Nouri

Gjesti i Klajvert i përlot të gjithë, i dedikon golin e parë ish-shokut të tij tek Ajaks

Sport Ekspres — Wed, 03 Oct 2018 09:13:08 +0000

Mbrëmjen e kaluar, Roma triumfoi në shifrat 5-0 ndaj Viktoria Pëlzen, në sfidën e vlefshme për “UEFA Champions League”. Përveç rezultatit ajo çka ra në sy gjatë ndeshjes ishte momenti i golit të realizuar nga Xhastin Klajvert, i cili ishte i pari me fanellën e Romës në Champions për të.

Holandezi, i cili u transferua këtë verë në kryeqytetin italian, më parë ka qenë aktivizuar me Ajaksin. Momentin e golit Klajvert e festoi me një dedikim ndaj ish-shokut të tij të skuadrës tek Ajaks, Abdelhak Nuri. I biri i Patrik Klajvert mban mbi shpinë gjithashtu numrin 34, në nder të mikut të tij. Pas golit të shënuar Klajvert tregoi përpara të gjithë tifozëve fanellën e Romës, me numrin 34 dhe me emrin e Nuri mbi fanellë.

Historia e trishtë e Nuri pothuajse dihet nga të gjithë. Ish-talenti i Ajaks, vitin e shkuar, më saktë në korrik, në një miqësore ndaj Verder Bremen, pësoi një atak kardiak. Pasi u transportua në spital dhe nën kujdesin e mjekve, Nuri pësoi dëmtime të mëdha në tru. Mesfushori ishte në koma për një kohë të gjatë, deri në muajin gusht të këtij viti, ku nga familjarët e tij u tha që 21-vjeçari ka një përmirësim.

Tragjedia “Nuri”: Dembele, Klajvert&Co. i bëjnë dedikimin prekës

Sport Ekspres — Tue, 14 Aug 2018 19:24:56 +0000

Abdelhak Nuri është emër që shumë pak vetë e njohin në Shqipëri. Djaloshi 21-vjeçar ishte dikur një ndër talentët më premtues të akademisë së mirënjohur të Ajaksit, si dhe kapiten i kombëtares së 19-vjeçarve të Holandës. E ardhmja dukej e ndritur… Por, një vit më parë në 8 korrik gjatë një miqësoreje ndaj Verder Bremenit, ndodhi tragjedia.

Nuri pësoi një atak kardiak dhe për ta bërë situatën më keq, mjekët e Ajaksit e neglizhuan situatën duke mos kryer procedurat e nevojshme për rregullimin e ritmit të zemrës së tij. Bluzat e bardha kujtuan se kishin të bënin me një marrje mendsh, por situata ishte më e rënda e mundshme.

Që prej atij momenti, Nuri, ose Api, siç e thërrasin të gjithë ndodhet në një koma artificiale në një prej spitaleve të Holandës. Doktorët nuk kanë më shpresa, por familjarët nuk pranojnë të fikin pajisjet që e mbajnë në jetë, dhe shpresojnë për një mrekulli nga lart.

Tragjedia e djaloshit, i cili konsiderohej Iniesta i ardhshëm ka prekur shumë lojtarë, të cilët kanë vendosur ta kujtojnë atë duke veshur në fanellë numrin e tij, 34-ën. Shokët e fëmijërisë Xhastin Klajvert (Roma) dhe Filipe Sandles (Mançester Siti) kanë marrë po të njëjtin numër. Amin Junes, ish-koleg i tij ka zgjedhur 34-ën të Napoli, ndërsa të njëjtin vendim ka marrë dhe talenti i Barcelonës Usman Dembele, i cili edhe pse nuk e njihte nga afër Nurin, është prekur shumë rëndë nga kjo tragjedi.

Nuri së bashku me dyshen e njohur të sulmit Luis Suarez dhe Klas-Jan Huntelar…

Drama e talentit të Ajaksit, dëmtim cerebral dhe fund karriere

Sport Ekspres — Thu, 13 Jul 2017 12:15:45 +0000

Ditë e zezë për Abdelhak Nurin dhe Ajaksin, sepse talenti i Holandës U19 nuk do të luajë më futboll, pas ngjarjes së para pak ditëve në miqësoren ndaj Verderit, ku futbollisti mbeti pa ndjenja në fushë dhe mes panikut u transportua në spital.

“Me dhimbje të thellë, Ajaksi mëson se Nuri ka pësuar dëmtime serioze dhe të përherhshme cerebrale. Lutemi për djaloshin tonë në një moment kaq të vështirë“, shkruan Ajaksi në faqen e vet zyrtare.

Abdelhak Nuri, mesfushor 20-vjeçar i kombëtares holandeze U-21, mbeti përdhe pa ndjenja, pa u goditur nga askush. Ndërhyrja e shpejtë e mjekëve, që përdorën edhe frymëmarrjen artificiale, bëri që djaloshi me origjinë marokene t’i shpëtonte vdekjes.

Një helikopter e transportoi në spital, ndërsa tani mësohet se bëhet fjalë për një dëmtim cerebral, që ndalon karrierën e futbollistit të pafat.