29-vjeçari ishte titullar fiks sezonin e shkuar në Vlorë, që kur u transferua në janar, por këtë sezon Duro ka preferuar Mustën, ndaj e ka lënë të mirë Mersinin, në rast se ky dëshironte të luante rregullisht.

Pas Sukajt dhe Sedat Berishës, Mersini bëhet përforcimi i tretë i Vllaznisë, ndërsa tani pritet edhe një qendërmbrojtës, që me shumë gjasa do të jetë Renato Malota.

Megjithatë, 29-vjeçari është ende pjesë e Flamurtarit, kjo nuk duhet harruar, edhe pse klubi vlonjat nuk e përfshiu në listën e minifazës turke. Kjo do të thotë që Mersini është jashtë planeve të Shpëtim Duros, por nga ana tjetër destinacionin e tij e vendos sërish administratori Sinan Idrizi. Nëse ai jep dritën jeshile, Mersini prezantohet që sot në Shkodër dhe më pas niset për në Ulqin. Sa për qendrën e mbrojtjes, Gjoka po pret një përforcim serioz për ta kompletuar repartin, por ende ka dilema. I preferuari mbetet Renato Malota, por nuk është i vetmi, sepse si nga vendi, ashtu edhe nga jashtë, ka emra të gatshëm të bëhen pjesë e Vllaznisë.

Anësori i majtë, i bashkuar me Flamurtarin në janar, ka shkëlqyer në fushën e vet, duke luajtur 17 ndeshje në formacion, me një rendiment konstant, ndërkohë që ka bërë për vete tifozët dhe drejtuesit, mbi të gjitha për faktin se nuk ka qenë një nga ato afrimet pompoze, me kontrata prej disa mijëra eurosh.

Tani Mersini është shpërblyer nga klubi vlonjat me një kontratë të re dhe me siguri edhe me një rritje page, pas paraqitjes së mirë në sezonin e fundit, duke qenë një garanci në të majtë të mbrojtjes.

Sot 28-vjeçari ka firmosur dhe klubi ka publikuar fotot e “prezantimit” të tij të dytë.