Moize Kin

Shënoi me U21 e Italisë, talenti i Juventusit thyen një tjetër rekord

Sport Ekspres — Tue, 16 Oct 2018 12:42:06 +0000

Përfaqësuesja U21 e Italisë fitoi dje miqësoren përballë Tunizisë me rezultatin 2-0. Parixhini kaloi djemtë e Di Biaxhos në avantazh në minutën e 33-të, ndërsa gjashtë minuta më vonë, Moize Kin dyfishoi rezultatin nëpërmjet një penalltie.

Një gol historik për sulmuesin e talentuar të Juventusit. 18-vjeçari bëhet i pari futbollist i lindur në shekullin e ri, i cili shënon me përfaqësuesen U21 të Italisë.

Një tjetër rekord i thyer nga Kin, i cili në vitin 2016 u bë i pari lojtar i shekullit të ri që debutoi në Serie A dhe në Champions, në moshën 16-vjeçare, ndërsa në maj të vitit 2017, Kin shënoi përballë Bolonjës, duke u bërë lojtari i parë i këtij shekulli, që shënon gol në një nga pesë kampionatet më të forta të Europës.

Synimi i radhës i sulmuesit bardhezi është aktivizimi me Juventus. Ai është në kërkim të minutave me ekipin e Alegrit, por konkurrenca është shumë e madhe.

Oferta nga Franca për talentin e Juventusit

Sport Ekspres — Mon, 10 Sep 2018 17:17:52 +0000

Marseja nuk i ndahet Serisë A dhe mbas blerjes së Kevin Strotman, klubi francez kërkon shërbimet e Moize Kin. Talenti i Juventusit pëlqehet shumë nga trajneri Rudi Garsia.

Marseja po pret merkaton e janarit për të trokitur në dyert e klubit torinez siç citon “Le10Sport”. 18-vjeçari shihet si një nga lojtarët e rinj më premtues dhe vështirë që Juventus do të heqë dorë nga shërbimet e tij, por Marseja kërkon përforcimin e repartit ofensiv dhe do të provojë të gjejë akordin me bardhezinjtë dhe lojtarin.

Ai ka karakteristikat e duhura për sulmuesin që kërkon Garsia dhe ardhja e tij në Francë do të shtonte energjinë e sulmit të Marsejës.

Parma kërkon gola, në sulm për Balotelin dhe yllin i ri të Juventus

Sport Ekspres — Thu, 02 Aug 2018 17:01:01 +0000

Parma është rikthyer në Serinë A dhe po punon për të ndërtuar një ekip të fortë. Drejtuesit e klubit janë në kërkim të një sulmuesi, i cili do mbante peshën e repartit ofensiv, por që mbi të gjitha, do të siguronte gola.

Drejtori sportiv i Parmës, Daniele Faxhiano, ka patur një takim në Montekarlo me menaxherin e famshëm Mino Rajola. Mario Baloteli dhe Moize Kin janë dy emrat që i interesojnë verdhebluve. Të dy këta lojtarë janë nën menaxhimin e Rajolës.

Sa i përket Balotelit, ai dëshiron rikthimin në Itali, por ka edhe një vit kontratë me Nicën, e cila tenton të marrë maksimumin nga shitja e tij. Super Mario ishte pranë Marsejës, por ai dëshiron të rikthehet në kombëtaren italiane dhe Parma shihet si një pistë shumë e mirë për të.

Ndryshe situata për talentin e Juventusit. Sulmuesi me origjinë nga Bregu i Fildishtë, por që mbron ngjyrat e Italisë, shihet si një nga të rinjtë më premtues. Së fundmi ai shkëlqeu me Italinë U-19, duke arritur finalen e kompeticionit. Në finalen e humbur me rezultatin 2-3 përballë Portugalisë, 18-vjeçari ishte autori i dy golave të Italisë. Faxhiano është pranë akordit me Rajolën për kalimin e Kin te Parma, por mbetet të arrihet marrëveshja me Juventusin, i cili zotëron kartonin e lojtarit.