Geri Nevill ka luajtur një jetë me “Djajtë e Kuq”, ekipi me të cilin ka fituar gjithçka. Sot ndjen trishtim të madh për këtë grup lojtarësh. Ish-mbrojtësi nuk kursehet aspak për lojtarët e Junajtid dhe ka një këshillë për trajnerin Solskjaer.

“Hadërsfilldi ka vuajtur shumë sivjet, nuk kanë cilësi, por më pëlqyen më shumë se ata lojtarët që ishin veshur me të kuqe. Jam i ndershëm në këtë që po them. Asgjë nuk më pëlqen nga skuadra aktuale e Solskjaer. Mjaftoni t’i shikoni, janë grupi më i dëshpëruar dhe dorëzuar që ekziston.

Këta nuk shihen me sy dhe nuk e kuptoj se çfarë mund t’i pëlqejë Ole kësaj skuadre, që nuk është skuadër. Ky Junajtid më kujton Totenhemin e Poçetinos në vitin 2014. Mauricio sapo kishte ardhur dhe në ekip kishte lojtarë si Adebajor, Kabul dhe Kapoe, lojtarë pa shpirt skuadre, por filloi ta çmontonte pak nga pak atë ekip. Ole duhet të bëjë të njëjtën gjë. Mendoj se ka nevojë për një drejtor sportiv, i cili do e ndihmonte shumë.”