Njukasëll

Benitez nuk e harron, merr ish-sulmuesin e Njukasëll në Kinë

Sport Ekspres — Mon, 15 Jul 2019 20:15:01 +0000

Rafa Benitez u transferua në kampionatin kinez për të drejtuar Dailan Jifang, që luan në elitën e futbollit të shtetit aziatik. Siç raportojnë mediet angleze, spanjolli do të marrë me vete edhe Salomon Rondon. Sulmuesi ka punuar vitin e kaluar si i huazuar me Benitez, duke qenë një nga të pëlqyerit e tij. Ai është pronë e Uest Bromuiç.
29-vjeçari do të transferohet në kampionatin kinez për të luajtur në të njëjtën skuadër, ku drejton Benitez. Bashkimi me ish-trajnerin e tij është arsyeja kryesore, që e bind venezueljanin të luajë në Kinë. Mbetet për t’u mësuar shifra e transferimit dhe kontrata që do firmosë bomberi.

Rondon luajti rregullisht sezonin e fundit me Njukasëll. Ai numëron 30 ndeshje si titullar dhe e ka dërguar 11 herë topin në rrjetë. Latini ka numra të mirë edhe me asistet, ku regjistron 7 të tillë në Premier Ligë. Ai ishte edhe pjesë e Kupës së Amerikës me kombëtaren venezueljane, ku u eliminuan nga Argjentina në çerekfinale.

Vjen shansi i artë për Xherard, ofertë nga klubi i njohur i Premier Ligës

Sport Ekspres — Mon, 08 Jul 2019 07:48:59 +0000

Stivën Xherrard nuk ia doli të rikthente Rejnxhër te titulli kampion. Hendeku me rivalët e Selltik është ende shumë i lartë, por trajneri anglez u ka mbyllur gojën shumë kritikëve të cilët besonin se legjenda e Liverpulit do të ishte një ndër lojtarët e shumtë më emër që do dështonin si trajner.

Puna e mirë e 39-vjeçarit ka tërhequr vëmendjen e pronarit të Njukasëll, Majk Eshli. Largimi i Rafa Benitez drejt Kinës ka lënë pa pronar stolin e skuadrës nga verilindja e Anglisë. Miliarderi anglez i ka ofruar ish-kapitenit të Anglisë një kontratë 4-vjeçare.

Në ditët në vazhdim pritet që Xherard të vendosë për të ardhmen. E sigurt është që paratë do kenë pak efekt te Xherard, pasi pasuria nuk i mungon. Rejxhërs i dha shansin e parë si trajner dhe një ndarje e tij do të shikohej si një tradhti nga tifozët dhe drejtuesit e skuadrës skoceze, por sigurisht ndaj një emri si Xherard nuk do të kishte pengesa nëse ai do të kërkonte largimin.

Rikthimi në Premier Ligë? Venger flet hapur!

Sport Ekspres — Thu, 27 Jun 2019 20:18:50 +0000

Arsen Venger ka më shumë se një vit i papunë dhe kjo verë pritet të tregojë më shumë rreth të ardhmes së tij. Pas 35 vitesh gjithsej, ndër to 22 në Londër, Venger nuk është lodhur dhe dëshiron akoma të vihet në drejtim të një skuadre. Njukasëll është një nga alternativat. Pas ikjes së Benitez, francezit i është ofruar posti i trajnerit të bardhezinjve.

Venger ka folur rreth këtyre thashethemeve. Ai shprehet se është i hapur për oferta, por nuk mund të mendojë se do të kthehet në stol brenda një kohe kaq të shkurtër. Mendon se ka akoma nevojë për pushim. Ka drejtuar mbi tre dekada pa pushim dhe kjo ndalesë po i shijon. Kështu, Njukasëll do i duhet të shikojë për të tjerë emra.

“Do kthehem të trajnoj, por jo në të ardhmen e afërt. Nuk është pikërisht tani momenti për t’ju khyer punës. Jam më i hapur tani se para një viti rreth ofertave që vijnë, por nuk mund të them se do kthehem në punë pas dy apo tre ditësh. Kam bërë një shkëputje dhe po e shijoj. Kam punuar 35 vite pa asnjë ndërprerje, kështu që mendoj se e meritoj këtë pushim”, u shpreh 69 vjeçari.

Zbulohet takimi sekret, Gatuzo italiani i radhës drejt Premier Ligës?

Sport Ekspres — Tue, 23 Apr 2019 13:10:10 +0000

E ardhmja e Xhenaro Gatuzos në stolin e Milanit është në dyshim. Drejtuesit e kanë mbështetur gjithmonë, edhe atëherë kur rezultatet kanë munguar. Megjithatë, raporti me Leonardon nuk ka arritur të bëhet kurrë perfekt.

Në mes është kualifikimi në Champions Ligë, por Gatuzo mund të largohet edhe nëse ia del të rikthejë kuqezinjtë në futbollin elitar. Sipas raportimeve të mediave italiane, trajneri kalabrez ka darkuar para dy javësh me Horge Mendez. Gatuzo ka një raport respekti të dyanshëm me agjentin e famshëm portugez.

Ky i fundit po punon për të gjetur një ekip jashtë Italisë për Gatuzon. Në skenë ka dalë Premier Liga, më saktë Njukasëlli. “Qymyrxhinjtë” nuk po arrijnë që të gjejnë gjuhën e përbashkët me Rafa Benitez për të rinovuar kontratën dhe trajneri i Milanit do të ishte zgjidhja ideale për ekipin anglez.

“Çmendet” klubi kinez, ofertë faraonike për Rafa Benitez

Sport Ekspres — Sun, 19 Aug 2018 13:36:57 +0000

Një ofertë e çmendur ka ardhur në drejtim të Rafa Benitez. Trajneri i Njukasëllit është objektivi i Tianzhin Kuanzhian dhe drejtuesit e ekipit kinez kanë gati ofertën për të. Siç citon britanikja “Mirror”, Benitez e pret një rrogë prej 33 milionë eurosh në sezon.

Klubi i Tianzhin kërkon shërbimet e teknikut spanjoll për sezonin e ardhshëm dhe Benitez vështirë se do refuzojë milionat kinezë. Atij i skadon kontrata me Njukasëllin në fund të sezonit dhe vështirë se do të rinovojë, pasi marrëdhëniet me klubin anglez nuk janë të mira. Trajneri priste një merkato më cilësore, por klubi nuk ia plotësoi dëshirën.

Spanjolli pritet të mbyllë sezonin aktual me ekipin anglez dhe në verën e ardhshme, ai do të fluturojë drejt Kinës për t’u ulur në stolin e ekipit, që aktualisht renditet në vendin e 11 në kampionatin kinez.