Nemanja Janicic

“Fshesa” e radhës te Luftëtari, largime në mbrojtje e sulm

Sport Ekspres — Tue, 22 Jan 2019 20:29:16 +0000

Vazhdojnë largimet te Luftëtari. Ditën e sotme bluzinjtë janë ndarë me mbrojtësin Nemanja Janiçiç dhe sulmuesin anësor Romario Cekaj. Largimi i dy lojtarëve e çon në gjashtë numrin e të larguarve nga gjirokastritët gjatë merkatos së dimrit. Vetëm Kastrioti i vendit të fundit ka një numër më të madh të larguarish në Kategorinë Superiore.

Kontrata midis futbollistëve dhe klubit është prishur me konsensus. Largimi i boshnjakut peshon më shumë, sepse 32-vjeçari ishte një ndër lojtarët me më shumë minuta te Luftëtari ,me 14 aktivizime si titullar. Pas largimit të Janiçiçit, trajneri Gentian Mezani ka në dispozicion vetëm Oltion Rapën dhe Rustem Hoxhën për repartin e qendrës së mbrojtjes.

I riu Cekaj nuk gjeti hapësira te skuadra gjirokastrite, ku gjatë pjesë së parë të kampionatit u aktivizua në vetëm tre takime të Kategorisë Superiore.

Ofertë boshnjake për “gjigantin” e Luftëtarit

Sport Ekspres — Fri, 18 Jan 2019 10:42:47 +0000

Luftëtarit i janë larguar deri më tani tre titullarë. Vasil Shkurtaj dhe Eduart Rroca u shitën te Kukësi, ndërkohë që Lejdi Liçaj e mbylli me bluzinjtë pasi i përfundoi kontrata. Sa i takon afrimeve, momentalisht janë zyrtarizuar Realdo Fili dhe Mërgim Neziri.

Ndërkohë mediat malazeze një ditë më parë kanë raportuar se edhe Balsa Radoviç po mendon largimin nga bluzinjtë. Tashmë në skenë ka dalë edhe një ofertë që ka marrë mbrojtësit qendror Nemanja Janiçiiç.

Futbollisti 34-vjeçar ka luajtur rregullisht si titullar me bluzinjtë në pjesën e parë të sezonit dhe normalisht largimi i tij do ta dobësonte Luftëtarin. Raportohet se Borac Banja Luka, ish-skuadra e tij në Bosnje Hercegovinë, i ka bërë një ofertë shtatlartit.

Janiçiç është nën kontratë me Luftëtarin dhe largimi i tij nuk mund të ndodhë pa “OK” e bluzinjve. Mbetet për t’u parë se çfarë do të ndodhet në ditët në vijim. Problemet e pjesës së parë të sezonit mund ta kenë vënë në dilemë mbrojtësin, i cili një rikthim në shtëpi do e mirëpriste.

Probleme për Luftëtarin, dy lojtarë lënë stërvitjen

Sport Ekspres — Thu, 01 Nov 2018 20:15:53 +0000

Luftëtari po përgatitet për ndeshjen e së shtunës me Laçin, por ka probleme së fundmi me dëmtimet. Sikurse raporton “Supersport”, dy prej lojtarëve titullarë të mbrojtjes kanë pësuar dëmtime dhe kanë lënë në mes seancën stërvitore.

Nemanja Janiçiç dhe Xhekson Ferrera janë lojtarët që rrezikojnë të mos jenë të gatshëm për takimin kundër kurbinasve. Alternativat për stafin teknik të Luftëtarit nuk mungojnë për të ndërtuar formacionin, por gjatë ndeshjes do të ishin të kushtëzuar në zëvendësime.

Me rikthimin e Liçajt, në qendër krah Rustem Hoxhës mund të luajë Oltion Rapa. Për krahun e majtë Demo është alternativë, por edhe Donald Rapo. Trajneri Mezani do të mendohet mirë për formacionin, ndërkohë që i gatshëm për ndeshjen me Laçin është edhe Albano Aleksi.

Mesfushori është rikuperuar pas ndërhyrjes në gju që pat bërë, por me shumë mundësi këtë javë nuk do ta nisë nga minuta e parë. Synimi i bluzinjve është që ta kalojnë me sukses përballjen me kurbinasit dhe vlerësimi për këtë takim është maksimal, pasi kundërshtari jo më kot renditet në vendin e katërt në klasifikim.