Zisi te Kamza? Ballshiotët zbulojnë gjithçka

Sport Ekspres — Mon, 13 Aug 2018 14:07:45 +0000

Bylisi kërkon të rikthehet në Superiore, por ndërkohë tenton edhe të gjejë të rinj interesantë në rrethe, por edhe jashtë vendit. Një nga lojtarët e zbuluar vjet është edhe sulmuesi anësor Niko Zisi. I riu, i cili mbush 23 vjeç më 24 gusht, pritet që sezonin e ardhshëm të luajë në Superiore.

Ballshiotët konfirmojnë se janë në bisedime me Kamzën dhe marrëveshja mes palëve është afër. Presidenti Besnik Kapllanaj ka refuzuar disa oferta për sulmuesin deri më tani. Zisi nuk ishte bashkuar në stërvitje me Bylisin dhe largimi i tij ishte thuajse i sigurt. Tanimë mësohet edhe destinacioni i ri.

Rasti Myrto Uzuni dhe guximi për Niko Zisin

Sport Ekspres — Fri, 27 Jul 2018 10:53:33 +0000

Dy vite e gjysmë te Apolonia dhe Laçi bëri atë që se bëri asnjë ekip: pagoi për kartonin e Myrto Uzunit. Pashk Laskës i kishte ikur njëherë mundësia ta merrte anësorin nga Tomori dhe e pagoi me para gabimin e parë. Gjithsesi nuk ka dalë i humbur.

Për 23-vjeçarin ishin interesuar edhe klube të tjera të Superiores, duke nisur nga Partizani, Kukësi, Tirana e Skënderbeu. Askush nuk paguante. “Merr letrat dhe hajde”, kështu i thoshin të gjithë. Asnjë nuk shkonte në zyrën e presidentit të Apolonisë, Koço Kokëdhima, dhe të bënte një ofertë për të blerë kartonin e tij.

Uzuni feston kualifikimin me Lacin | Foto: Petrit Pashollari

Pas një sezoni me 17 gola në Kategorinë e Parë, Laçi bëri ofertën e vet dhe fierakët pranuan. Uzuni zhvilloi sezonin e parë të plotë në Superiore dhe me fanellën bardhezi shënoi dhjetë gola në kampionat dhe një në Kupë. Gjithashtu ai realizoi kundër Anorthosis Famagusta, duke i dhënë kualifikimin në turin e dytë kurbinasve.

Përfaqësues të Lokomotivës së Zagrebit, dhe jo vetëm, ishin të pranishëm në stadium dhe e panë. Beratasi mund të shitet këtë verë dhe Laçi është klubi që përfiton. Guxoi të paguajë për të dhe po vjel frytet. Por në Kategorinë e Parë ka edhe elementë të tjerë që presin shansin Superiore.

Një nga ata është Niko Zisi. Tirana e ka “piketuar” prej kohësh, por sulmuesi anësor ka kontratë afatgjatë me Bylisin. Nga ana tjetër ballshiotët ja kanë vënë çmimin: 30 mijë euro. Po aq kushtoi edhe Uzuni, ai që mund të shitet 10-fish më shumë.

Për të shkuar te 300 mijë eurot, duhet guxuar. Mbush 23 vjeç në gusht dhe ka pasaportë greke, një plus për t’u transferuar më pas jashtë vendit. Vjet ka shënuar nëntë gola me Bylisin dhe në Superiore do të kishte një motivim ekstra për të treguar vlerat e tij. Të shohim kush do ketë guximin ta blejë…

/VLADIMIR PRENGA/