origi

“Një ëndërr e bërë realitet”, flasin Origi dhe Arnold

Sport Ekspres — Sat, 01 Jun 2019 21:17:01 +0000

Dy lojtarët e Liverpulit, Divok Origi dhe Trent Aleksandër-Arnold folën shkurtimisht pas finales së fituar, pasi festa po i priste. Sulmuesi tha që është shumë i lumtur për golin, por kjo gjë nuk ka aspak rëndësi, ndërsa Arnold, vetëm 20-vjeç, tha që kjo arritje është një ëndërr e bërë realit:

ORIGI – “Mbi të gjitha, jam i lumtur për ekipin. Jam i lumtur që bëra pjesën time. Është një ditë speciale, mjafton të shohesh tifozët”.

ARNOLD – “Sapo kemi fituar Champions-in dhe e kemi bërë për të gjithë këta tifozë. Një ëndërr e bërë realitet”.

VIDEO: Rikthehet heroi që fundosi Barçën, festë e kuqe në Madrid

Sport Ekspres — Sat, 01 Jun 2019 20:53:26 +0000

Liverpuli ka shënuar dhe golin e dytë dhe ka lëshuar në tapet Totenhemi. Është njeriu gol, Divok Oriki që shënon sërish. Belgu, i ardhur nga stoli, shënoi në minutën e 88’, duke e fituar praktikisht trofeun për të kuqtë.

Liverpul – Totenhem 2-0
Salah 2’, Origi 87’

Koeçidenca e bukur e numrave 27, heronjtë Moura dhe Origi në shifra

Sport Ekspres — Fri, 10 May 2019 16:50:18 +0000

Divok Origi dhe Lukas Moura kanë qenë emrat më të përfolur në këto ditët e fundit, për shkak se ishin këta dy futbollistë që i dhanë kualifikimin skuadrave të tyre për në finalen e madhe të Ligës së Kampionëve. Si sulmuesi belg, ashtu dhe ai brazilian, nuk janë lojtarë kyç për trajnerët e tyre, por treguan se kur e kanë mundësinë, janë aty për t’u shndërruar në protagonistë.

Origi dhe Moura kanë disa të përbashkëta shumë interesante: TË dy mbajnë në fanellë numrin 27. Të dy kanë një të kaluar në kampionatin francez, njëri me Lilën, tjetri me PSG-në. Si Origi, ashtu dhe Moura, nuk shënuan asnjë gol në Premier League sezonin e shkuar.

Sezonin 2014-15, Moura dhe Origi janë përplasur kundër njëri-tjetrit në Francë, kur të dy ishin në një moshë shumë të re (21 dhe 19 vjeç). Pikërisht në atë sezon, të dy futbollistët shënuan nga 7 gola në Ligue 1. Sot, janë finalistë të UEFA Champions League dhe po të mos ishin ata, skuadrat e tyre do ta ndiqnin nga shtëpi finalen e Madridit.

45 minuta për t’u bërë hero, Uijnaldum: Isha i tërbuar me Klop!

Sport Ekspres — Tue, 07 May 2019 21:33:52 +0000

Një natë e çmendur në Liverpul, me aktorë dy emra që nuk ia merrte mendja askujt: Divok Origi shënoi 2 gola, dy të tjerë i shënoi Xheorxhinjo Uijnaldum. I pari nuk luan thuajse kurrë, i dyti e nisi nga stoli dhe u fut në pushim, sepse u dëmtua Robertson.

Pas ndeshjes Origi foli për BT Sport: “Nuk ka shumë rëndësi që shënova dy gola, sepse rëndësi ka kualifikimi. Nuk vlente asgjë, nëse shënoja gola dhe eliminoheshim. Bëmë diçka fantastike, e dinim që do ishte një natë speciale. Donim të luftonim, edhe për Firmino e Salah, Luftuam deri në fund”.

Ndërkaq, Uijnaldum u bë hero për 45 minuta: “E pabesueshme. Pas ndeshjes në Spanjë u bindëm që mund t’ia dilnim. Njerëzit nga jashtë dyshonin te ne, mendonin se nuk do ia dilnim dot, por treguam edhe një herë se në futboll nuk ka asgjë të pamundur.

“Isha vërtet i zemëruar me trajnerin, sepse më la në stol. U futa, u përpoqa të ndihmoj ekipin, jam i lumtur që e bëra”.

VIDEO: Futbolli kthehet në shtëpi, Liverpuli përsërit Stambollin 2005!

Sport Ekspres — Tue, 07 May 2019 20:57:16 +0000

Çmenduri, një natë magjike në “Anfield Road”. Liverpuli mundi Barcelonën 4-0 dhe arriti të përmbysë atë humbje 3-0 në ndeshjen e parë në “Camp Nou”, duke rikthyer shumë kujtime të bukura në kampin e të kuqve. Të besuarit e Jurgen Klop, falë dopietave të Origit dhe Vijnaldum, janë finalistët e parë për këtë edicion të Champions League, finalja e dytë radhazi për ta.

Ndeshja nisi shumë mirë për Liverpulin, që shënoi në minutë e 7’ me anë të sulmuesit belg, Origi, i cili nga një distancë e afërt dhe me portën thuajse të boshatisur, nuk e ka aspak të vështirë të shënojë. Pjesa e parë u mbyll vetëm me këtë gol, ndërsa në të dytën, shijuam një spektakël të vërtetë.

Klop bën lëvizjet e duhura në formacion dhe aktivizon Vijnaldum, me mesfushorin holandez që shënon dy gola në dy minuta, njëri më i bukur se tjetri. E për t’i vendosur kapakun një nate magjike, mendoi sërish Origi, i cili në minutën e 80’, kompletoi përmbysjen e madhe, duke eliminuar Barcelonën dhe duke çuar Liverpulin e tij në finale.

Liverpul – Barcelona 4-0 (0-3)
Origi 7’ 80′, Vijnaldum 54’ 56’

FOTO | Çmenduri angleze, Origi “përjetësohet” nga tifozi i Liverpulit

Sport Ekspres — Wed, 05 Dec 2018 18:41:16 +0000

Derbi i Merseyside i luajtur fundajvën e kaluar pati një fund mjaft emocionues, teksa pas një gafe të Pikford në sekondat e fundit të ndeshjes, bëri Divok Origin t’i jepte fitoren Liverpulit dhe të ringjallte sulmuesin belg, pas shumë kohësh.

Goli i shënuar nga 23-vjeçari çmendi në festë Jurgen Klop, por jo vetëm. Një tifoz, duket se ka thënë përpara ndeshjes, që në rast se Origi shënon gol unë do ta bëj tatuazh. Kjo gjë ndodhi, dhe tifozi e ka mbajtur premtimin e tij.

Tifozi në fjalë, ka bërë tatuazh në këmbën e tij emrin e Origit, pra Divock dhe e ka shkruar: “D1v0ck”, ku numri 1 simbolizon shkronjën “i” dhe njëkohësisht dhe numrin e golave të Liverpulit në derbin e fundit, ndërsa numri 0 simbolizon shkronjën “o” dhe njëkohësisht shifrën e golave të Evertonit. Diçka mjaft e veçantë.

Klop fillon “spastrimet”, nga Turqia duan dy lojtarë

Sport Ekspres — Thu, 22 Nov 2018 10:52:50 +0000

Klubi më i titulluar në futbollin turk, Fenerbarçe, është përfshirë në një krizë si kurrë më parë. Pas 12 javësh kampionat skuadra nga Stambolli ka grumbulluar vetëm 13 pikë dhe ndodhet në vendet e fundit të tabelës. Për të larguar krizës drejtuesit e klubit kanë menduar të marrin në Stamboll dy lojtarë nga anglezët e Liverpulit.

Bëhet fjalë për mbrojtësin Xhoel Matip dhe sulmuesin Divok Origi. Të dy lojtarët janë lënë në harresë nga Klop. Mbrojtësi Matip, është aktivizuar vetëm në një ndeshje si titullar, ndërsa situata e sulmuesit belg është shumë më e rëndë, pasi 23-vjeçari ende s’ka debutuar në këtë sezon të Premier Ligës.

Është e qartë se të dy lojtarët nuk janë më pjesë e planeve të “të kuqve” dhe një largim i tyre në merkaton e janarit është diçka mëse e realizueshme. Fenerbahçe kërkon huazimin e të dy lojtarëve, diçka kjo që nuk pëlqehet nga drejtuesit e Liverpulit, pasi ata kërkojnë që të shesin përfundimisht kartonët e të dy lojtarëve.