Një rikthim për Laçin, rikuperohet mesfushori

Sport Ekspres — Wed, 12 Dec 2018 15:41:54 +0000

Laçi po mendon për ndeshjen e radhës me Tiranën. Kurbinasit kërkojnë të rikthehen te fitorja pas dy ndeshjeve të fundit me Kamzën e Flamurtarin (regjistruan një barazim dhe një humbje). Pritet që të debutojë në Superiore edhe Besnik Prenga, i cili pritet të mbërrijë në Shqipëri dhe të marrë drejtimin e bardhezinjve pas largimi të Migen Memellit.

Për takimin me Tiranën ai do të ketë të gatshëm edhe një prej lojtarëve që solli në verë të kurbinasit. Mesfushori Nikola Eller mungoi në ndeshjen me Flamurtarin, teksa mjekët i kishin dhënë disa ditë pushim.

Së fundmi kroati është bashkuar me grupin dhe do të jetë i gatshëm për takimin kundër bardhebluve. Këtë javë te kurbinasit nuk ka asnjë të pezulluar, ndërkohë që do të vijojë të qëndrojë për shkak dëmtimi Bojan Najdenov. Maqedonasi rikthehet në mesin e janarit, pasi ka bërë një ndërhyrje në një nga gishtat e këmbës.

Xhixha rikthehet, Laçi sytë nga Nikola Eller

Sport Ekspres — Tue, 30 Oct 2018 10:54:24 +0000

Laçi do të kërkojë të reagojë në Gjirokastër me Luftëtarin pas dy humbjeve të pësuara me Teutën dhe Kukësin. Bardhezinjtë do të kenë të gatshëm për takimin e radhës sulmuesin Redon Xhixha, i cili e ka shlyer pezullimin prej kartonit të kuq që mori me durrsakët.

I riu është një element i rëndësishëm në formacionin bardhezi dhe trajneri Mërgjyshi do ta ketë në dispozicion. Ndërkohë mbetet për t’u parë gjendja e Nikola Eller, mesfushorit kroat që u dëmtua disa ditë para ndeshjes me Kukësin.

Gjasat janë që Eller të jetë gati, por fjalën e fundit do ta japin mjekët. Në Gjirokastër, sikurse dihet, ndeshja do të luhet pa praninë e tifozëve. Komisioni i Disiplinës i ka dënuar bluzinjtë pas ndeshjes me Skënderbeun për shkak të sendeve të hedhura në fushë.