“Njeriu i qiellit”, futbollit dhe gazetarisë, Mikel Janku në banesën e fundit!

Sport Ekspres — Fri, 11 Jan 2019 10:54:25 +0000

Sot, qindra qytetarë të Tiranës, miq, shokë e të afërm të Mikel Jankut, i dhanë atij lamtumirën e fundit. Në fytyrat e tyre dhimbja shprehej qartë, por edhe krenaria që kanë njohur një njeri të madh, një intelektual që sportin e dashuroi si jetën. Veç figurave të njohura të Partizanit e të Kombëtares, aty kishte edhe gazetarë sportivë, e mes tyre edhe Presidenti i Republikës, Ilir Meta, Presidenti i FSHF-së, Armand Duka. Kujtimet e vlerësimet për figurën e Mikel Jankut e rikthyen në kujtesë atmosferën e viteve të bukura të këtij personaliteti, i cili sot u përcoll për në banesën e fundit vetëm fizikisht. Ai la pas një histori të madhe dhe me vlera në futbollin shqiptar, por edhe në gazetarinë sportive në vendin tonë.

Presidenti i Shqipërisë, Ilir Meta
“Për një njeri të madh si Mikel Janku, fjalët sot janë të vështira për t’u thënë. Por ai ishte një figurë e madhe e futbollit shqiptar dhe më pas e gazetarisë sportive. Mikeli ishte njeri me integritet në shoqëri, një njeri që sot nuk mund të përshkruhet me pak fjalë. Figura e tij le të jetë një mesazh për gjeneratat e reja të shoqërisë shqiptare, të cilat duhet të mësojnë më shumë nga historia që Mikel Janku la pas”.

Presidenti i FSHF-së, Armand Duka
“Mikeli ishte dhe do të mbetet një nga figurat e shquara të futbollit shqiptar. Ai ka qenë model i një sportisti shembullor, i një njeriu me kulturë e qytetari, një drejtues pasionant në sport, por edhe një gazetar që sportit i mbeti besnik deri në fund të jetës së tij. Sot ai po ndahet vetëm fizikisht nga jeta, por historia e tij do të mbahet mend nga brezat. Federata Shqiptare e Futbollit gjendet pranë familjes së tij në këtë dhimbje”.

Fatmir Mneri, ish-kryeredaktor i Sport Ekspres
“Kam kaluar momente të vështira, por edhe shumë të bukura me Mikel Jankun. Ai ishte bashkëthemelues i gazetës Sport Ekspres dhe më pas u bë një kontribuues i vlerave më të mira të gazetarisë sportive. Qielli e tërhiqte shumë Mikelin në ëndrrën që ai kishte për t’u bërë aviator. Dëshira për të fluturuar e bëri të tillë edhe si portier të madh te Partizani dhe te Kombëtarja. Sot ai qiell e mori përgjithmonë”.

Më shumë se një nekrologji për Mikel Jankun!

Sport Ekspres — Thu, 10 Jan 2019 08:45:55 +0000

Është shumë emocionale të shkruash për një koleg, për një ish-drejtues të medias sportive, për një ish-futbollist të Partizanit të madh dhe të Kombëtares sonë, i cili ndahet nga jeta pas një sëmundje të rëndë. Ai është Mikel Janku, njeriu që nuk u nda nga pista e aviacionit, nga fusha e futbollit, ndërsa qershia mbi tortën e jetës së tij ka qenë shtypi sportiv shqiptar. Për gati 15 vjet Mikel Janku ishte zëvendëskryeredaktor i gazetës sportive shqiptare “Sport Ekspres”, në të cilën ka dhënë një kontribut të madh që nga krijimi i saj e deri në largim, kur mosha e nxorri në pension.

Mikeli nënshkroi si i pari i familjes “Janku” rrugën e bukur në futbollin shqiptar, për të formuar brezin e artë me Gimin, Ladin dhe Albanon, të gjithë të veccantë, por të mëdhenj për sa i dhanë topkëmbës shqiptare. Një jetë në futboll dhe në median sportive, Mikel Janku sot do të kujtohet me të gjithë autoritetin, sinqeritetin e përkushtimin e tij në organizimin e gazetës, në marrjen e përpunimin e lajmit, njëherësh dhe në publikimin me kulturë e finesë të tij.

Por kolegët e medias sportive në Shqipëri nuk e harrojnë Mikel Jankun edhe si një komentator dhe opinionist në radio dhe televizion, ku për gati 20 vite, me profesionalizmin e tij ai u bë një nga figurat kryesore të gazetarisë sportive të kohës.

Këto radhë janë pak, madje shumë pak për madhështinë e jetës dhe të karrierës së Mikel Jankut. Kështu do të mbahet mend ky njeri i madh i sportit shqiptar, ky Mjeshtër i Merituar në fushën e futbollit dhe në fjalën e lirë. Sport Ekspres ngushëllon familjen Janku, vëllezërit e gjithë të afërmit, shokët, miqtë dhe kolegët e tij për këtë ndarje të shpejtë nga jeta të Mikelit.

Për ne do të mbetesh i paharruar Mikel!