Alternativat ishin disa, por në fund kavajasi ka qenë alternativa e menduar si më e përshtatshme për Egnatian. Ditën e hënë rrogozhinasit pritet të dalin në stërvitje dhe mbeten për t’u parë cilët lojtarë nga sezoni i shkuar do të vazhdojnë të mbrojnë sërish ngjyrat e Egnatias.

Sa i takon trajnerit Kashami, ai më parë ka drejtuar skuadrën e Luzit, për të bashkëpunuar më pas edhe me klube si Apolonia dhe Besëlidhja. Për të është eksperienca e parë në krye të Egnatias.

Por për SportEkspres.com, Kashami e mohon te jetë kontaktuar nga drejtuesit e klubit fierak. “Nuk kam asnjë kontakt me drejtuesit e Apolonisë. Edhe unë kam lexuar në media se ata më kishin në planet e tyre, por me sa duket këto janë thashetheme mediatike të merkatos dhe jo reale. Gjithsesi, unë kam patur para disa javësh ofertë nga një skuadër e Kategorisë së Parë, por duke qenë me administrim nga bashkia nuk e pranova”.

Ndriçim Kashami u bë i njohur në pankinat e futbollit shqiptar para tre vitesh, teksa drejtoi Apoloninë dhe në sezonin e kaluar Besëlidhjen për një periudhë të shkurtër. Në sezonin që sapo u mbyll, Kashami më shumë ka qenë i pranishëm në media, kryesisht në rolin e opinionistit e parashikuesit të ndeshjeve, vetëm për ato në Kategorinë e Parë.

AGRON KAJA

Ndriçim Kashami, ish-trajneri i Apolonisë dhe Besëlidhjes, në një prononcim të dhënë për SportEkspres.com është shprehur:  “Mendoj se java e 26-të ka katër sfida të vështira, tre prej tyre shumë delikate për mbijetesën. Të gjitha skuadrat në zonën Play-out që luajnë këtë javë janë në ethet e mbijetesës. Një fitore e Burrelit e nxjerr Vorën matematikisht nga e Para, ndërsa në Shënkoll mund të kemi edhe ndonjë surprizë. Delikate janë ndeshjet Tomori-Elbasani dhe Apolonia-Turbina. Nga rezultatet e tyre do të kemi më shumë ngjeshje në renditjen e mbijetesës”.

Më tej ai shton: “Vllaznia dhe Bylisi i dhanë bukuri garës në Play-off dhe e merituan ngjitjen në Superiore. Ndërsa pas kësaj jave, në garën e Play-out do të ketë më shumë dritë për vazhdimësinë në të dy grupet, sepse vetë renditja e skuadrave të rrezikuara e mban pezull këtë situatë”.

AGRON KAJA

“Për Kategorinë e Parë do të ishte më mirë një kampionat me tre faza por pa këto mini-grupet, sepse që këtu duket si formulë e dështuar. Ndërkohë që këto ndërpreje e këpusin fare garën”, kështu theksoi ish-trajneri i Besëlidhjes në këtë bisedë.

INTERVISTOI: AGRON KAJA

Si i përshkruani rezultatet e javës së 20-të e Kategorisë së Parë, në të dyja zonat?
-Më shumë spikat fitorja e Veleçikut me Vorën, që e nxori nga lufta për mbijetesë. Fitorja e Korabit me Erzenin ishte një tjetër ndeshje për t’u veçuar. Shijakasit tashmë duken të dalë nga lufta për vendin e parë në grup.

Në këndvështrimin tuaj, ishin të pritshme apo surpriza këto rezultate?
-Të pritshme i mendoj të gjitha rezultatet e skuadrave që luajnë në Play-off për të dyja grupet, ndërsa ato të zonës Play-out ndoshta mund të ishin ndryshe.  Vetëm në Grupin B do të kemi rivalitet deri në fund. Mes Bylisit e Besës gjithçka do të vendoset në sfidën direkte mes tyre, ndërsa Vllaznia e ka të shtruar rrugën e kreut të grupit. Ndoshta mes Elbasanit e Turbinës mund të ketë ndonjë të papritur.

Futbolli gjatë këtij muaji ndalet në dy javë, sa i shërben kjo ecurisë së garës?
-Këto ndërpreje e këpusin fare garën. Në periudhën tetor-nëntor ato ndikuan për mirë te skuadrat, sepse ishte fillimi i sezonit, ndërsa tani i takon që një skuadër e cila kishte pushimin në kalendar, të luajë pas tre javësh një ndeshje zyrtare.

Sa efikase duket formula e fazës së tretë në Kategorinë e Parë?
-Ne si shqiptarë e gjejmë diçka për ta prishur garën, e në këtë rast është kjo formula e fazës së tretë. Për Kategorinë e Parë do të ishte më mirë një kampionat me tre faza, por pa këto mini-grupet, sepse që këtu duket si formulë e dështuar.

INTERVISTOI: AGRON KAJA

Si rinisi Kampionati i Kategorisë së Parë me javën e 15-të?
-Mendoj se në tërësi të gjitha ndeshjet u luajtën në normalitetin e tyre, por duke e përjashtuar rezultatin e ndeshjes Egnatia-Orikumi 0-1, i cili nuk ishte menduar i tillë. Ndërkohë që edhe ndeshja Erzeni-Vllaznia 2-0 nuk pritej me këtë rezultat, ishte tipike një sfidë për Superioren.

Duke i parë rezultatet e kryesueseve në të dy grupet, si e shikoni rivalitetin në vazhdimësi?
-Në të dy grupet do të ketë më shumë rivalitet në ndeshjet e tjera, sidomos në tre sfidat e fazës së dytë. Erzeni e bëri edhe më të bukur rivalitetin me Vllazninë në kreun e Grupit A, ndërkohë që Bylisi e Besa do ta mbajnë këtë ritëm rivalësh për kreun e Grupit B.

Humbja e Egnatias me Orikumin, e komplikon situatën për Lushnjen, Apoloninë e Tomorin për një vend në pesë skuadrat e para të Grupit B?
-Në fakt, rivaliteti mes këtyre tre skuadrave për një vend në pesë skuadrat e para të grupit, mendoj se do të jetë më konkret në ndeshjet direkte mes tyre. Madje që në javën e ardhshme ku Apolonia luan në Berat me Tomorin, ndërsa fitorja e Orikumit do ta rritë më shumë rivalitetin.

Në Grupin A fiton Vora dhe humbet Shënkolli, do të kemi edhe këtu rokada vendesh në fundin e renditjes?
-Në Grupin A, java e 15-të solli dy lëvizje në kahje të kundërta të renditjes. Me firoren ndaj Dinamos, Vora mendoj se do ta shfrytëzojë deri në fund matematikën për të shpresuar mbijetesën, dhe fitorja me Dinamon besoj do ta bëjë edhe më të fortë luftën me skuadrat e tjera.

Të mërkurën luhet ndeshja e fundit e javës së 15-të, Iliria-Burreli, si e parashikoni përfundimin e saj?
-Do të jetë një ndeshje shumë e fortë, për vetë pozicionin që kanë dy skuadrat në fundin e renditjes në Grupin A. Iliria ka patur probleme gjatë muajit janar dhe nuk është stërvitur plotësisht, ndërsa Burreli është organizuar më mirë, ka bërë edhe përforcime me emra cilësorë.

Tre javë para mbylljes së fazës së dytë, si e mendoni konfigurimin e renditjeve tek të dy grupet?
-Do të jetë luftë sportive shumë e fortë, pasi skuadrat do të kërkojnë të marrin sa më shumë pikë në tre ndeshjet e fazës së dytë. Nuk mendoj se do të ketë ndryshime të dukshme në të dy grupet, ndoshta me lëvizje të vogla në mesin e renditjeve. Grupi B pritet me shumë balotazhe.

Në sezonet e kaluara të Kategorisë së Parë, kavajasi Ndriçim Kashami drejtoi Apoloninë e Besëlidhjen, ndërkohë që aktualisht është pa skuadër. Ai e vlerëson për më shumë emocion sezonin e kaluar kur ishte Tirana në këtë kategori, ndërsa thekson se aktualisht këtu ka shumë tension.

INTERVISTOI: AGRON KAJA

Aktualisht jeni pa skuadër, i ndiqni ekipet që keni drejtuar në Kategorinë e Parë?
-Patjetër që i ndjek, por mes nostalgjisë se bëra punë të mirë tek të dyja, ndjej keqardhje se nuk mu vlerësua produkti. Gjithsesi, si Apolonia ashtu edhe Besëlidhja në këtë sezon duket se kërkojnë të jenë në pesë vendet e para. Kështu si po paraqiten, besoj se do t’ia arrijnë.

Apolonia apo Besëlidhja, cila nga këto dy skuadra është “dashuria” juaj?
-Nuk i ndaj dot të dyja. Te Apolonia punova më gjatë, dhe te fierakët gjeta një klub shumë institucional. Ndërsa te Besëlidhja ndjeva lodhje nga rruga e gjatë e përditshme, e do dëshiroja që të ishin të dyja kryesuese të grupeve. Tashmë duhet të fokusohen në pesë të parat e grupeve.

Ju si e mendoni ecurinë e këtyre skuadrave, pa Kashamin në bankinë?
-Në 12 javët e luajtura, ecuria e Apolonisë dhe e Besëlidhjes ka qenë brenda mundësive e realitetit të tyre. Apolonia duhet të kishte marrë më shumë pikë dhe të ishte konkurrente për kreun në grup. Unë e quaj fidanishte në futbollin tonë, edhe pse Kategoria e Parë luhet me  tension.

Në tërësinë e 12 javëve të luajtura, ju si e vlerësoni Kategorinë e Parë të këtij sezoni?
-Në sezonin e kaluar mendoj se kishte më shumë emocion, ndoshta nga që kishte Tiranën në përbërjen e saj. Këtë sezon të dy grupet duken shumë të polarizuara: në Grupin A, Vllaznia komandon në krye e Vora në fund, në Grupin B, Bylis e Besa për kreun dhe Turbina në fund.

Të shtunën nis java e 13-të e Kategorisë së Parë, si e parashikoni Besëlidhjen në transferë me Vllazninë dhe Apoloninë që pret Elbasanin?
-Nëse Apolonia mendohet se e ka më të lehtë fitoren me Elbasanin, Besëlidhja në Shkodër mendoj se duhet të bëjë një lojë të mirë, pasi favorite për fitore mbetet Vllaznia. Si kryendeshje e kësaj jave mendoj Bylis-Besa, e cila do vendosë kryesisht për kreun e Grupit B.

Me këtë ecuri që po tregojnë 20 skuadrat e Kategorisë së Parë, mendoni se renditja është e formatuar edhe për fazën e tretë?
-Janë edhe gjashtë javë të fazës së dytë dhe gjithçka mund të ndodhë, në kuptimin e ndryshimeve në renditjen e të dyja grupeve. Por nuk besoj se do të ndryshojnë skuadrat e kreut dhe ato të fundit në renditje, ndoshta do të ketë ndonjë lëvizje vetëm në mesin e tabelës.

“Ndarja dhe përqafimi deri përlotje sot me djemtë e ekipit më vuri në vështirësi. Sigurisht që e kishin lexuar mesazhin që dukej në fytyrën time. Kokat i kishin ulur sa që nuk u dallohej as dhe fytyra, ndoshta ngaqë janë burra dhe nuk donin të tregonin sytë e përlotur. Gjithsesi po tentoja të kontrolloja zërin. Këtë e bëja për të përmbajtur lotët, nuk më takonte të tregohesha emocional, megjithëse nuk ishte e mundur të ndalohej”, shkruan Kashami.

Më tej ai shton: “Në futboll askush nuk është i sigurt për rezultatin dhe kjo nuk përbën mëkat. Kam dëgjuar që trajnerin e duan vetëm ata që luajnë në formacion, por nga eksperienca ime kam përjetuar që janë përlotur edhe rezervat me largimin tim. Çfarë ndjesie kur gëzon dashuri dhe respekt maksimal nga ata që ti i trajnon. Djem të mrekullueshëm, mirëkuptim perfekt, trajnim i cili nuk më bënte ta ndjeja fare lodhjen e udhëtimit të përditshëm, skema të realizuara mjeshtërisht, një intensitet pune europian i gërshetuar me zbavitje, një rivalitet i pa parë, një harmoni e lartë, një dashuri në kufijtë e vëllazërores. Ky është privilegj”.

Në fund ka edhe falënderime. “Falënderoj pa masë presidencën, që më besoi stafin tim mjaft profesional dhe besnik, djemtë e mrekullueshëm të ekipit. Nuk më besohet që nuk do punoj më me ju. E di që bashkëpunimi jonë ka shkuar në nivelet e paharrueshmerisë. Mos harroni që kemi qenë realisht kampionë të lartë të profesionalizmit. Por ky është futbolli, që ‘vret’ kampionë, ‘vret’ dhe ëndrra. Kemi Zotin me vete do të thotë ‘jemi kushdo e kemi gjithçka’… Jam i lumtur që nuk do ta harrojmë kurrë njëri-tjetrin. Faleminderit ZOT”, shkruan Kashami në llogarinë e tij në “Facebook”.

Gjithsesi gjithçka u mbyll pas pesë javësh. Humbjet me Vllazninë dhe Erzenin kanë bërë teknikun Kashami të reflektojë dhe të largohet. Arsyet ai i shpjegon qartë në një prononcim të shkurtër për “Sport Ekspres”.

“Më mëritën shumë dy humbje radhazi, por edhe largësia bëri punën e vet. Të udhëtosh çdo ditë 172 kilometra është sfilitëse. Meqë u ndërpre kampionati,  ishte koha e mjaftueshme të mos prishja edhe punën në vazhdimësi të ekipit. U largova dhe i uroj suksese Besëlidhjes në vazhdimësi”, ishin fjalët e teknikut Kashami, i cili është larguar i përlotur duke u përqafuar me lojtarët, që gjithashtu nuk janë përmbajtur në ato momente.