Pjesa më e madhe e tyre ka raste që vijnë për herë të parë në stadium, ka edhe nga ata që futbollin e kanë parë si tribunë karriere, por ka edhe nga ata që futbollin e kanë parë si “lopë holandeze” për ta mjelë me administrim e menaxhim tërësisht hajdutçe. Kemi parë këto dy muaj prag fushate elektorale që të rinj e të stazhionuar e kanë nisur me një xhiro në stërvitje, me një ndeshje në stadium dhe aty këtu edhe me ndonjë pazar tavolinash me drejtues, trajnerë e kapitenë skuadrash.

Kjo formë e sundimit në futboll duhet të marrë fund. Vora e Tomori janë dëshmi e hidhur e këtij realiteti, por ka ardhur koha që edhe komuniteti i futbollit, e më gjerë, të reagojë. Zgjedhjet e 30 qershorit duhet ta mbyllin këtë faqe të errët që kryebashkiakët e kaluar e kanë shkruar. Të parën gjë që duhet të respektojnë, të largohen nga futbolli. Kjo në shërbim të sporteve, pasi nuk bëhesh Zot me taksat e qytetarëve!

AGRON KAJA

Specialisti i futbollit, Andrea Marko, për SportEkspres.com deklaron se luftë më e fortë do të zhvillohet në Grupin B, pasi sipas tij renditja e skuadra do ta imponojë shumë rivalitetin. Duke e menduar Vllazninë në kreun e Grupit A, Marko kërkon që skuadrat të jenë të përgjegjshme, kryesisht në fazën e tretë. Ato që dalin nga objektivat mund të jenë më tolerante, sidomos me skuadrat që duan pikë.

INTERVISTOI: AGRON KAJA

Andrea, Kategoria e Parë nis gjysmën e dytë të sezonit, si e përshkruani garën në tërësi nisur nga 14 ndeshjet e luajtura në gjysmën e parë?
-Edhe Kategoria e Parë është bërë një garë e fortë, pasi aty po luajnë skuadra të mëdha të futbollit shqiptar, madje që kanë dalë edhe kampione. Duke qenë Dinamo, Vllaznia, Elbasani, Besa, Apolonia, Bylis e Tomori, që kanë eksperiencë në Superiore, gara ka qenë e fortë dhe e bukur.

Në këtë periudhë pa aktivitet zyrtar, si mendoni se e kanë shfrytëzuar skuadrat me lëvizjet e tyre gjatë muajit janar?
-Duke përjashtuar Lushnjen, që u përgatit dy javë në Malin e Zi, skuadrat e tjera janë përgatitur në terrene shumë të vështira, madje edhe nën ndikimin e kushteve të rënduara të motit me reshje shiu e bore. Gjithsesi, të gjitha skuadrat kanë qenë aktive në përgatitjet e tyre, sipas mundësive.

Çfarë mundësi teknike krijohen për skuadrat në këtë minifazë gjatë muajit janar?
-Kjo minifazë përgatitore zhvillohet me llogari nga të gjitha skuadrat, nga kreu në fundin e renditjes. Përgatitjet janë zhvilluar edhe me ndeshje miqësore, që  u japin trajnerëve më shumë mundësi të njohjes së gjendjes. Faza e tretë është e vështirë, pasi aty llogaritë edhe “ngatërrohen”.

Nisur nga emrat e afruar në merkato, Bylis e Besa në Grupin B kanë bërë shumë përforcime. A do të jetë një duel mes tyre për vendin e parë në grup?
-Patjetër që mes Bylisit e Besës gara do të jetë shumë e fortë për vendin e parë në Grupin B. Mes tyre do të jetë luftë e hapur, por të dyja duhet të kenë kujdes nga faza e tretë. Kjo sepse tolerimet me këtë formulë janë të pashmangshme, kryesisht nga skuadrat që dalin nga objektivat.

Vllaznia në Grupin A duket pa shqetësime dhe nuk ka lëvizur shumë në merkato. A i ka kapacitetet që ta ruajë vendin e parë në grup?
-Me këtë situatë që ka skuadra e Vllaznisë në renditjen e Grupit A, unë e mendoj në Kategorinë Superiore. Në këtë gjysmë të dytë i duhet që ta menaxhojë me kujdes kreun e grupit, por edhe të mendojë për skuadrën që do t’i duhet për Superioren e sezonit të ardhshëm.

Formula e fazës së tretë luhet me pikë të përgjysmuara, a do të ketë tolerime nga skuadrat që mund të kenë dalë nga objektivat e tyre?
-E përmenda edhe më sipër këtë fakt. Është një formulë që nuk të nxjerr dot jashtë realitetit dhe kjo për skuadrat që nuk rrezikojnë zbritjen një kategori më poshtë, por edhe te grupi i skuadrave që nuk do të kenë mundësi të kapin objektivat e tyre për kreun.

Në të dy grupet, në krye dhe në fundin e renditjes, si i mendoni verdiketet e këtij kampionati?
-Nisur nga vështirësia që sjell faza e tretë me përgjysmimin e pikëve, them se Vllaznia duhet të luftojë euforinë që mos rrezikojë kreun. Në këtë grup, Vorën e shoh të rënë nga kategoria, ndërsa Grupi B do të ketë më shumë rivalitet dhe këtu do të vendosin më shumë ndeshjet direkte.

Mjafton të keni parë një ndeshje të Tiranës gjatë vitit të kaluar dhee do të kuptoni që klubi bardheblu nuk ka pasur një marrëdhënie të mirë me tifozerinë e tyre, sidomos me tifo-grupin e shumtë në numër “Tirona Fanatics”. Midis palëve ka pasur “xixa” prej vitesh. Një goditje e fortë ishte dhe lënia në përdorim e stadiumit Selman Stërmasi klubit të Partizanit, vendim që u pasua me një bojkot. Por “grushti i nokautit” ishte rënia nga Kategoria Superiore për herë të parë në historinë e klubit.

Një vit tjetër me shkallë të zbrazura si ai që sapo kaloi, Do të ishte mëkat nëse sezoni i ri do të fillonte me të njëjtën problematikë. Tifozët sigurisht nuk blihen, por fitohen. Pyetja e madhe është çfarë duhet të bëjë Tirana që të fitojë tifozët. Tifogrupi kërkon dorëheqjen e presidentit Halili, por ai e ka bërë të qartë që nga “karrigia” e heq vetëm Zoti. Ndoshta një fillim i mirë drejt shtrëngimit të duarve do ishte një fitore në derbi, diçka që u mungon 24-herë kampionëve prej katër vitesh e 13 përballjesh direkte. Kriza vazhdon dhe nga kjo po dëmtohen të dyja palët.