Nedim Bajrami

Shqiptari i Grasshopers pranë largimit, trajneri konfirmon interesin e lartë

Sport Ekspres — Wed, 12 Jun 2019 19:29:13 +0000

Pas më shumë se 7 dekadash në Superligën Zvicerane Grasshopers ra në divizionin e dytë. Në një intervistë për “SRF”, trajneri i ri i Grasshopers, Uli Forte, pranoi se talenti shqiptar Nedim Bajrami mund të largohet nga klubi pasi interesi për të është i lartë.

“Duam të vazhdojmë me projektin me shumë prej lojtarëve të rinj që kemi në skuadër, një ndër to është dhe Bajrami, por nuk është dhe aq e thjeshtë pasi dihet që për ka interes të madh”, tha trajneri Forte.

Futbollisti 20-vjeçar ka qenë pjesë e formacionit titullar të Grasshopers prej dy sezonesh. Mediet zvicerane kanë folur për një interes të kampionëve të Jang Bojs për lojtarin e lindur në Tetovë.

Bajrami ka qenë pjesë e rregullt e grupmoshave të Zvicrës, ndërsa përveç helvetëve mund të zgjedhë të përfaqësojë Shqipërinë ose Maqedoninë e Veriut.

Empoli nxiton për Veselin, Torino “piketon” një shqiptar

Sport Ekspres — Fri, 30 Nov 2018 15:17:48 +0000

Frederik Veseli është pjesë e Empolit që prej verës së vitit 2016, ndërkohë që skuadra italiane e ka në planet e saj afatgjata mbrojtësin shqiptar. Sikurse raporton “Gazetta dello Sport”, së fundmi ka pasur bisedime për nënshkrimin e kontratës së re.

Marrëveshja e Veselit me Empolin është e vlefshme deri në verën e vitit 2021, ndërkohë tanimë ekipi i Serie A është gati t’ia zgjatë atë edhe me një vit tjetër. Mbrojtësi 26-vjeçar këtë sezon ka luajtur shpesh si titullar.

Dëmtimet e kanë penalizuar disa herë, por stafi teknik e ka përdorur shpesh edhe në të majtë të mbrojtjes. Veseli është një “xhol” që luan në disa pozicione. Ai mund të pozicionohet në të gjithë pozicionet e prapavijës, ndërkohë që mund të zhvendoset edhe në qendër të mesfushës.

Nedim Bajrami

Një tjetër lojtar shqiptar mund të kalojë në Serie A. Torino po kërkon një mesfushor dhe drejtuesit e klubit granata e kanë ndarë mendjen. Siç citon “La Stampa”, klubi italian është vënë në ndjekje të Nedim Bajramit.

19-vjeçari me origjinë nga Tetova është pjesë e Grasshoperit dhe aktivizohet në rolin e qendërmesfushorit. Në garë për shërbimet e lojtarit të Zvicrës U21, i cili është aktivizuar me të gjitha kombëtaret e moshave të vendit helvetik, është dhe Bolonja e Inzagit, por Torino ndodhet në avantazh.

Arlind Ajeti i habit të gjithë, Lenjani asist për Kasamin

Sport Ekspres — Sun, 11 Nov 2018 17:32:08 +0000

Arlind Ajeti i ka habitur të gjithë, teksa sot është parë në fushë për Grasshopers. Mbrojtësi qendror u dëmtua në ndeshjen me Bazelin dhe u tha se do të mungonte deri në fund të dhjetorit. Përplasja me të vëllanë, Albianin, bëri që të luante vetëm 45 minuta në atë takim.

Grasshopers fitoi 2-3 kundër Ksamaks. Arbnor Fejzullahi nuk luajti asnjë minutë për skuadrën e tij, ndërkohë që protagonist ishte Nedim Bajrami. Ky i fundit shënoi golin e dytë për skuadrën nga Zyrihu. Bujar Lika u detyrua ta ndiqte ndeshjen nga stoli.

Fitore për Sionin e Emir Lenjanit, madje me përmbysje. Anësori i majtë i shërbeu skuadrës së tij duke asistuar për Kasamin në golin e barazimit, ndërkohë që në minutën e 78-të u zëvendësua. Për t’u përmendur që në Ukrainë Besir Demiri nuk mori asnjë minutë në ndeshjen që Mariupol humbi 4-0 me Dinamo Kiev.