Dëmtim më i rëndë seç mendohej, Kaldara e mbyll fazën e parë

Sport Ekspres — Tue, 30 Oct 2018 11:08:09 +0000

Moment aspak pozitiv për Matia Kaldarën, i cili është dëmtuar përsëri dhe do të mungojë për një periudhë të gjatë. Mbrojtësi i Milanit ka pësuar një çarje prej 3 cm në muskulin e pulpës së djathtë dhe mungesa e tij është zgjatur.

“Do të qëndrojë jashtë disa muaj”, u shpreh Xhenaro Gatuzo pas fitores me Sampdorian dhe ashtu do të jetë. 24-vjeçari do të mungojë për 3 muaj siç citon “Gazzetta dello Sport”. Kaldara do ta kryejë fazën e rehabilitimit në Milano bashkë me stafin mjekësor të kuqezinjve, ndërsa nuk do të ketë konsulentë të jashtëm.

Lojtari u transferua gjatë merkatos së verës nga Juventusi te Milani, ndërsa ka zhvilluar vetëm një takim me ekipin e “Djallit”. Atë kundër Dundelanzh në Europa League, ndërsa debutimi në kampionat nuk ka ardhur ende.

Gjatë kësaj periudhe, Kaldara ka pësuar disa dëmtime, duke nisur nga ai në shpinë dhe më pas pubalgjia. Tashmë i duhet të ndalojë përsëri për t’u rikthyer në janar.

Lajm i mirë për Gatuzon, përforcohet mbrojtja para derbit

Sport Ekspres — Sun, 14 Oct 2018 13:55:55 +0000

Pas një jave Milan dhe Inter përballen në derbin e Milanos, ndërsa ekipet po vazhdojnë përgatitjet e tyre për këtë ndeshje të veçantë. Atmosfera është pozitive, ndërsa të dy palët kërkojnë të fitojnë ndeshjen, mbi të gjitha për tifozët respektivë.

Në kampin milanist situata është e qetë, ndërkohë që një lajm i mirë ka ardhur nga infermieria. Alesio Romanjoli dhe Matia Kaldara janë drejt rikuperimit nga dëmtimet respektive. Dy qendrat e mbrojtjes ndodhen në gjendje të mirë dhe siç citon “Gazzetta dello Sport”, ata do të jenë të gatshëm për trajnerin Gatuzo në derbin e Milanos.

Lojtarët nuk kanë marrë pjesë në miqësoren e djeshme midis ekipit të parë dhe ekipit të të rinjve, por prania e tyre përballë Interit është e sigurt.