Memolla

Venecia e pafat, 11-metërshat mbajnë në Serie B Salernitanën

Sport Ekspres — Sun, 09 Jun 2019 19:14:50 +0000

Venecia nuk ia doli të përmbyste Salernitanën në ndeshjen “Play-Out” të Serie B. Skuadra e drejtuar nga Serse Kosmi i duhet të fitonte me të paktën 2 gola diferencë për të zhvleftësuar humbjen e 2 – 1 të pësuar në takimin e parë.

Goli i Modolos në minutën e 41-të nuk mjaftoi për venecianët. Rezultati qëndroi i pandryshuar përgjatë të gjithë pjesës së mbetur të ndeshjes dhe skuadrat iu drejtuan goditjeve të 11-metërshave.

Fati nuk ishte me lojtarët e Venecias, të cilët humbën dy penallti, ndërsa te Salernitana nuk pati vend për gabime. Në këtë takim u aktivizua nga stoli mbrojtësi shqiptar Hysen Memolla.

VIDEO | Dermaku i jep tri pikë Kozencës, Ndoj e Memolla përballen si “spektatorë”

Sport Ekspres — Mon, 22 Apr 2019 21:33:27 +0000

Kastriot Dermaku shënoi golin e parë në Serie B në takimin e sotëm, ku skuadra e tij Kozenca u përball me Specian. Goli i qendërmbrojtësit shqiptar rezultoi vendimtar për t’i dhënë tri pikët ekipit nga jugu i Italisë. Kur kanë mbetur edhe tri ndeshje për t’u luajtur, Kozenca qëndron në kuotën e 42 pikëve, 9 pikë larg zonës “play-out”.

Në takimin midis Breshias dhe Salernitanës fituan vendasit me rezultatin 3 – 0. Si rrallëherë Emanuele Ndoj qëndroi në stol gjatë të gjithë ndeshjes, në të njëjtën situatë u gjend dhe Hysen Memolla, i cili nuk ka mundur të gjejë minuta të shumta te Salernitana që prej transferimit në muajin janar.

Memolla me ekip të ri, largohet nga Hajduku dhe zgjedh Italinë

Sport Ekspres — Thu, 24 Jan 2019 16:23:11 +0000

Hysen Memolla është lojtari më i ri i Salernitanës. Mbrojtësi kuqezi është transferuar sot te skuadra italiane dhe do të vazhdojë karrierën e tij larg Kroacisë, ku për shumë sezone u aktivizua me ekipin e Hajduk Splitit.

Memolla është grumbulluar shpeshherë dhe nga Panuçi në kombëtaren shqiptare të futbollit dhe 26-vjeçari do t’i bashkohet emrave si Hysaj, Veseli, Gjimshiti, Strakosha dhe shumë shqiptarëve të tjerë që luajnë në kampionatet e Italisë.

Te Salernitana, Memolla pritet të ketë minuta të plota dhe të fiksojë një vend titullari në krahun e majtë të mbrojtjes. 26-vjeçari është zyrtarizuar sot te skuadra italiane. Lajmin për transferimin nga Hajduku te Salernitana e ka konfirmuar klubi kroat.

“Hysen Memolla nuk është më lojtar i Hajdukut dhe do të largohet drejt Italisë. Memolla dhe klubi i Salernitanas kanë qenë në bisedime prej shumë ditësh dhe sot është gjetur akordi mes tyre. I urojmë fat Memollës në aventurën e tij të re.”

Memolla i befasuar: Nuk e prisja këtë ftesë, me De Biazin asnjë raport

Sport Ekspres — Tue, 29 Aug 2017 11:56:11 +0000

Hysen Memolla luan prej një viti me Hajdukn e Splitit, ku është bërë një titullar fiks dhe pas paraqitjeve të shkëlqyera në Europa League këtë verë, ka bindur edhe trajnerin Kristian Panuçi ta bënte pjesë të kombëtares shqiptare.

Mbrojtësi 25vjeçar nga Kavaja nuk e fsheh që është befasuar nga grumbullimi, duke parë se sezonin e shkuar nuk pati asnjë sinjal nga De Biazi: “Nuk e prisja ftesën. Jam shumë i lumtur që jam pjesë e kombëtares. Do të jap gjithçka, sa herë të kërkohet kontributi im. Kisha dëshirë të bashkohesha më herët me kombëtaren,por futbolli është i tillë, është me shanse. Tani është shansi im dhe dua ta shfrytëzoj. Nuk kisha raporte me trajnerin De Biazi, ndaj nuk e prisja grumbullimin. Nuk e di çfarë ka ndryshuar tani, por jam shumë i lumtur që jam këtu.

“Pozicioni ideal? Luaj si mbrojtës i majtë, aty jap maksimumin tim. Luaj në një krah me kapitenin Agolli. Nuk e di sa shanse do të kem të zbres në fushë, unë jam këtu për të punuar. Agolli është kapiteni ynë dhe është lojtar shumë i mirë. Do të jap gjithçka në stërvitje, pastaj vendos trajneri.

“Ambientimi me grupin? Shumë mirë, shumë lojtarë po i njoh tani, po ambientohem mirë. Sfida kundër Lihtenshtejnit nuk duhet trajtuar si një ndeshje e thjeshtë. Duhet përqendrim maksimal, nuk ka ndeshje të thjeshta”.