moshën 34-35 vjeçare, emocionet i përjeton ndryshe. Gjithmonë kam menduar se si nuk fituam aq shumë me Sakin në Itali. Ndoshta sepse Saki dëshironte të luanim gjithmonë njësoj, pavarësisht fushës, apo kundërshtarëve.”

GATUZO – “Gatuzo ka një sens rinisje, që është gjëja primare që kemi dashur të transmetojmë unë dhe Leonardo. Po ndryshon dhe vizionin që të tjerët kanë për të, nuk është vetëm grintë, por është përmirësuar dhe në aspektin teknik dhe taktik. Ai ka besimin tonë. U tregua kurajoz të pranonte stolin e Milanit dhe ka një cilësi të madhe, të dëgjon me vëmendje.”

PAKETA – “Është një lojtar i ri dhe me shumë talent. Nuk është formuar akoma 100%, por mund të na bëjë të ëndërrojmë.”

DERBI – “Si ndeshje dhe atmosferë është gjithmonë e bukur. Kjo ndeshje do të jetë akoma dhe më e bukur, sepse të dy ekipet po rikthehen të jenë konkurruese.”

RIKTHIMI – “Me Galianin kam kaluar momente të paharrueshme, por kemi patur dhe debate dhe ndonjë grindje. Dua të kem në krah njerëz, të cilët më thonë të vërtetën e gjërave dhe jo ata që më japin gjithmonë të drejtë. Kështu rritesh. Kam luajtur në shumë role dhe shpresoj të kem qenë një lojtar korrekt. Leonardo më kërkoi të rikthehesha. Diskutuam për 10 ditë, më pas na u deshën pak ditë për të arritur akordin. Unë dhe Leo ndajmë sektorin sportiv: menaxhimin e ekipit, merkaton, trajnerin dhe shitjet.”

DITA IME – “Shkoj në zyrë në orën 9:30. Unë dhe Leo kemi të njëjtën zyrë, sepse qëndrojmë gjithmonë bashkë. Erdha në momentin më të keq, atë të merkatos, por fatmirësisht filloi kampionati. Kam tre vite kontratë, që nuk është një kohë shumë e gjatë. Në një klub si Milani duhet të rikthehemi të fitojmë në Itali dhe Europë. Mendoj se është e rëndësishme për lojtarët të ndjejnë prezencën e drejtuesve. Dialogu dhe bisedat janë të rëndësishme dhe dëshirojmë t’i ndihmojmë djemtë. Kemi biseduar me të gjithë.

PENGJET – “Finalja e humbur kundër Brazilit në Kupën e Botës dhe ajo me Liverpulin në Champions. U hakmorëm pas dy vitesh.”

MESI-RONALDO – “Unë zgjedh Mesin, edhe pse Ronaldo është fenomenal. Argjentinasi është esenca e futbollit. Më kujton Maradonën, i cili merrte shumë shkelma, por nuk thoshte asnjë fjalë.”

KUNDËRSHTARËT MË TË FORTË – “Platini, Maradona dhe Ronaldo i Interit, i cili ishte i fortë, teknik dhe shënonte. Nga lojtarët italianë zgjedh Françesko Totin.”

FISHKËLLIMAT E LAMTUMIRËS – “Kjo ndodh në futboll. U zemërova pak, por ajo skenë përshkroi hendekun mes meje dhe disa qëndrimeve të caktuara, që nuk do i mbështes kurrë. Asnjëherë nuk do të heq dorë nga drejtësia dhe dëshira për të qenë një njeri i mirë. Nuk e kam kuptuar se për çfarë kontestuan. Jam i lumtur që një javë më vonë në Firence mora tributin që meritoja. Në Itali mungon kultura sportive, humbja duhet konsideruar pjesë e lojës dhe kjo është thelbësore.”

ELEMINIMI NGA KOREA – “Para ndeshjes, Tomazi po përshëndeste arbitrat, ndërsa Moreno i bëri me shenjë të largohej. Kjo gjë na futi në mendime. Atë ditë jam zemëruar shumë. Gruaja ime është nga Venezuela dhe dija pak spanjisht. Ju betohem që nxora më të keqen nga vetja. Një arbitër i ndershëm do të më kishte përjashtuar nga loja për fjalët që i thashë. Atë që ndjen në një Botëror me bluzën e Italisë, nuk e ndjen në asnjë kompeticion tjetër.”

OBJEKTIVAT – “Duam të jemi afër katër vendeve të para. Duam të përballemi me ekipet e forta, ashtu siç luajtëm me Napolin, por duke menaxhuar më mirë fazat kritike të ndeshjes. Objektivi ynë është rikthimi në Champions.”

MENTALITETI – “Ky Milan duhet të rritet, mbi të gjitha në mentalitet. Të kesh mentalitet do të thotë që skuadra nuk pëson shpejt dy gola,  ndoshta edhe kur luan keq arrin që të fitosh  Kjo është pjese ku duhet të fokusohemi.  Gjithsesi nuk duhet të harrojmë se në dy vitet e fundi jemi renditur në vendin e gjashtë dhe si pasojë, kemi përpara vetes një rrugë të gjatë”.

MILANI, ANTI-JUVE? –“ Jemi shumë larg Juventusit. Objektivat tanë janë të kualifikohemi në Champions dhe të bëjmë mirë në  Europa League. Të tregohem i sinqertë, është shumë herët për të na krahasuar me Juventusit”.

BESIMI TE PROJEKTI – “Kemi një projekt shumë të fortë dhe një skuadër shumë të rëndësishme. Do të përpiqemi që të minimizojmë me sa mundemi mungesën e eksperiencës. Mendoj se skuadra nuk e ka kuptuar akoma se sa shumë potencial ka. Kemi shumë lojtarë të rinj në përbërje, që akoma nuk kanë shpërthyer. Prandaj dialogu midis meje Gatuzos dhe Leonardos është diçka që ne e konsiderojmë thelbësore për këtë klub.

“Shpresoj që të më dhurojë disa bileta falas për të parë ndeshjet kur të vi në Itali. Jam i lumtur për Paolon dhe për të gjithë tifozët e Milanit. Maldini është një kampion i madh dhe një ekspert futbolli. Ai është një figurë e rëndësishme e klubit dhe i uroj që të rikthejë Milanin aty ku i takon”, përfundon 50-vjeçari gjerman.

Lajmet që vijnë nga klubi i Milanit e afrojnë dhe më shumë mesfushorin Adrien Rabiot me kuqezinjtë. Lojtari ka vendosur të mos rinovojë kontratën e tij me PSG dhe shkaku është… Leonardo. Ky i fundit është personi që ndikoi në lançimin e 23-vjeçarit në futbollin e madh, kur ishte pjesë e PSG dhe marrëdhënia e brazilianit me mesfushorin francez është e shkëlqyer. Nëna e lojtarit, e cila është dhe menaxhere e tij, po e merr seriozisht kalimin e djalit të saj në Milano dhe Leonardo do të nisë sulmin për të që në merkaton e janarit.

“Është bukur të jesh këtu për shortin e Europa Ligës. Ka ndryshuar si roli im ashtu dhe kompeticioni, por është fillimi dhe jam i lumtur. Mund të them që jemi të kënaqur me shortin. Kemi Betis, që do të na krijojë probleme, Olimpiakos dhe një skuadër luksemburgase, që është një risi absolute. Ky grup na shkon përshtat dhe duam të arrijmë sa më larg të jetë e mundur.

UEFA ka nevojë për Milanin, sepse ka shkruar një faqe të rëndësishme të historisë së kompeticioneve të UEFA-s. Klubet italiane kanë filluar ta marrin më seriozisht se më parë këtë kompeticion. Tashmë çdo ekip që e fiton mund të kualifikohet në Champions dhe kjo gjë ka rritur Europa Ligën. Kemi një skuadër të re dhe lojtarët si Higuain na ndihmojnë të rrisim eksperiencën e ekipit.

Unë kam pak eksperiencë në rolin e ri, por shumë brenda fushës. Dua të jap diçka më shumë, prandaj shkoj shpesh në Milanelo dhe bisedoj me Gatuzon. Objektivi ynë është të renditemi mes katër ekipeve më të mira në Serinë A dhe të bëjmë maksimumin në Ligën e Europës”, përfundon Paolo Maldini prononcimin e dhënë për “Sky”.

Në një prononcim për “Milan TV”, drejtuesi i Milanit ka folur për ndeshjen me Realin. I matur, pjesë e stilit të tij, ai flet për përballjen, Higuain, Serxho Ramos dhe Gatuzon.

Ndeshja – “Ndeshja ishte e vështirë dhe ky ishte një trofe shumë i rëndësishëm për ta. U luajt një ndeshje shumë e bukur dhe me nivel. Ishte një përvojë e fortë dhe e rëndësishme për rritjen tonë, përballja me Realin në shtëpinë e tij. Jam i lumtur me mënyrën e lojës së skuadrës dhe na vjen keq për rezultatin.

Të krahasohemi me Realin sot është diçka mbresëlënëse, por jo shumë reale. Duhet të jemi të vetëdijshëm për limitet tona. Mbas disa ditëve pushim, do të përgatitemi në 100% për nisjen e kampionatit.”

Higuain & Kaldara – “Të dy kanë punuar shumë mirë. Gonzalo zhvilloi një ndeshje të madhe, luajti shumë mirë, jo vetëm në kërkimin e golit, por edhe në mbështetjen e ekipit. Ai është një sulmues i vërtetë.”

Serxho Ramos – “Serxho gjithmonë është shprehur që unë jam idhulli i tij. Me siguri që për momentin, ai është qendër mbrojtësi më i fortë në botë.”

Gatuzo – “Nuk është se ka ndryshuar nga koha kur ishte futbollist. Eshtë më i përgjegjshëm sepse ta detyron pankina, por Xhenaro është gjithmonë i njëjti karakter.”

“Ndihem i rraskapitur, por është një ndjesi e bukur. Është gjithmonë e mrekullueshme të kthehesh në një stadium kaq të rëndësishëm, përballë një skuadre që ka fituar gjithçka. Pavarësisht faktit që jemi kundërshtar në fushë, ekziston një respekt i madh mes nesh. Ata presin që Milani të rikthehet në nivele të larta.

A do ja arrijmë diçkaje të tillë? Mendoj që kjo është dëshira e të gjithë tifozëve të Milanit, por nevojitet kohë dhe duhet ti bëjmë gjërat mirë.”

Peruxhia – “Mbas disa viteve jashtë, dëshiroja rikthimin në Itali. Peruxhia më dhuroi këtë mundësi të shkëlqyer dhe pranova direkt. Jam në vendin e duhur për mua, në një klub me histori dhe në një vend të rëndësishëm për t’u rritur. Ekipi ka pësuar ndryshime të shumta dhe po presim përforcime. Kam patur pak lojtarë në dispozicion gjatë fazës përgatitore, por kemi punuar mirë dhe dëshirojmë të jemi konkurrues. Punë e madhe na pret, sepse presim lojtarë të tjerë në ekip.”

Kaldara – “Kaldara sjell rini dhe freski fizike. Ai dhe Romanjoli janë dy futbollistë interesantë. Së bashku formojnë një dyshe të kompletuar dhe shpresoj që të jenë dhe dyshja e qendrës së kombëtares. I njoh, janë djem seriozë dhe shpresoj të bëjnë mirë. Milan duhet të rikthehet në Champions që të rrisë dhe këta lojtarë. Ndeshjet në stadiume të mëdha i rrisin lojtarët.”

Maldini – “Më në fund u rikthye Maldini. Diçka e tillë duhet të ndodhte patjetër, madje është rikthyer vonë. Paolo e di se çfarë do të thotë të jesh pjesë e Milanit dhe ai mund të rikrijojë mentalitetin e duhur. Më parë, sapo kaloje kangjellat e Milanelos, e dije mirë se si duhet të silleshe, ndërsa tani nuk ekziston një gjë e tillë. Rikthimi i Maldinit është i rëndësishëm edhe për këtë fakt.”

Nuk mungojnë dhe urimet nga dy ish-kapitenët e mëdhenj të Juventusit dhe Interit. Aleks Del Piero dhe Havier Zaneti, dy kundërshtarët e qindra betejave, kanë komentuar rikthimin e Maldinit në klubin e jetës së tij.

“Paolo Maldini është një flamur dhe simbol i Milanit dhe futbollit italian. Jam i lumtur që e rigjej në shtëpinë e tij: fat të mbarë, Paolo”, shkruan Aleks Del Piero, ish-kapiteni i Juventusit, në faqen e tij zyrtare në “Facebook”.

Nuk mungon as urimi i argjentinasit, Havier Zaneti. Ish-kapiteni i Interit, aktualisht në postin e zëvendës-presidentit të pjesës zikaltër të Milanos, ka shkruar një letër ku shpreh lumturinë e tij për rikthimin e Maldinit.

“Jam shumë i lumtur për Paolon, sepse është një person i shkëlqyer dhe një profesionist i madh. Një si ai do të bëjë mirë në futbollin botëror në përgjithësi. Kam shumë respekt për Paolon. Jemi ndeshur shumë herë si kundërshtarë dhe tani takohemi në role të tjera. Mbetet i njëjti vlerësim, respekt dhe konsideratë për të. Do të jem i lumtur ta përqafoj në derbin e ardhshëm, siç kemi bërë shumë herë në fushën e blertë. I uroj një fat të madh në aventurën e re.”

Paolo, çfarë ju bindi të riktheheshit?
Kurrë nuk jam përgjigjur, pra nuk kam thënë jo. Fola para një viti e gjysmë me pronarët, por nuk kishte një rol të përcaktuar. Tani situata ishte ndryshe. Leonardo më tregoi projektin dhe besoj tek ai. Gjithmonë kam besuar se drejtuesit mund të vendosin, pavarësisht të kaluarës. Tani që jam këtu jam i lumtur”.

Kur e vendosët të thoshit po?
Njerëzit bëjnë diferencat dhe vendosin. Kemi kaluar shumë gjëra së bashku dhe jemi gati edhe për këtë eksperiencë. Jemi të ndryshëm dhe do vazhdojmë sipas ideve tona. U takova me pronarët në USA dhe gjithçka ndodhi shumë shpejt.

Si kapiteni keni qenë i heshtur…
Karakteri është i rëndësishëm. Jam bërë pak më shumë llafazan. Tani jam në rol tjetër. Çfarë kam kaluar në të shkuarën, si në raport me shokët, por edhe me drejtuesit, do e vë në shërbim të klubit.

Çfarë të ka pëlqyer më së shumti nga projekti? Keni thënë se “unë dua të punoj me Milanin dhe jo të jem një figurë, amabasador”…
Roli dhe projekti janë dy gjëra që lidhen bashkë. Pavarësisht se drejtuesit nuk kanë eksperiencë, Leo ka. Ndihem mirë me të dhe ka qenë i rëndësishëm fakti që shoqëria të mbështesë idetë tona.

Roli juaj, me çafër ka të bëjë konkretisht?
Raporti me trajnerin, me skuadrën e parë, moshat. Do mbuloj gjithë sektorin sportiv. Do të bëjmë rolin e të mirit dhe të keqit, së bashku me Leonardon.

A është kjo tentativë për të kthyer Milanin e madh? E ndjeni përgjegjësinë?
Jam person i ndërgjegjshëm dhe e ndjej përgjegjësinë. Kam luajtur si kapiten me Milanin, këtu luajnë fëmijët e mi. Është një ambient ku është gjithmonë bukur të kthehesh aty ku je rritur.

Çfarë lloj futbolli mund të gjesh pas nëntë vitesh. Çfarë ka ndryshuar?
Evolucioni vazhdon dhe kush nuk e kupton mbetet prapa. Kjo duhet kuptuar dhe analizuar. Ka pak ndryshim sipas aspektit tekniko-taktik. Ka gjëra që kanë dalë nga moda, edhe pse nuk ka pasur ndryshime shumë të mëdha.

Çfarë ju premtoni tifozëve? Çfarë i keni thënë Gatuzos?
E para vjen shoqëria dhe duhet të jetë solide. Duhet të bëjmë llogaritë në aspektin financiar. Është akoma herët, pasi sot erdha, por më kanë pritur mirë. Për një periudhe afat-mesëm dhe afatgjatë do ndryshojë diçka. Historia ime më detyron të mos merrem me projekte afatshkurta. Jemi përshëndetur me Gatuzon dhe kemi një raport të mirë. Do mundohemi të përforcojmë skuadrën.

Çfarë ju bindi më së shumta të kthehesh?
Kryesorja që erdha këtu është dashuria për këtë klub. Dy alternativat e mia kanë qenë gjithmonë Milani dhe kombëtarja.

Duam mendimin tuaj mbi largimin e Bonuçit…
E kam të vështirë të përgjigjem, pasi nuk kam komunikuar as me lojtarin, as me trajnerin.

Në fushë keni qenë i ftohtë dhe i aftë t’i menaxhonit situatat…
Kam qenë pasionant në fushë, sot është ndryshe, pasi mund të jap eksperiencën time.

Të dy ju, populli milanist është i lumtur, por mbetet temë diskutimi lamtumira juaj, kur disa prej tifozëve ju vërshëllyen?
Raporti me tifozët është i shkëlqyer. Më duan dhe ma kanë shprehur gjithmonë. Ai episod i mbetet asaj dite dhe nuk është më në mendimet e mia. Kjo është filozofia e jetës. Si futbollist doja të gjykohesha si futbollist, tani jam drejtues. E thashë që ai episod i takon së kaluarës. Nuk kam pritur mesazhe as kur isha si lojtar, jo më tani.

Kush kanë qenë gabimet më të mëdha të këtyre 9 viteve?
Kam kaluar një karrierë të gjatë dhe kur vendosa ta mbyllja ndryshova. Mungon diçka në dhomat  zhveshjes, tensioni i ndeshjeve të mëdha. Milanin e kam ndjekur, por nuk dua të kthehem prapa. Jam i përqendruar të ajo që mund të bëjmë në të ardhmen.

Cili lojtar të intrigon më shumë? Kaldara e Romanjoli…
Janë dy të rinj shumë premtues. Janë elementë me shpresa të mëdha. Kaldara është e ardhmja e kombëtares. Më ka impresionuar rritja Kutrones. Ajo që bëri vjet është e pabesueshme. Dëshira e lojtarit është jashtë normales.

Me Sienën ishte ndeshja e parë e Milanit e parë pa ty, ndërsa për Leonardon e para si trajner…
Nuk është se kam pritur të jem drejtues prej asaj që kam dhënë si lojtar. Gjithmonë i kam marrë gjërat në një mënyrë të thjeshtë.

Cilat janë simbolet e këtij Milani të ri? Donaruma është parë si i tillë…
Çdo trajektore është e ndryshme. Donaruma ka pasur shumë presion dhe nuk është pak për një portier që nuk i ka mbushur 18 vjeç të luajë në San Siro. Do mundohemi ta përmirësojmë raportin e tij të komplikuar me ambientin.

Milani juaj është formuar nga italianë kryesisht. Shikoni pak ngjashmëri, pasi tani ka disa italianë sidomos në mbrojtje…
Po, ka ngjashmëri. Kisha fatin që kur erdha unë ishin Kostakurta e Barezi. Ai ka qenë reparti më i fortë i mbrojtjes për Milanin. Këto që kanë ardhur këtu vijnë nga moshat dhe e dinë çfarë përfaqëson klubi.

Çfarë do i thoni Gatuzos, pasi nuk ka qenë i qetë këto kohë?
Gatuzo nuk është asnjëherë i qetë, akoma nuk e keni kuptuar? (qesh). Prandaj jemi këtu, për ta qetësuar. Konfirmimi i tij nuk është vënë asnjëherë në dyshim. Ka diçka të mirë, që i transmeton vlerat. Vjet bëri një sezon të madh. Kur të kthehet do flasim dhe do dëgjojmë kërkesat e tij.

Kemi një mbrojtje të re, me potencial të madh. Si do ndikoni ju tek ata, si figurë?
Rolet janë të ndara, është trajneri. Maksimumi që mund të bëj është të flas me trajnerin dhe të flas me lojtarët. Janë në moshën perfekte për të dhënë maksimumin.

Një lajm i mirë për të gjithë tifozët e Milanit, të cilët shohin mbrojtësin e mijëra betejave të jetë pjesë e stafit të ri të “Djallit”.

Konfirmimi i këtij zyrtarizimi vjen dhe nga vetë klubi milanez ku shkruhet: “Rrugëtimi i ri i AC Milan është përforcuar së fundmi me emërimin e Paolo Maldinit si drejtori i zhvillimit strategjik të sektorit sportiv. Paolo është një legjendë e gjallë e historisë kuqezi për klasin e jashtëzakonshëm, talentin, lidershipin, besnikërinë dhe rekordet e tij të suksesit të pakrahasueshëm me askënd. Cilësi të tilla do të luajnë një rol vendimtar për të rikthyer Milanin në madhështinë që meriton”

Siç raporton “Fox Sport”, braziliani po mendon të rikthejë te Milani, Frenk Rajkard. Hollandezi 55-vjeçar, i cili ka qënë pjesë e kuqezinjve të famshëm të viteve 90-të, mund të jetë bashkëpunëtori i Leonardos me përgjegjësi për çështjet teknike të ekipit.

Holandezi do të vëzhgojë nga afër punën e Gatuzos dhe sigurisht që palët do të shkëmbejnë ide se si të ecin përpara, pasi qëllimi i përbashkët është të kthejnë Milanin e kohërave të arta. Sigurisht kjo bëhet gradualisht dhe kërkon kohën e vet, por Leonardo është i qartë.

Ai dëshiron te Milani, ish-lojtarë të mëdhenj dhe personalitete të tillë. Ofertë ka dhe për Paolo Maldinin, me këtë të fundit që po mendohet për t’u rikthyer në klubin ku ka kaluar gjithë karrierën e tij.