REAGIMI – “Klubi i Futbollit Tirana dënon ashpër gjykimin skandaloz në ndeshjen Kastrioti – Tirana. Përgjate 90 minutave të ndeshjes, gjyqtari Olsi Sokoli ka vendosur të ndikojë në rezultatin final të ndeshjes. Fillimisht ka provokuar me shprehje raciste futbollistin Michael Ngoo, e më tej ka dëmtuar skuadrën me vendimet arbitrare.

KF Tirana nuk është nxituar të dale në konkluzione, por ka pritur për të ndjekur reagimet e të gjithë aktorëve dhe faktorëve brenda e jashtë fushave të lojës si dhe ka analizuar pamjet filmike për gjithçka ka ndodhur. Gjyqtari Olsi Sokoli ka vepruar i vetëm, pa dëgjuar asistentet e tij, që në disa momente vendimtare të ndeshjes i kanë kërkuar të marrë vendime të drejta, tërësisht të ndryshme nga çfarë ai ka vendosur.

Fjalori me të cilin gjyqtari ka provokuar lojtarët e Tiranes dhe stafin teknik, janë një tjetër argument që bëjnë klubin të kërkojë një dënim radikal nga Federata Shqiptare e Futbollit dhe specifikisht nga Sektori i Arbitrimit.

KF Tirana kërkon përjashtimin nga futbolli të gjyqtarit Olsi Sokoli për një gjykim të paprecedent, komunikim ofendues dhe përdorimin e shprehjeve raciste kundrejt lojtarëve të Tiranës.

Gjithashtu ftojmë publikisht Shoqatën e Arbitrave, të reagojë kundrejt dhunës që në këtë rast ushtroi një gjyqtar futbolli përballë 11 futbollisteve, stafit teknik, stafit drejtues dhe të gjithë tifozëve bardheblu”, shkruhet në komunikatën e Tiranës.

Më pas, në sekondat e fundit të sfidës, më saktë në minutën e 90+4’, u ngrit një flamur për pozicion të parregullt, një pozicion shumë i dyshimtë. Ky episod mjaftoi që situata të agravonte në fund të takimit dhe në stadiumin “Flamurtari”, tifozët kuqezi ishin shumë të tensionuar.

Përveç tifozëve, reagoi dhe presidenti i klubit Sinan Idrizi, që bëri thirrje që futbolli shqiptar të mos degradojë. Edhe me anë të faqes së tyre në “Facebook”, klubi i Flamurtarit doli kundër gjyqtarit kryesor Olsi Sokoli. “Njeriu i takimit, Olsi Sokoli!”, kjo ishte ironia që faqja zyrtare e klubit publikoi disa minuta më parë.