Norvegjia

VIDEO | Spanja e nis me “panenka”, triumf minimal ndaj Norvegjisë

Sport Ekspres — Sat, 23 Mar 2019 21:38:51 +0000

Spanja e ka nisur me këmbën e mbarë rrugëtimin në eleminatoret e Euro 2020, pasi ka triumfuar në shtëpi ndaj Norvegjisë me shifrat 2-1.

Ndeshja nisi menjëherë me dominimin e iberikëve, të cilët gjetën golin e avantazhit me anë të Rodrigo Morenos në minutën e 16-të.

Pavarësisht rasteve të shumta, pjesa e parë u mbyll me shifrat 1-0, ndërsa e dyta nisi me një surprizë. Norvegjia fitoi një 11-metërsh pas një faulli në zonë dhe Xhoshua King e shndërroi në gol, duke heshtur stadiumin dhe duke vënë baraspeshën.

Gjithsesi, barazimi zgjati vetëm gjashtë minuta, pasi Alvaro Morata u ndal në mënyrë të parregullt nga portieri norvegjez dhe arbitri akordoi një tjetër 11-metërsh, këtë herë në favor të Spanjës. Te pika e bardhë u paraqit Serxho Ramos, i cili shënoi me panenka.

KUALIFIKUESE EURO 2020
GRUPI F
Spanjë 2-1 Norvegji
Shënues: Rodrigo 16’, Ramos 71’(pen.) / King 65’(pen.)

Standings provided by Sofascore LiveScore

Ndërkohë, Greqia triumfoi pa probleme ndaj Lihteshtejnit në transfertë. Me nga një gol për çdo pjesë helenët siguruan tri pikët e para.

KUALIFIKUESE EURO 2020

GRUPI J
Lihteshtejn 0-2 Greqi
Shënues: Fortunis 45+1’, Donis 80’

Standings provided by Sofascore LiveScore

VIDEO | Çmenduri e Eljunusit, humb rastin e pabesueshëm ndaj Spanjës

Sport Ekspres — Sat, 23 Mar 2019 20:53:11 +0000

Spanja po bën detyrën ndaj Norvegjisë, teksa kur është mbyllur pjesa e parë po triumfon me shifrat 1-0. Golin e ka shënuar Rodrigo, por ajo që ka marrë të gjithë vëmendjen është padyshim rasti i humbur nga Norvegjia në minutën e 31-të.

Ishte sulmuesi Tarik Eljunusi, i cili në mënyrë të pabesueshme gaboi me portën e boshatisur. Ndoshta më e vështirë ishte të humbej ai rast se sa të shënohej…

Kundër çekëve qe fat, Gjermania do goleadë me Norvegjinë

Sport Ekspres — Mon, 04 Sep 2017 09:27:57 +0000

Pas fitores së mundimshme me Republikën Çeke 2-1, Gjermania sot do të presë Norvegjinë në “Mercedes-Benz Arena” të Shtutgartit. Nuk diskutohet se në shkallët e stadiumit numri i tifozëve do të jetë maksimal, edhe si mbështetje për Sami Khedirën, i cili rikthehet në shtëpi pas shtatë vitesh. Kampionët e botës, në fakt, praktikisht e kanë siguruar kualifikimin në Kupën e Botës, ndërsa shanset e Norvegjisë janë shumë të vogla.

Gjermanët e kanë mendjen më shumë te rekordi i ndeshjeve pa humbje dhe madje vetëm me fitore, diçka që janë thuajse në fund të kryerjes së saj. Ndeshja me çekët nuk qe më e mira për djemtë e Joakim Lëvit. Goli i fitores erdhi me vuajtje pas një goditjeje me kokë të Mats Humelsit.

Norvegjia është një rival modest për “pancerat”. Kombëtarja nordike është në vështirësi prej disa kohësh dhe pritet të mungojë edhe një herë në turneun e ëndërruar. Në ndeshjen e fundit ka ardhur një fitore 2-0 kundër Azerbajxhanit, por paraqitja e norvegjezëve nuk ka qenë aspak bindëse. A do të arrijnë sot të bëjnë surprizën? Shumë vështirë. Në mediet vendëse, këtë e besojnë vetëm një në 100 votues “online”.

Lëv pritet ta nisë ndeshjen me dyshen Kros-Khedira në mesfushë, me sulmuesin Verner sërish si pykë dhe me Drakslerin në krahun e majtë të ofensivës. Me këtë formacion Norvegjia vështirë se mund të shënojë, por futbollit kurrë nuk i dihet.