Milan Serie A

Hernandez zyrtarisht kuqezi, ka betejë për supertalentin e Benfikës

Sport Ekspres — Sat, 06 Jul 2019 11:35:41 +0000

Milan, me ardhjen e Marko Xhampaolos, pritet të ndryshojë fytyrë në mesfushë. Tekniku i ri pret ardhjen e Kruniç dhe Benaser. Megjithatë, kjo dyshe nuk mjafton dhe Gazidis po tenton sjelljen e një lojtari tjetër me cilësi në këtë repart. Gedson Fernandes është objektivi i Milanit.
I riu i Benfikës ka treguar një talent të madh dhe ka tërhequr interesin e shumë gjigantëve evropianë. Milani është një nga të interesuarit dhe ka nisur bisedimet me Benfikën. “Sky Sport” raporton se klubi portugez nuk negocion me asnjë klub për një ofertë nën 30 milionë euro.

Fernandes, vetëm 20 vjeç, ka luajtur plot 46 ndeshje në të gjitha kompeticionet me Benfikën këtë sezon. Ka ndihmuar në nëntë gola të ndarë në gjashtë asiste dhe tre topa të çuar në rrjetë nga ai. Ardhja e tij në Milano do të ishte goditja më e madhe e merkatos nga kuqezinjtë këtë verë.

Ndërkohë së fundmi është konfirmuar edhe afrimi i Teo Hernandez, mbrojtësit të majtë që kuqezinjtë e kanë blerë dhe ka nënshkruar për pesë vite. Milani ende nuk ka dalë me njoftim, por në Federatën Italiane të Futbollit është depozituar kontrata me mbrojtësin.

Xhampaolos i gjejnë shpejt zëvendësuesin, një ish-roman te Sampdoria

Sport Ekspres — Sat, 22 Jun 2019 21:31:23 +0000

Pas largimit të teknikut Xhampaolo te Milani, stoli i Sampdorias ishte një pozicion vakant. Megjithatë, dilema e pasardhësit të tij ka zgjatur shumë pak sepse është gjetur strategu i ri. Eusebio Di Françesko do të jetë tekniku i ri i Sampdorias.
Italiani ka firmosur një kontratë afatgjatë me drejtuesit e klubit. Bashkëpunimi mes palëve do të zgjasë deri në verën e vitit 2022. Lajmi është bërë i ditur përmes një komunikate të klubit të Sampdorias në rrjetet sociale.

Drejtuesit besojnë në aftësitë e tij dhe shprehen se janë të bindur se ai do e rrisë skuadrën me eksperiencën, njohuritë dhe aftësitë që zotëron. Di Françesko ishte i papunë që nga muaji mars, kur u shkarkua nga Roma pas rezultateve të dobëta.

? #DiFrancesco è il nuovo allenatore della #Sampdoria ?? https://t.co/PtZwQpA5j3 pic.twitter.com/7A5wJ6it7E

— U.C. Sampdoria (@sampdoria) June 22, 2019

Largimi i legjendave dhe drejtimi i Milanit, flet Pepe Reina

Sport Ekspres — Sat, 01 Jun 2019 18:11:36 +0000

Revolucioni që po ndodh te Milani duket se i ka trembur tifozët. Largimi i Gatuzos dhe Leonardos, që kanë dhënë shumë mund për këtë klub, ka hasur me shumë kundërshti. Ardhja e personave si Gazidis, që nuk kanë lidhje me të shkuarën e klubit dhe nuk kanë kontribuar kurrë për të, i ka bërë mbështetësit të jenë skeptikë.

Pepe Reina është nga ata, që e njohin mirë ambjentin brenda Milanit dhe mundohet të qetësojë tifozët. Ai shprehet se klubi është në duar të sigurta dhe klubi do të rritet. Thotë që tifozët të tregohen të qetë dhe të presin.

“Duhet të presim sepse nuk mund të bëjmë asgjë tjetër. Shpresojmë që zgjedhjet të jenë të drejta. Duhet gjithmonë të përpiqemi dhe respekti të qëndrojë në plan të parë. Milani është në duar të sigurta dhe nuk kam asnjë dydhim se klubi do vazhdojë të rritet”, u shpreh portieri kuqezi.

Milan tenton “dy zogj me nje gurë”, blen yllin e Napolit dhe afron ish-trajnerin

Sport Ekspres — Tue, 30 Apr 2019 21:11:37 +0000

Milani është në një krizë të thellë këtë sezon. Kuqezinjtë do të duhet të ndërhyjnë me patjetër në merkato për të bërë lëvizjet e duhura. Gatuzo është gati e sigurt se po jeton muajt e fundit si trajner i kuqezinjve. Mauricio Sarri dhe Lorenzo Insinje janë dy synimet e para në projektin për ta ngjitur Milanin. Lojtari nuk ndihet mirë në Napoli dhe me shumë mundësi do të largohet për të provuar një tjetër eksperiencë. Me një ofertë të lartë financiare, lojtari dhe Napoli do te bindeshin për ta përmbyllur transferimin.

Ndërkohë vendi i Mauricio Sarrit është duke u lëkundur. Trajneri dështoi ta çojë Çelsin tek titulli, madje është në dyshim të madh edhe prezenca në Champions për sezonin e ardhshëm. Kështu është shumë i mundur një largim i tij nga “Stamford Bridge”. Me ardhjen e Insinjes, drejtuesit kuqezinj do ta kishin të lehtë ta sillnin Sarrin në “San Siro”, pasi trajneri aty do të gjente lojtarin e tij të preferuar, tek i cili mund të mbështesë projektin e tij për Milanin e madh.

Milanisti “i thekur” Konti: Firmos të mos luaj kurrë, veç të ndodhë diçka!

Sport Ekspres — Fri, 08 Mar 2019 08:19:10 +0000

Andrea Konti verën e vitit 2017 u ble nga Milani për shumën e 25 milionë eurove, ndërkohë që kishte bërë një sezon super tek Atalanta. Edhe pse luante si mbrojtës i djathtë, 25-vjeçari arriti të realizonte 8 gola dhe krosimet e tij ishin shumë të rëndësishme për skuadrën nga Bergamo.

Konti ishte fatkeq, pasi vjet luajti vetëm dy ndeshje në kampionat në muajin gusht dhe më pas dëmtimi në gju e la jashtë fushave të blerta për shumë kohë. Së fundmi është rikthyer të luajë dhe në sfidën e radhës kundër Kievos mendohet ta nisë nga minuta e parë.

“Jam mirë, kundër Empolit luajta për të parën herë 90 minuta pas shumë kohësh. Mendova se do shkonte më keq, e them sinqerisht, pasi jam i vetëdijshëm që nuk i kam 90 minuta në këmbë. Jam vetëm në 70% të mundësive të mia. Jam gati dhe trajneri e di se kur të më llogaritë. Stërvitem në maksimum dhe kur më thirrin për të luajtur mundohem të jap kontributin tim”, shprehet Konti për Milan Channel.

Sigurisht dëshira e Kontit është që të marrë minuta, por është i gatshëm të sakrifikojë për kuqezinjtë vetëm e vetëm që të arrijnë kualifikimin në Champions League. Deklarata e mbrojtësit të djathtë është shumë e qartë.

“Kam qëndruar jashtë fushave të blerta për shumë kohë dhe do të doja të luaja më shumë, por Kalabria që po luan në vendin tim po bën një kampionat të mirë. Rezultatet flasin qartë. Gatuzo e di çfarë kam kaluar, e ka provuar edhe ai. Di si të sillet me mua dhe kur të më lejojë të luaj. Do firmosja të mos luaja asnjë ndeshje vetëm ta shoh Milanin ta mbyllë në vendin e katërt në fund të sezonit”, përfundoi Konti.