Tirana sot ka dalë edhe me një qëndrim dhe ankohen për gjykimin dhe zgjatjen e lojës, por kurbinasit nuk pranojnë që të jenë ndihmuar. Jo vetëm kaq, por ata japin disa raste ku pretendojnë se janë dëmtuar. Drejtori i bardhezinjve, Naim Halili, liston episodet e ndeshjes dhe thekson se ndeshja duhet të ishte ndërprerë.

“Pretendojmë që goli i shënuar nga Sentamu duhej anuluar, sepse një nga lojtarët e Tiranës i kishte zënë rrezen portierit tonë. Sikurse shihet në video, ai ka qenë në pozicion jashtë loje.

Minuta e 52-të, një tjetër rast. Lojtari i Tiranës, konkretisht Grent Halili, ishte në pozicion jashtë loje. Në vazhdim u shkaktua penallti dhe lojtari ynë, Sefgjini, u ndëshkua me karton të verdhë.

Në minutën e 65-të kishte një rast tjetër, ku asistenti dhe kryesori e dhanë dhënë gol. Është dashur ndërhyrja e arbitrit të katërt që të anulohej ai gol i shënuar nga Halili.

Kobina, në minutën e 71-të, duhet të ishte larguar nga fusha e lojës me karton të kuq. Ndërhyrja e tij ndaj lojtarit tonë Eller ishte brutale.

Në minutën e 94-t, lojtari ynë Najdanov është ndëshkuar me pa të drejtë me karton të kuq. Dhe në minutën e 95-të loja duhet të ishte ndërprerë përfundimisht, pasi arbitri Bregasi mori një goditje në kokë me shishe.

Këto janë rastet, pasi t’i shikoni pretendimet e Tiranës, mund të më thoni se ku është favorizuar Laçi në këtë ndeshje. Ne jemi të viktimizuar nga ai gjykim skandaloz i treshes Meta, Bregasi, Agaraj”, shprehet Halili.

NËNTË MINUTAT SHTESË – “Shtesa mbi shtesë ishte shumë e sakte. U bë një zëvendësim, ku hyri Doka në vend të Halilit. Në minutën e tretë shtesë doli me karton të kuq lojtari ynë Najdenov dhe mjekët u futën në fushë për t’i ardhur në ndihmë gjoja Hasanit, pasi ai ua vodhi kartonin e kuq arbitrave duke aktruar shumë mirë. Tjetra, në minutën e 95-të u godit edhe anësori dhe aty përsëri u vonua loja. Për mendimin tim aty arbitri duhet ta kishte anuluar ndeshjen. Nisur nga gjithë arsyet e mësipërme, ne jemi të bindur që arbitrimi ishte në dëm të ekipit të Laçit”, deklaroi drejtori i Laçit.

INCIDENTI – Halili, ndër të tjera ka folur edhe për atë që ndodhi në korridore pas përfundimit të ndeshjes: “Kjo është videoja që tregon qartë që lojtari i Tiranes, Majkëll Ngo, me një sjellje prej vagabondi, fillon dhe ofendon në drejtim të ekipit tonë. Më e keqja mundohet të sulmojë presidentin e ekipit tonë. Kjo situatë ka sjellë edhe ato reagimet e stafit tonë deri sa stjuartët kanë qetësuar përfundimisht situatën. Edhe lojtari Sefgjini është goditur nga Ngo, Imami, dhe Doka. Kjo është e vërteta”.