Zikaltrit duan edhe Mateo Kovaçiç. Edhe kroati dëshiron rikthimin në ekipin me të cilin luajti gjatë viteve 2013-2015. 25-vjeçar ishte i huazuar te Çelsi sezonin e shkuar. Paraqitjet e tij ishin pozitive, por bllokimi i merkatos së “Bluve të Londrës” e riktheu në Madrid.

Zidan nuk e llogarit pjesë të skemave të tij dhe “Los Blancos” po kërkojnë t’i gjejnë një sistemim të ri. E ardhmja duket Interi, i cili ka nisur negociatat me agjentin e Kovaçiç. Tani mbetet të arrihet akordi mes klubeve, me zikaltrit e Kontes që preferojnë huazimin me të drejtë blerje të lojtarit.

Kroati ka folur për “Sky Sports Uk”, duke treguar se ndihet për mrekulli në kryeqytetin anglez, por në fund vendos Reali për të. Kovaçiç ndalet dhe te shoku i tij i skuadrës, Eden Hazard. Belgu është ylli i ekipit, ndërsa e ka shprehur qartë dëshirën e tij për t’u transferuar te “Los Blancos”.

ÇELSI – “Mendoj se kalimi te Çelsi ishte një nga gjërat më të drejta që kam bërë në karrierë. Ishte një hap që vërtetë dëshiroja ta bëja dhe doja të vija këtu. Dua të falënderoj Realin e Madridit, ashtu si dhe Çelsin, që më dëshironte shumë. Më pëlqen gjithçka në Londër dhe po zbavitem shumë. Jam shumë i lumtur, qyteti është fantastik, klubi është një nga më të mirët në botë dhe shokët e skuadrës janë fantastikë. Më duhet të respektoj Realin, por dëshiroj të qëndroj te Çelsi dhe dua të jap maksimumin çdo ditë.”

HAZARD – “Eden është një lojtar i pabesueshëm. E dija që ishte i fortë, por nuk e mendoja se mund të ishte ndër 2-3 lojtarët më të mirë në botë. Më ka pyetur për Realin e Madridit, por për momentin jemi të dy të përqendruar për të bërë një sezon të madh me Çelsin, më pas do të shohim se çfarë do të ndodhë.”