Zaniolo ka arritur ta mbyllë mjaft mirë boshllëkun e lënë nga ikja e mesfushorit belg, ku tifozët tashmë e kanë harruar krejtësisht “ninxhan”. Pesë gola të shënuar në 23 ndeshje, ku më të rëndësishmit janë padyshim ato dy gola ndaj Portos një javë më parë në Champions.

Së fundmi, 19-vjeçari ka folur për mediat italiane, ku është shprehur se i duhet të qëndrojë me këmbë në tokë, pasi i duhet të punojë akoma më shumë që të vijojë me të tilla paraqitje.

“Shpresoj të jem një përfaqësues i mirë i gjeneratës time dhe shpresoj që të vijoj me këto paraqitje. Më duhet të qëndroj me këmbë në tokë. Çdokush pret shumë kur luan në këto nivele, por talenti nuk është gjithçka. Duhet të jesh i zgjuar dhe të punosh fort gjithashtu.”

Gazeta italiane “Corriere Dello Sport”, ka zbuluar listën e pagave te Roma dhe Zaniolo mban vendin e parafundit të listës me një pagë bazë prej 250 mijë eurosh që me anë të bonuseve të ndryshme mund të kapë deri në 700 mijë euro . I vetmi futbollist që paguhet më pak se 19-vjeçari është portieri i tretë i verdhekuqve, Daniel Fuzato, i cili ka një pagë sezonale prej 500 mijë eurosh.

Për t’i dhënë të riut atë që i takon, drejtuesit e Romës i kanë përgatitur një kontratë të re me lojtarin. Me marrëveshjen e re, Zaniolo do të përfitojë 1 milionë e gjysmë euro në sezon, çka do ta bëjë të ndihet i barabartë me pjesën tjetër të lojtarëve