Moura

VIDEO | Lukas Moura, një makth që ndjek nga pas Mathijs De Ligt

Sport Ekspres — Sun, 21 Jul 2019 18:15:21 +0000

Të gjithë e mbajmë mend gjysmëfinalen e Champions League mes Totenhemit dhe Ajaksit sezonin e shkuar. Me një këmbë në finale, Ajaksi dukej i destinuar për sukses, por një tripletë e Lukas Mouras bëri që De Ligt me shokë ta mbyllnin aventurën e tyre në Champions.

Sot, Moura dhe De Ligt vunë sërish përballë, tashmë me fenomenin holandez si lojtari më i ri i Juventusit. Debutimi për 19-vjeçarin erdhi në minutën e 63-të dhe vetëm dy minuta më pas, Moura i riktheu makthet e sezonit të shkuar.

Në minutën e 65’, braziliani shënon një gol shumë të bukur, duke u shpërtuar markimit të De Ligt dhe mbrojtjes juventine. Ai gol çoi shifrat në 2-2, ndërsa Moura do të ishte protagonist edhe në golin e Heri Kejn, që vulosi fitoren 3-2 të Totenhemit në minutat e fundit.

“Emeri më shkatërroi”, heroi i Totenhemit tremb Arsenalin!

Sport Ekspres — Fri, 10 May 2019 20:46:31 +0000

Arsenali dhe Totenhemi janë dy klube që nuk e duan aspak njëri-tjetrin. Rivaliteti i Londrës Veriore është rritur shumë, sidomos në vitet e fundit, pasi tashmë ekipet janë thuajse në të njëjtin nivel. Trajneri i Arsenalit, Unai Emeri, dhe heroi i Totenhemit, Lukas Moura, kanë punuar së bashku te PSG.

Ishte pikërisht Emeri ai që e largoi brazilianin nga kryeqyteti francez dhe në atë kohë, “L’Equipe” kishte zbuluar një bisedë të Mouras: “Emeri më shkatërroi, largohem me lot në sy nga këtu”. Marrëdhëniet mes Emeri dhe Mouras nuk janë dhe nuk kanë qenë aspak të mira. Ironike është, se Emeri e shiti brazilianin pikërisht te rivalët e betuar të skuadrës së tij të ardhshme dhe gjërat po marrin për mbrapsht.

Arsenali nuk do kurrsesi që Totenhemi të fitojë Champions League dhe deri në finale, ishte pikërisht Moura që i dërgoi “Gjelat”. Duket tashmë, se është braziliani ai që po “shkatërron” trajnerin spanjoll.

Koeçidenca e bukur e numrave 27, heronjtë Moura dhe Origi në shifra

Sport Ekspres — Fri, 10 May 2019 16:50:18 +0000

Divok Origi dhe Lukas Moura kanë qenë emrat më të përfolur në këto ditët e fundit, për shkak se ishin këta dy futbollistë që i dhanë kualifikimin skuadrave të tyre për në finalen e madhe të Ligës së Kampionëve. Si sulmuesi belg, ashtu dhe ai brazilian, nuk janë lojtarë kyç për trajnerët e tyre, por treguan se kur e kanë mundësinë, janë aty për t’u shndërruar në protagonistë.

Origi dhe Moura kanë disa të përbashkëta shumë interesante: TË dy mbajnë në fanellë numrin 27. Të dy kanë një të kaluar në kampionatin francez, njëri me Lilën, tjetri me PSG-në. Si Origi, ashtu dhe Moura, nuk shënuan asnjë gol në Premier League sezonin e shkuar.

Sezonin 2014-15, Moura dhe Origi janë përplasur kundër njëri-tjetrit në Francë, kur të dy ishin në një moshë shumë të re (21 dhe 19 vjeç). Pikërisht në atë sezon, të dy futbollistët shënuan nga 7 gola në Ligue 1. Sot, janë finalistë të UEFA Champions League dhe po të mos ishin ata, skuadrat e tyre do ta ndiqnin nga shtëpi finalen e Madridit.

Dy vite mungesë te “Seleçao”, sulmuesi i Totenhemit merr ftesën e shumëpritur

Sport Ekspres — Tue, 09 Oct 2018 07:33:21 +0000

Kombëtarja e Brazilit do të luajë në gjatë kësaj jave dy ndeshje miqësore ndaj Arabisë Saudite dhe Argjentinës. Një dëmtim në grumbullim i sulmuesit anësor të Gremios, Everton, ka bërë që trajneri i pesë herë kampionëve të botës, Tite, të rikthejë një emër që mungonte prej kohësh në listat e grumbullimit të kombëtares braziliane.

Bëhet fjalë për Lukas Mourën, i cili ka lënë pas sezonin katastrofik që kaloi te PSG-ja (vetëm 72 minuta gjatë të gjithë vitit) dhe po shkëlqen në Angli, ku aktivizohet rregullisht si titullar te skuadra e Totenhemin.

Paraqitja e fundit e 26-vjeçarit me Brazilin daton në qershorin e 2016-ës. Pas momentit të keq që Moura kaloi te PSG-ja, shumë vetë menduan se ai e kishte mbyllur njëherë e përgjithmonë “kapitullin” e tij me kombëtaren braziliane, por në fund Moura ja doli të tregojë se mbetet një lojtar tepër cilësor.