Nestor Martinena

Starova e ka me argjentinasit: Martinena, një “fantazmë”!

Sport Ekspres — Mon, 24 Sep 2018 09:42:22 +0000

Sulejman Starova është nga ata që prodhon lajm në thuajse çdo gjë që thotë. Ish-trajneri i Partizanit, i cili së fundmi provoi një eksperiencë në Kosovë me Feronikelin, është rikthyer në Shqipëri dhe është i ftuar i përjavshëm në emisionin “Rubrika Sportive” në RTSH.

Pas ndeshjes Partizani-Flamurtari ai u kap me Torasën, argjentinasin e vlonjatëve. Tani shënjestra e Starovës është Nestor Martinena. Sulmuesi i Kamzës ende nuk ka shënuar në kampionat dhe për teknikun ai në ndeshjen me Kukësin ishte një fantazmë.

“Duro po i bën gjërat mirë aty, por Kamza vuajti edhe sepse ai vendosi të mbante 90 minuta në fushë Martinenën. Argjentinasi ishte fantazmë dhe kjo e penalizoi Kamzën. Duhet që ta themi këtë”, ka thënë mes të tjerash Starova në analizën e tij gjatë emisionit.

500 golat e Martinenës dhe si e ka gjetur futbollin shqiptar

Sport Ekspres — Thu, 16 Aug 2018 12:30:21 +0000

Nestor Martinena do të jetë sërish pjesë e Superiores. E ka provuar më parë të bëjë mirë me Dinamon dhe ftesës së drejtorit sportiv të Kamzës, Andit Matraxhiut, sulmuesi argjentinas i është përgjigjur pozitivisht.

“Jam kthyer sepse një nga drejtuesit më kërkoi këtu. Ekipi më duket i mirë, kam ardhur të bëj gjëra të mëdha. Futbolli shqiptar është rritur shumë. Do të jetë një sfidë personale edhe për mua”, thotë mes të tjerash në “Supersport”.

Si sulmues që është, Martinena ka edhe objektiva për numrin e golave, por nuk e zbulon: “Dua të bëj maksimumin. Po të ishte e mundur do shënoja 500 gola. Skuadra është e mirë, kemi sulmues të rrezikshëm dhe mbrojtës të fortë”.

Në fund një koment edhe për ndeshjen me Tiranën: “Është një ndeshje futbolli, nëse jemi në formë të mirë fitojmë. Nuk e di gjendjen e tyre, por di që Dinamo, Partizani dhe Tirana janë klube më të mëdha.

Ekskluzive: Ofertë nga Superiorja për Nestor Martinenën

Sport Ekspres — Wed, 01 Aug 2018 11:52:04 +0000

E mbani mend Nestor Martinenën? Në vitin 2010 linte elitën e futbollit argjentinas dhe provonte Kategorinë Superiore. Sulmuesi, tashmë 31 vjeç, vishte fanellën e Dinamos dhe me blutë u aktivizua në 27 ndeshje. Shënoi vetëm 6 gola, por ra në sy për paraqitjet e tij. Atë vit shkoi në finalen e Kupës së Shqipërisë me kryeqytetasit, por nuk triumfuan dot kundër Tiranës.

Në verën e vitit 2011 u rikthye në Argjentinë dhe luajti në ligën e dytë të vendit të tij. Ka provuar të luajë edhe në të tretën, sikurse edhe në Kili e Ekuador. Në këto dy vende është aktivizuar në elitë. Me Fuerza Amarilla në Ekuador u aktivizua nga janari i vitit 2017 deri në korrik.

Më pas ka kaluar te Sportivo Desamparados, ku ka luajtur 18 ndeshje, duke shënuar vetëm një gol. Gjithsesi për sulmuesin në vendin tonë ekziston një mendim pozitiv, ndaj edhe së fundmi është kontaktuar nga një klub i Superiores.

“SportEkspres.com” mëson se Kamza është në bisedime me sulmuesin, i cili ende nuk ka vendosur për të ardhmen e tij. Një rikthim në Shqipëri për të nuk përjashtohet, por sigurisht kërkon që të marrë edhe një ofertë të kënaqshme në aspektin financiar.

Nga ana tjetër Kamza po mundohet të afrojë një lojtar goli, pasi me largimin e Raçic dhe Plakun që ka nënshkruar me Kukësin, është e nevojshme që për trajnerin Bledar Devolli të ketë alternativa cilësore. Martinena e njeh Superioren dhe mendohet se mund t’i bëjë punë skuadrës periferike të kryeqytetit.