Olsi Bregu

Merkato dhe përgatitjet, Bregu tregon planin e Apolonisë

Sport Ekspres — Fri, 28 Jun 2019 12:22:01 +0000

Për skuadrën e Apolonisë, muaji qershor ishte vendimtar për trajnerin e ri. Artan Mërgjyshi ishte i përzgjedhur dhe u mendua se do të sillte menjëherë emra të dëgjuar, por administratori i klubit fierak, Olsi Bregu, deklaron për SportEkspres.com se nuk do nxitohen në merkato. Fierakët fillimisht do nisin përgatitjet me lojtarët e sezonit të kaluar.

AKTUALITETI – “Tek Apolonia janë 15 lojtarë, të cilët ishin pjesë edhe në sezonin e kaluar. Kemi menduar që me këta t’i nisim përgatitjet e sezonit, duke marrë edhe disa lojtarë të rinj nga akademia jonë. Këta janë baza e skuadrës sonë, ndërsa hap pas hapi, deri në fillimin e përgatitjeve, do të kemi edhe 4-5 emra të rinj, të cilët do jenë në nivel cilësor”, tregon Bregu.

MERKATO – “Kam lexuar e dëgjuar një plan dëshirash të Apolonisë, por unë e quaj spekulim. Asgjë nuk është e vërtetë. Asnjë emër i publikuar mediatikisht nuk është në planet tona të merkatos. E kam marrë seriozisht merkaton dhe ju them se do kërkojmë 4-5 lojtarë që bëjnë diferencën. Si fillim mund ta nisim brenda Shqipërisë dhe gjithçka do të konkretizohet pas 15 korrikut”.

PËRGATITJET – “Kemi menduar që në datën 15 korrik të fillojmë përgatitjet me ekipin që e mbyllëm sezonin e kaluar. Do ta nisim këtu në Fier dhe më pas do të shohim si do ecin punët edhe me merkaton. Një plan për t’u përgatitur në plazh, apo vend malor, e kemi. Pas datës 15 korrik do të zbardhim edhe axhendën e përgatitjeve tona deri në fillimin e sezonit”, përfundoi administratori i Apolonisë.

AGRON KAJA

Bregu: Apolonia e falënderon Stojkun, trajneri i ri është gjetur!

Sport Ekspres — Thu, 13 Jun 2019 18:22:29 +0000

Sapo trajneri Gentjan Stojku deklaroi largimin e tij nga Apolonia, Sportekspres.com kontaktoi me administratorin e klubit fierak, Olsi Bregu, i cili u shpreh se kjo ndërprerje e marrëdhënieve kishte dy ditë, por sot u zyrtarizua.

MBYLLJA E BASHKËPUNIMIT ME STOJKUN – “E falenderojmë Stojkun për punën e mirë që bëri në këtë periudhë të shkurtër te Apolonia, por kontratën me të e kishim deri më 31 maj 2018. Ne menduam që të mos e vazhdojmë për sezonin e ri”.

TRAJNERI I RI – “Ne si klub kemi caktuar datën 20 qershor për ta bërë zyrtarisht publik emrin e trajnerit të ri të Apolonisë. Do jetë një emër i njohur në futbollin shqiptar, e do zgjedhim mes dy alternativave. Ne thuajse e kemi mbyllur marrëveshjen me njërin, mbeten edhe detaje shumë të vogla që nuk do ndikojnë në përfundimin e saj”.

AGRON KAJA

Bregu: Ua dhamë përgjigjen në Berat, edhe me Elbasanin për 3 pikët

Sport Ekspres — Fri, 26 Apr 2019 15:08:18 +0000

Apolonia, pasi fitoi në transfertë me Tomorin, këtë herë luan sërish jashtë dhe ndaj Elbasanit. Fierakët kërkojnë të respektojnë garën dhe e kanë premtuar diçka të tillë. Gjithsesi sjellja në fushë e ekipit bardhejeshil do tregojë gjithçka. Lojtarët, por së fundmi edhe një nga drejtuesit, administratori OIsi Bregu, premtojnë maksimumin.

Për SportEkspres.com, Bregu thekson se skuadra e tyre nuk është ndërtuar për kompromise, por për një futboll të pastër. “Apolonia është skuadër serioze dhe garën e ka vlerësuar maksimalisht. Në këtë fazë të tretë ka patur shumë aludime për skuadrën tonë, por nga fitorja jonë në Berat javën e kaluar besoj se e kanë marrë përgjigjen reale”, shprehet Bregu.

Zyrtari i Apolonisë premton se edhe në Elbasan gjithçka do të vendoset në fushën e lojës. “Në Elbasan është ndeshja e radhës dhe nga ana jonë është vlerësuar maksimalisht, ashtu si të gjitha ndeshjet e tjera. Edhe këtu janë tri pikë në lojë dhe ne do të jemi në fushë vetëm për të marrë fitoren”.

AGRON KAJA

Administratori Bregu: Tomori i mirëpritur, fusha vendos gjithçka

Sport Ekspres — Wed, 27 Feb 2019 12:25:29 +0000

Java e 19-të e Kategorisë së Parë rezervon një sfidë të veçantë në Grupin B, teksa do të ndeshen mes tyre Apolonia-Tomori. Prej disa kohësh ka patur një “luftë” virtuale mes klubeve, pasi Komisioni i Disiplinës vendosi që ndeshja e javës së 16-të mes këtyre dy ekipeve të regjistrohej me fitoren 0-3 të fierakëve në tavolinë. Gjithashtu pati edhe dënim fushe, si dhe pezullim të trajnerit Santiliano Dule dhe zëvendësit të tij, Arben Paja.

Dhe është faza e tretë që e përball përsëri këtë çift, por këtë herë në Fier. Apolonia renditet në vendin e dytë me 12 pikë dhe Tomori në vendin e 3-të me 9 pikë. Kuptohet në pesëshen e dytë të grupit B, ku luftohet për qëndrimin në Kategorinë e Parë.

Për SportEkspres.com, administratori i klubit të Apolonisë, Olsi Bregu, deklaron se asgjë e keqe nuk ekziston mes këtyre dy klubeve. Madje ai shton se gjithçka ndodhi në Berat i përket së shkuarës dhe te skuadra e tyre nuk ka asnjë ndikim për vazhdimësinë.

“Ajo ndeshje ka kaluar për ne dhe i përket së shkuarës. Nuk do të ketë asnjë ndikim negativ për vazhdimësinë, përkundrazi, në fundjavë ne do ta mirëpresim me shumë respekt Tomorin në Fier, pa asnjë kompleks nga ajo sfidë. Për ne është ndeshja e radhës dhe e hapur për çdo rezultat, që vetëm fusha do ta vendosë”, deklaroi administratori Bregu.

AGRON KAJA