Mujkic

Zyrtare, lojtari i Tomorit transferohet në Kosovë

Sport Ekspres — Fri, 12 Apr 2019 18:11:32 +0000

Futbollisti Armin Mujkiç ka nënshkruar me skuadrën e Llapit. Ish-futbollisti i Tomorit në Kategorinë e Parë ka zgjedhur ekipin nga IPKO Superliga për të vazhduar karrierën e tij. Zyrtarizimin e tij e bëri vetë klubi i Llapit, që me anë të faqes zyrtare në “Facebook”, prezantoi lojtarin.

Njoftimi i Llapit:

Zyrtare: Armin Mujkiç nënshkruan me Llapin

Podujevë, 12 prill 2019 – Gjatë ditës së sotme me Llapin ka nënshkruar kontratë 1 vjeçare e gjysmë edhe mbrojtësi i majtë, Armin Mujkiç. Armin Mujkiç ,25 vjeç, i gjatë 1.90 m dhe i lindur më 10 mars 1994 në Bosnje Hercegovinë. Është mbrojtës i majtë dhe qendërmbrojtës. Ai ka luajtur për Mladost Kakanj, NK Visoko, Nybro dhe së fundi Tomorin e Beratit. I dëshirojmë mirësardhje dhe suksese nën fanellën bardhekaltër, Arminit!

Mujkiç ka luajtur 17 ndeshje këtë sezon me Tomorin, 16 si titullar, ku ka shënuar dhe dy gola. Mbrojtësi ka qenë një nga lojtarët më të mirë në Kategorinë e Parë dhe Llapi i ka besuar, duke siguruar firmën e tij.

Largime nga Tomori, mbrojtësi boshnjak rikthehet në vendlindje

Sport Ekspres — Mon, 11 Mar 2019 20:21:18 +0000

Skuadrës së Tomorit do t’i duhet të bëjë pa shërbimet e mbrojtësit Armin Mujkiç për pjesën e mbetur të sezonit. Mbrojtësi boshnjak ka kërkuar leje nga klubi për t’u rikthyer në vendlindje, për shkak të disa problemeve personale.

Klubi i ka dhënë lejekalimin dhe mbrojtësi është larguar. 25-vjeçari ka luajtur 17 ndeshje këtë sezon me Tomorin, 16 si titullar. Po ashtu, boshnjaku ka shënuar dhe dy gola, duke qenë një nga lojtarët më të mirë për skuadrën beratase.

Tomori nën presion, Devolli kërkon fitoren e parë në Berat

Sport Ekspres — Fri, 19 Oct 2018 21:38:57 +0000

Të premten paradite Tomori ka mbyllur përgatitjet për sfidën e radhës në kampionat, kundër Turbinës në Berat. Është ndeshja e tretë shtepiake epr trajnerin Bledar Devolli, i cili ende nuk e ka shijuar fitoren para tifozëve beratas dhe presioni sa vjen e shtohet.

Fitorja është detyrim, për shkak të rezultateve të fundit aspak të mira, ndërsa renditja është ndërlikuar dhe një fitore do të rikthente qetësinë.

Qendërmbrojtësi boshnjak Armin Mujkiç, titullar i rëndësishëm te beratasit, është i bindur se kthesa do vijë: “Jemi stërvitur mirë këto dy javë dhe jemi të bindur që këtë radhë nuk do të gabojmë”.