Merkato, Devolli hedh sytë nga Maqedonia e Veriut

Sport Ekspres — Wed, 26 Jun 2019 18:40:29 +0000

Këto ditë të nxehta të qershorit, administratori i Devollit, Nesti Binishi, është duke vëzhguar për lojtarë tregun maqedonas të futbollit. Për SportEkspres.com, ai deklaron se për sezonin e ri mundet që te skuadra e tyre të afrohen dy lojtarë nga Maqedonia e Veriut dhe thekson se stafi drejtues ka qenë në kontakte me futbollistë të veçantë shqiptarë, por gjatë muajit korrik do vendoset.

“Gjatë këtij muaji kemi qenë në kontakte me grupin e futbollistëve që mbyllën sezonin e kaluar me Devollin, por edhe kemi bërë biseda me futbollistë të veçantë. Unë kam biseduar me dy futbollistë maqedonas, por gjithçka vendoset në fillimin e muajit korrik, kur edhe është planifikuar që skuadra të nisë përgatitjet për sezonin e ri”, është shprehur Binishi.

Duke ditur se kjo skuadër është nën administrim nga Bashkia e Bilishtit, data 30 qershor e planifikuar për zgjedhjet vendore duket se është bërë si një “mur Berlini” për merkaton, por edhe për vazhdimësinë e skuadrës. Edhe trajneri Stavri Nica ka deklaruar se ende është i pa konfirmuar për stolin, ndaj deri tani nuk ka patur asnjë lëvizje në hyrje e dalje te Devolli.

AGRON KAJA

Infrastruktura dhe merkato, Binishi zbulon planet e Devollit

Sport Ekspres — Sat, 08 Jun 2019 08:14:58 +0000

Nga FSHF-ja janë vendosur kritere për licencimin e skuadrave në të gjitha kategoritë, ndërkohë që në të Parën ka skuadra të cilat ende kanë mangësi në infrastrukturë. Ndërsa Devolli debutues ka avantazh fushën në parametra shumë cilësore, por disa ndërhyrje në ambientet e stadiumit kanë nisur nga drejtuesit e klubit. Vetë Drejtori i Devollit, Nesti Binishi, për SportEkspres.com deklaron se sezoni i ri do nisë me shumë përmirësime, me një stadium në parametra cilësorë.

INFRASTRUKTURA – “Ne kemi një fushë shumë cilësore, që ka qenë një avantazh për suksesin që arritëm në sezonin e kaluar. Për sezonin e ri, në tërësi me infrastrukturën ne jemi të gatshëm në 80% të saj. Deri në nisjen e sezonit të ri gjithçka do përmirësohet, sipas detyrave që ka lënë Sektori i Licencimit në FSHF. Përjashtuar ekipin e stafin teknik që janë pushim, administrata e punonjësit e klubit janë të gjithë në punë për të përmirësuar gjithë ambientet në stadium”.

SKUADRA – “E siguruam synimin final që u ngjitëm në Kategorinë e Parë, edhe pse e humbëm finalen me Tërbunin. Tashmë i gjithë ekipi që mbylli sezonin dhe stafi teknik janë me pushime, ndërsa administrata e klubit është në punë pa ndalim. Në tërësi, ekipi i Devollit tregoi cilësi të admirueshme dhe në Grupin B e mbylli pa humbje”.

MERKATO – “Rikonfirmimet për sezonin e ri te skuadra e Devollit kanë nisur nga trajneri Nica, si dhe me 90% të skuadrës që e mbylli sezonin e kaluar. Jemi në biseda për 3-4 ndërhyrje shumë cilësore, të cilat në fundin e muajit qershor do t’i bëjmë zyrtare. Po punojmë për një skuadër dinjitoze, jo vetëm për t’u treguar debutues në të Parën”.

AGRON KAJA