Moize Kean

Arsenali kërkon sulmues, troket në dyert e Juves

Sport Ekspres — Wed, 24 Jul 2019 10:09:27 +0000

Arsenali ka arritur akordin me Real Madrid për transferimin e Dani Sebajos në Londër. “Topçinjtë” nuk duan të ndalen në merkato dhe kanë nisur sulmin për një tjetër lojtar ofensiv.

Moize Ken është i preferuari i Unai Emeri dhe drejtuesit e Arsenalit ofrojnë 35 milionë euro për kartonin e sulmuesit të Juventusit. Kontrata e Ken me bardhezinjtë përfundon verën e ardhshme dhe rinovimi nuk po vjen, si pasojë e kërkesave të Raiolës për rritjen e rrogës së 19-vjeçarit.

Lojtari me origjinë nga Bregu i Fildishtë kërkohet edhe nga Evertoni e Borusia e Dortmundit, por Arsenali ndodhet një hap para. Juventusi është dakord, por kërkon të fusë klauzolën e riblerjes pas dy vitesh për shumën e 40 milionë eurove.

Një rast i ngjashëm me mënyrën se si veproi Real Madrid me Alvaro Moratën. Kjo është pika që ndan “Zonjën” me Arsenalin. Anglezët janë kundër përfshirjes së kësaj pike dhe janë gati të ofrojnë deri në 40 milionë euro për blerjen e përhershme të sulmuesit të talentuar.

Babai e shtyn drejt “armiqve”: Ka qenë ëndrra e tij, nga Ken pres “Topin e Artë”

Sport Ekspres — Thu, 27 Jun 2019 14:10:57 +0000

Romeo Lukaku dhe Edin Xheko janë dy objektivat e Interit për repartin e sulmit, ndërkohë që një tjetër emër interesant ka dalë në skenë. Ai është Moize Ken, talenti i Juventusit. 20-vjeçari me origjinë afrikane mund të largohet nga bardhezinjtë, si pasojë e hapësirave të pakta.

Ajaksi interesohet për shërbimet e sulmuesit, por dëshira e tij e madhe quhet… Inter. Këtë e zbulon babai i tij në një prononcim për “Passioneinter.com, i cili ndalet edhe te objektivat dhe ëndrra e madhe për të birin.

“Kur ishte pjesë e Torinos, Moize më thoshte gjithmonë se do donte të transferohej tek Interi. Që i vogël preferonte zikaltrit dhe vishte bluzën e Obafemi Martins. Gjithçka varet nga oferta, por një ftese të Interit do i përgjigjej pozitivisht. Edhe unë i këshilloj të kalojë tek Interi.

Mendoj se kemi parë vetëm 50% të potencialit të tij deri tani. Si një baba e kam thënë gjithmonë që pres që Moize të fitojë ‘Topin e Artë’. Jam i bindur që do t’ia dalë. Po rritet dhe mund ta fitojë këtë çmim brenda 3-4 vitesh. Mos harroni që është vetëm 20 vjeç, luan me Juventusin dhe ka debutuar duke shënuar dy gola me kombëtaren italiane.”

Objektivi i sulmit, Interi gati planin për zbulimin e sezonit

Sport Ekspres — Tue, 30 Apr 2019 09:49:17 +0000

Ditët e ardhshme Juventusi pritet të trokasë në dyert e Interit. Dy janë dëshirat e bardhezinjve: Mauro Ikardi dhe Milan Shkriniar (objektivi kryesor). Fabio Paratiçi, i cili mban postin e drejtorit sportiv, do të marrë informacion dhe do të shprehë interesimin e tij për dyshen zikaltër.

Interi nga ana e tij është i qartë për dëshirat e veta. Klubi nga Milano është gati të nisë sulmin për Moize Ken. 19-vjeçarit i përfundon kontrata me Juven në fund të sezoni të ardhshëm, ndërsa rinovimi nuk ka ardhur ende.

Marota dhe Auzilio janë takuar me Milano Rajolën. Marrëdhëniet me agjentin e sulmuesit janë përmirësuar dhe Ken shihet si përforcimi i duhur për repartin ofensiv. Juventusi do tentojë rinovimin, pasi nuk mund të humbasë me parametra zero një futbollist me potencialin e tij.

Megjithatë, “zonja e vjetër” mund të përfshijë sulmuesin me origjinë nga Bregu i Fildishtë në tratativën për të dërguar mbrojtësin sllovak në Torino, ndërsa Interi mund të kënaqet duke përforcuar sulmin me një lojtar të ri, potent, të uritur dhe mbi të gjitha që shënon gola.