Peter Pakult ishte mjaft i zhgënjyer në intervistën për “Gol pas Goli” në “Supersport” tekniku austriak e thotë hapur që tani është Europa ajo që skuadra e ti synon, por nuk preferon që t’ia faturojë ndeshjet në shtëpi gjendjes së fushës.

“Rezultati është shumë dëshpërues për ne pasi donim ta fitonim ndeshjen. Mendoj se kam shumë vite në futboll dhe e kam parë një ndeshje të tillë, që një kundërshtar të mund vetëm me një goditje, ishte një pakujdesi në mbrojtja jonë dhe kundërshtari na ndëshkoi”.

“Të paktën në ndeshje të tilla nuk duhet të mundesh, ne kërkonim golin e avantazhit dhe nuk duhej që ta humbnim ndeshjen kështu”.

“Që në momentin kur kam ardhur e kam thënë që Skënderbeu është para nesh ne donim që të përmirësohem dhe ta ngushtonim diferencën nga ndeshja në ndeshje. U munduam që ta korrigjonim rezultatin sot, por ky është futbolli, ndonjëherë humbet dhe pa meritë”.

“Nga momenti që kam ardhur, e dinim se zona për Europën ka shumë rivalitet. Ne synonim që të siguronim një vend në zonën europiane sa më parë, por mund të ndodhë dhe në fazën e katërt. Uroj që të jemi sa më parë në këtë zonë. Duhet nga ndeshja në ndeshje të përmirësohemi dhe të marrim pikët që do na çonin në Europë”.

“Edhe javën e shkuar tentova ta sajoj. Këtu lajë,m për 6 vitesh dhe nuk dua ta kemi si një arsyetim për këto rezultatet. Kjo temë do të bisedohet për sezonin e ardhshëm. Sa jam unë në dijeni do t’i zhvillojmë ndeshjet këtu”.

Në fillim të këtij viti bëri bujë ardhja e austriakut Peter Pakult te Kukësi, një trajner me emër dhe karrierë të pasur, i cili natyrisht nuk duhet ta ketë pasur të lehtë të zgjidhte Shqipërinë për të punuar. Në fakt, arsyeja madhore që ndikoi në këtë “martesë” ishte menaxheri i FIFA-s Marjan Prela. Ai jeton prej vitesh në Austri dhe ka njohje të shumta në ambientin sportiv të këtij shteti. Pikërisht ky menaxher e ka bindur trajnerin Pakultin të vijë tek Kukësi, ndërsa tani duket se edhe një emër tjetër i madh i futbollit austriak, Valter Shahner, mund të vijë në Superiore. Rruga u hap, sinjal se futbolli shqiptar nuk është më aq i vogël dhe pa vlerë sa mendojmë. Por, si është e vërteta mbi zërat e bisedimeve mes Shahner dhe Partizanit? Sport Ekspres ka kontaktuar zotin Prela, i cili zbulon se trajneri austriak është në bisedime me një klub shqiptar, por jo Partizanin!

– Zoti Prela, në Shqipëri nuk jeni fort i njohur, por në Austri keni lidhje shumë të forta.

– E vërtetë, kam vite që jetoj e punoj në Austri, por lidhjet me Shqipërinë nuk i kam shkëputur. Vij shpesh në Shqipëri dhe shoh me kënaqësi që vendi është zhvilluar shumë, në çdo drejtim.

– Po në futboll?

– Natyrisht, edhe në futboll dhe sidomos në futboll. Nuk ka nevojë të flas për arritjet e kombëtares, sepse bëhem përsëritës duke qenë se njerëzit i dinë mirë, por për kampionatin shqiptar, nivelin, infratrukturën, pagesat dhe profesionalizmin, futbolli shqiptar ndryshon si nata me dita me një dekadë më parë, për shembull.

– Keni sjellë Pakult te Kukësi, ishte e vështirë?

– Shikoni, futbolli shqiptar dhe Shqipëria në përgjithësi kanë pasur një imazh shumë keq në Austri, në përgjithësi. Kjo vjen për arsye që dihen, vuajtjet e viteve ’90, pasqyrimi negativ në media, lufta civile e vitit 1997, varfëria ekstreme, e të tjera. Për këtë arsye, pengesa më e madhe me Pakultin ishte pikërisht kjo gjë, imazhi negativ në mendje. I thashë: “Eja, 1 orë rrugë është me avion deri në Tiranë. E shohim dhe pastaj vendosim”. Më pas, Pakult u befasua nga Shqipëria dhe i pëlqeu shumë. Edhe shumë austriakë të tjerë kur janë larguar kanë kërkuar të kthehen.

– Përmendët lidhjen me Shqipërinë, a keni kryer transferime të rëndësishme me ndonjë lojtar shqiptar?

– Indrit Fortuzin në vitin 1995 e çova tek Austria Salcburg. Ishte një futbollist klasi, jo vetëm për Shqipërinë, por edhe në Austri. Qëndroi pak kohë në Salcburg, nuk u përshtat, ndoshta ndikoi edhe gjuha gjermane dhe mentaliteti, iku shpejt, edhe pse shkëlqeu në disa miqësore. Hamdi Salihin gjithashtu e çova unë në Austri, ku ka punuar me Pakultin. Kur e panë vëzhguesit e Salcburgut nga afër, në një ndeshje kampionati, Salihi nuk u duk për shumë minuta dhe më thanë: “Nuk po duket fare”. U thashë të kishin durim dhe në minutën e 85-ta a diçka e tillë një kros në zonë, Salihi me kokë dhe gol. U thashë: “E patë? Ishte Salihi”. “OK – më thanë -, na duhet për 90 minuta në Austri, jo për një prekje topi, por do ta rregullojmë”. Salihi shkoi dhe u përmirësua jashtëzakonisht si futbollist në Austri, u bë lojtar klasi, sepse talentin e kishte të jashtëzakonshëm.

– Po Valter Shahner, është e vërtetë që po bisedon me Partizanin, si raportojnë mediat në Austri, duke marrë edhe ju si burim?

– Në fakt ka një keqkuptim. Unë kam pranuar se po bisedoj me një klub shqiptar të rëndësishëm për Shahner, por nuk u kam thënë austriakëve që bëhet fjalë për Partizanin, nuk e di nga ka dalë emri i klubit, por nuk është Partizani. Kaq mund të them për momentin, natyrisht, sepse nuk mund të zbuloj emër klubi në një kohë që skuadra është në aktivitet dhe e ka trajnerin në drejtim.