Mbrojtësi i djathtë shkëlqeu sezonin e fundit, duke luajtur thuajse 3000 minuta në Superiore, por ka vendosur ta ndërpresë bashkëpunimin dy-vjeçar me Laçin, sepse ka vendosur të kthehet në Kosovë dhe një arsye e fortë ka qenë edhe familja.

Gjithsesi, Musaj është larguar në mënyrë miqësore, në përfundim të kontratës, ndërsa sot ka postuar një mesazh për Laçin, presidentin Laska dhe lojtarët e tifozët.

“Unë zyrtarisht do të vazhdoj karrierën time gjate këtij viti tek KF Drita e Gjilanit. Kam kënaqësinë të jem pjesë e këtij klubi. Do të jap maksimumin tim që të zhvilloj loje të bukur në futbollin kosovar, njëkohësisht t’iu ofroj më të mirën tifozëve të klubit “Intelektualët”. ?

Gjithashtu, dua të falënderoj edhe klubin KF Laçi, bashkëlojtarët për lojërat që i kemi luajtur bashkë. Faleminderit tifozëve dhe presidentit Pashk Laska për përkrahjen e vazhdueshme plot dy vite”.

Para disa ditësh ai ka pasur një bisedë edhe me presidentin Laska, që i ka bërë një ofertë atij, por ka vendosur të kthehet në Kosovë dhe një arsye e fortë ka qenë edhe familja, duke u shkëputur nga Shqipëria pas dy vitesh.

Sezonin e fundit 22-vjeçari shkëlqeu, duke luajtur thuajse 3000 minuta në Superiore.

Kushtrim Lushtaku kaloi para pak ditësh nga Kukësi te Trepça ’89 dhe do ketë mundësinë të luajë në turin paraeliminator të Ligës së Kampioneve. Gjatë këtyre ditëve kampionët e Kosovës kanë zyrtarizuar disa afrime dhe po punojnë për të bërë edhe të tjera. Në listën e tyre është edhe Drilon Musaj, i cili për katër sezone ka qenë pjesë e ekipit nga Mitrovica. Burime pranë klubit të Trepçës ’89 konfirmojnë se po punohet për ta rikthyer mbrojtësin e linjës së djathtë. 22-vjeçari për dy vite ka luajtur me skuadrën e Laçit, teksa sezonin e fundit ka qenë një nga pikat më të forta të skuadrës dhe është aktivizuar në 34 ndeshje, ndërsa dy të tjerat i ka humbur për shkak të plotësimit të kartonëve të verdhë. Gjatë pjesës së parë të sezonit është aktivizuar shpesh edhe si qendërmesfushor, për shkak të problemeve që ka pasur skuadra e Laçit me dëmtimet, ndërkohë që ka luajtur edhe si mesfushor i djathtë. Musaj nuk ka mundur të shënojë në kampionat, por e ka bërë këtë në Kupën e Shqipërisë ndaj Bylisit, që i ka realizuar një dygolësh.

Mbrojtësi momentalisht po shijon pushimet pranë familjes së tij dhe po shqyrton ofertat në drejtim të tij. Veç Trepçës dhe Laçit ka edhe disa oferta të tjera nga jashtë vendit, ndaj kërkon që të mos nxitohet. Aktualisht nga Laçi është larguar Emanuel Mensah dhe Bruno Lulaj, ndërkohë që deri në këto momente nuk ka asnjë afrim. Drejtuesit e kurbinasve po punojnë për afrimin e disa elementëve cilësorë, ndërkohë që pritet që presidenti Laska të ketë një takim me trajnerin Nica, për të diskutuar se ku duhet ndërhyrë konkretisht. Sulmi është “thembra e Akilit” dhe me gjasa ai do të vijë nga jashtë vendit. Kërkimet kanë nisur dhe menaxherë të ndryshëm kanë bërë sugjerimet e tyre, por te Laçi përgjithësisht synohet që futbollistët të shihen në fushën e blertë dhe më pas të firmoset. Kjo mënyrë pune zor se do ndryshoje, sigurisht përjashtim bën ndonjë element cilësor që njihet apo ka një “CV” të pasur.