Oltion Rapa

Mezani “bastis” Luftëtarin, vjen firma e radhës

Sport Ekspres — Thu, 20 Jun 2019 13:54:09 +0000

Gjilani ka bërë një tjetër përforcim. Pas brazilianit Xhekson dhe portierit Shkëlzen Rucci, këtë herë ka nënshkruar me skuadrën e drejtuar nga Gentian Mezani edhe mbrojtësi Oltion Rapa. “Xholi” i bluzinjve u largua nga Luftëtari si lojtar i lirë dhe zgjedhe kështu të vazhdojë karrierën në Kosovë.

“Oltion Rapa është futbollisti më i ri i skuadrës së Gjilanit. Mbrojtësi i qendrës sot ka nënshkruar me klubin kuqebardhë, që e mbanë atë pjesë të skuadrës së Gjilanit për dy edicionet e ardhshme.

Oltion Rapa, i lindur në Tepelenë, sezonin e kaluar ishte pjesë skuadrës nga Superioria në Shqipëri, KF Luftëtari. Rapa ishte lojtar prezent thuajse në të gjitha takimet e ish-skuadrës së tij, sikurse në ligën elitare të Shqipërisë, gjithashtu edhe në kupë, nga 4 vitet e kaluara sa ishte pjesë e Luftëtarit. Po ashtu Rapa kishte bërë paraqitje edhe në garat europiane me skuadrën gjirokastrite.

Mbrojtësi i ri i Gjilanit, Oltion Rapa, gjithë karrierën e tij e kishte kaluar në Shqipëri, kurse Gjilani do të jetë aventura e tij e parë larg kampionatit shqipëtar, ku ai kishte milituar gjatë këtyre viteve të karrierës së tij, dhe ku u formua si futbollist”, njofton klubi i Gjilanit.

Luftëtari “humb pjesët”, largohet edhe një

Sport Ekspres — Mon, 17 Jun 2019 12:53:23 +0000

Luftëtari humbet një tjetër titullar, lojtar “xhol” për çdo trajner që stërviti bluzinjtë në këto katër vite. Oltion Rapa, lojtari polivalent i gjirokastriteve, ka deklaruar sot mbylljen e bashkëpunimin me Luftëtarin dhe kjo ndodh pas katër sezonesh.

“Si çdo fillim ka dhe një fund, ndaj dhe sot ka ardhur momenti, pas 4 vitesh të mrekullueshme dhe të paharrueshme si lojtar i Luftëtarit. Ka qenë një privilegj dhe nder që kam veshur dhe luftuar për atë fanellë. Ndaj, para se të them mirupafshim, doja të falënderoja së pari presidencën, gjithë stafet teknike që kam punuar, pa përjashtim gjithë çunat e gjithë këtyre viteve që kemi punuar së bashku si një familje e madhe, gjithë tifozërinë e mrekullueshme të Luftëtarit, që na kanë mbështetur në çdo moment, duke lënë shumë miq të veçantë dhe shumë kujtime të bukura në jetën time . FALEMINDERIT GJIROKASTRA. Me Respekt, OLTI RAPA, MIRUPAFSHIM!”, shkruan Rapa në llogarinë e tij në “Facebook”.

Rapës i kishte përfunduar kontrata dhe tashmë pritet të mësohet skuadra e tij e re. Ofertat nuk i kanë munguar, si nga ekipe të kampionatit shqiptar, ashtu edhe nga Kosova dhe Maqedonia e Veriut. Mbetet të mësohet se ku do ta vazhdojë karrierën.

Rapa i Luftëtarit e pëson, tani sytë nga Karabeci

Sport Ekspres — Wed, 01 May 2019 08:41:03 +0000

Ndeshja e Kupës mes Luftëtarit dhe Tiranës pati pasoja për dy futbollistë të këtyre skuadrave. Përplasja mes Erando Karabecit dhe Oltion Rapës i ka penalizuar këta dy lojtarë, që munguan fillimisht në ndeshjen e kampionatit të dielën.

Për mbrojtësin e Luftëtarit është mësuar edhe shkalla e dëmtimit. Ai ka pësuar një tërheqje të ligamentit, që kërkon 4-6 javë për t’u rikuperuar. Sikurse kuptohet, sezoni për “xholin” e bluzinjve është në rrezik. Gjithsesi duhet parë se si do të shkoja faza e riaftësimit për Rapon.

Nga ana tjetër edhe Karabeci mori një goditje në gju dhe ditën e djeshme kishte programuar të bënte rezonancën magnetike. Tashmë pritet përgjigja nga mjekët, që do të përcaktojnë edhe shkallën e dëmtimit të kapitenit të Tiranës.