Bomba nga Anglia: “Raiola e di se Pogba duhet të largohet”

Sport Ekspres — Thu, 23 May 2019 20:49:46 +0000

E ardhmja e Pol Pogba tek Mançester Junajtid sa vjen e duket më e shkurtër. Kampioni i Botës megjithëse ka bërë një sezon mjaft të mirë mund të largohet këtë verë. Mesfushorin nuk e emocionon më ideja e të luajturit me Junajtid. Ai duket se e ka zbrazur atë që ka dashur të japë në “Old Trafford”.

Dështimi i Junajtid për të luajtur në Champions League është një tjetër fakt, që e drejton 26-vjeçarin tek largimi. Të pasurit një agjent si Mino Raiola, transferimi në një klub tjetër nuk shihet aspak si problem. Nëse Pogba ka dëshirë të largohet, agjenti italian është gati të përfitojë. Reali i Madridit është destinacioni më i mundshëm ifrancezit. Zidan e pëlqen shumë bashkëkombasin e tij. Edhe Juventus mbetet një alternative potenciale.

Mido, ish-futbollisti dhe trajneri egjiptian ka folur rreth situatës së Pogba. Ai shprehet se Pogba do të largohet dhe Mino Raiola me siguri po sheh për një ekip, ku ta akomodojë. Mido e ka pasur për 10 vite si agjent Raiolën dhe duke e njohur mjaft mirë, shprehet se është i sigurt se ai do e transferojë ne një klub tjetër yllin e mesfushës.

“Agjenti i Pogbasë është Mino Raiola. Kam bashkëpunuar me të për 10 vite. Ai e di se çfarë bën, më besoni. Raiola e di se është koha e duhur që Pogba të largohet. Mino po sheh për një klub të ri për të. Polin nuk e shoh te Junajtid në sezonin e ardhshëm. Zidan e pëlqen shumë atë. E njeh personalitetin e tij dhe do të kuptoheshin shumë mirë”, përfundoi Mido.

Arabët shkarkojnë trajnerin, shkak një “cicërimë” në Twitter

Sport Ekspres — Wed, 20 Mar 2019 13:45:41 +0000

Arsyet e shkarkimeve të një trajneri mund të jenë të ndryshme, por si kjo arsye nuk na kishin dëgjuar veshët. Mido, trajneri i skuadrës arabe të Al Wehda, është shkarkuar nga drejtimi i klubit pas vetëm katër muajsh sepse ka ofenduar një tifoz në rrjetet sociale.

Arsyen e ka treguar një zyrtar i klubit, që është shprehur se Mido nuk është shkarkuar për arsye teknike. Trajneri kishte fyer me një postim në rrjetet sociale një tifoz të pakënaqur dhe e kishte fshirë pak momente më pas. Kjo nuk ka shpëtuar pa u pikasur nga zyrtarët e klubit nga Meka, që kanë lançuar shkarkimin e trajnerit 36-vjeçar, megjithëse ai ishte shprehur se ia kishin vjedhur llogarinë e tij.

Trajneri pati bërë mirë nën drejtimin e skuadrës arabe, duke regjistruar 6 fitore dhe vetëm 3 humbje në 13 ndeshje. Gjithsesi klubi i Al Wehda i konsideron tifozët si një pjesë e paprekshme e klubit, duke mos lejuar askënd të ofendojë qoftë edhe vetëm njërin prej tyre.

“Tifozët janë një vijë e kuqe që nuk duhet shkelur. Ne shpresojmë që llogaria e tij të jetë vjedhur. Mido e ka bërë ligën më konkurruese. Ai arriti të na japë pikë të rëndësishme sa ishte me ne”, u shpreh zëvendëspresidenti.