Minifutboll

MINIFUTBOLL | Kombëtarja mposht Kroacinë, mbyllet turneu miqësor (VIDEO)

Sport Ekspres — Sun, 14 Jul 2019 14:25:42 +0000

Kombëtarja shqiptare e minifutbollit e ka mbyllur me fitore pjesëmarrjen në turneun miqësor “Nations Games”. Kuqezinjtë mundën kombëtaren kroate me rezultatin 3-1. Kjo ishte hera e dytë që Shqipëria përfaqësohet në një turne ndërkombëtar të minifutbollit. Një vit më parë kombëtarja debutoi në Europianin “Kiev 2018”.

Krahas ndeshjes me Kroacinë, Shqipëria u ndesh me Bosnje-Hercegovinën dhe Hungarinë, dy ekipe këto që konsiderohen ndër përfaqësueset elitare në këtë sport. Takimi me Bosnjën u mbyll me fitoren 1-0 të boshnjakëve, ndërsa ndeshja ndaj u hungarezëve u mbyll me rezultatin 1-1.

Lojtarët e përzgjedhur për të përfaqësuar Shqipërinë në këtë turne kanë qenë pjesëmarrrës në edicionin e dytë të kampionatin të minifutbollit amator, garë kjo ku morën pjesë 14 ekipe dhe mbi 130 lojtarë.

Shqipëri 3 – 1 Kroaci
Shënues: Leci 9’, Matraxhi 25’, Biba 41’

Shqipëri 1 – 1 Hungari
Shënues: Shima

Shqipëri 0 – 1 Bosnje-Hercegovinë

Minifutboll | Kombëtarja gati për turneun e radhës, 24 lojtarë vishen kuqezi

Sport Ekspres — Tue, 02 Jul 2019 14:25:04 +0000

Shoqata Shqiptare e Minifutbollit Amator ka publikuar listën e lojtarëve të grumbulluar të cilët do të jenë pjesë e pëfaqësueses shqiptare në turneun “Nation Games 2019”, që do të zhvillohet më datë 13-14 Korrik në Vitez të Bosnjë Hercegovinës. Kundërshtarët e kuqezinjve në këtë event do të jenë Bosnja, Kroacia dhe Hungaria.

Në listën prej 24 lojtarësh bëjnë pjesë lojtarë nga 6 prej 14 skuadrave që morën pjesë në ediconin e dytë të kampionatit të minifutbollit amator. Ekipi kombëtar ka filluar përgatitjet në fushat kompleksin stërvitor të Kamzës nën drejtimin e trajnerit Eldi Topi.

Ky është grumbullimi i dytë i kombëtares së minifutbollit pasi vitin e kaluar Shqipëria kreu debutimin në eventet ndërkombëtare duke marrë pjesë në Europianin e zhvilluar në Kiev të Ukrainës.

Portierë
Frenki Dikollari (ATS), Rei Xhaferi (Prestige), Seladin Fetishaj (TRIN 2015)

Mbrojtës
Flamur Pjetërnikaj (ATS), Frisel Pipa(Egnatia), Marsel Dobi (Prestige), Renato Shabi (Prestige), Silger Gjoka (Julton)

Mesfushorë
Ardit Ceka (Egnatia), Brendon Rushiti (Vivi La Vita), Erald Dervishi (Vivi La Vita), Eradi Mertiri (Prestige), Erald Leci (ATS), Ilirjan Matraxhi (Prestige), Jurgen Rushiti (Vivi La Vita), Klodian Azisllari (ATS), Mario Biba (Egnatia)

Sulmues
Albis Dajti (Prestige), Eugen Shima (Prestige), Fatjon Bytyçi (ATS), Fatmir Hysenbelliu (Prestige), Julian Peposhi (Julton), Luan Parllaku (TRIN 2015), Orlando Milla (TRIN 2015)

Minifutboll | Prestige siguron kualifikimin, Egnatia pret nesër biletën me një fitore

Sport Ekspres — Thu, 06 Sep 2018 19:36:56 +0000

Minifutbolli është praktikuar për vite më radhë në çdo shtet të planetit, por lëvizja për standardizimin e këtij sporti ka vetëm pak vite që ka filluar. Fatmirësisht edhe në Shqipëri disa njerëz po punojnë për ta vënë në jetë këtë sport.

Disa muaj më parë Federata e Minifutbollit Amator organizoi kampionatin e parë amator dhe më pas erdhi dhe përfaqësimi i parë i Shqipërisë në Europianin e zhvilluar në Kiev. Por, organizmi i këtij sporti organizon edhe një turne ndërkombëtar në nivel klubesh dhe këtë vit kanë marrë pjesë tri klubeve shqiptare. Bëhet fjalë për skuadrën kampione të kampionatit shqiptar, Prestige, nënkampionët Egnatia dhe skuadrën e OST-së.

Në turneun që zhvillohet në Terme Çatezh të Sllovenisë kanë marrë pjesë 64 ekipe nga gjithë Europa, që janë të ndarë në 14 grupe me nga katër skuadrat ku dy të parat kalojnë në fazën tjetër. Dy nga ekipet shqiptare, Prestige dhe Egnatia kanë marrë rezultate të kënaqshme në dy ndeshjet e para.

Prestige ka siguruar që ditën e parë kalimin në fazën me eliminim direkt falë fitoreve me rezultatin 7-0 dhe 3-1, ndërsa Egnatia ka marrë dy barazime (Një prej tyre ndaj kampionëve në fuqi të Serbisë), por me një fitore ditën e nesërme ndaj skuadrës më të dobët të grupit, rrogozhinasit mund të kalojnë në fazën tjetër. OST nuk ka më se çfarë të shpresojë pasi është 0 pikë pas 2 ndeshjesh.

Minifutboll/ Shqipëria largohet nga Kievi me humbje

Sport Ekspres — Thu, 16 Aug 2018 16:03:30 +0000

Katër humbje dhe një fitore është bilanci i kombëtares së minifutbollit në evropianin “Kiev 2018”. Një rezultat në pamje të parë zhgënjyes, por duhet përmendim faktin se kjo ishte eksperienca e parë e Shqipërisë në minifutboll, ndërkohë shtetet e tjera pjesëmarrëse kanë eksperienca disa të mëparshme në këtë sport.

Ditën e sotme, kuqezinjtë u mundën nga Bullgaria me rezultatin e thellë 5-0. Përfaqësuesja jonë vinte në takim e pamotivuar, ndërsa skuadra bullgare ishte e motivuar në kulm, pasi luante për të siguruar vendin e dytë, vend të cilën nuk e arritën, pasi Kazakistani mori një barazim të çmuar ndaj Bosnjës së vendit të parë.

Shqipëri 0 – 5 Bullgari
Shënues: Todorov 1’, Petrov 15’, Tabakov 26’, Aleksandrov 27’, Filipov 33’